EBIBUUZO EBI BAIBULI ERIKUGARUKAMU
Noobaasa kumanya amazima agarikukwata ahari Ruhanga?
Ahabw’enki ruhanga naayenda ngu tumanye amazima? Shoma Yohaana 17:3
Ruhanga akaba agamba n’abantu. Akaba akoresa omwoyo gwe gurikwera kuha ebiteekateeko bye abaahandiikire Baibuli. (2 Petero 1:20, 21) Nitubaasa kumanya amazima agarikukwata ahari Ruhanga turikushoma Baibuli.—Shoma Yohaana 17:17; 2 Timoseo 3:16.
Ruhanga naatworeka ebintu bingi ebirikumukwataho kurabira omu Baibuli. Naayoreka ahabw’enki yaahangire abantu, ebirungi ebi arikwija kubakorera, n’oku arikwenda ngu tutuure. (Ebyakozirwe 17:24-27) Yehova Ruhanga naayenda ngu tumanye amazima agarikumukwataho.—Shoma 1 Timoseo 2:3, 4.
Ahabw’enki Ruhanga naayakiira abarikukunda amazima?
Yehova ni Ruhanga ow’amazima, kandi akoohereza Omwana we Yesu, kwegyesa abantu amazima. N’ahabw’ekyo, abarikukunda amazima, niboorobera Yesu. (Yohaana 18:37) Ruhanga naayenda ngu abantu nk’abo babe abaheereza be.—Shoma Yohaana 4:23, 24.
Sitaane Omuregi aremeise abantu baingi kumanya Ruhanga arikujanjaaza enyegyesa ezigwire ezirikukwata ahari Ruhanga. (2 Abakorinso 4:3, 4) Abantu abatarikukunda ebihikire nibashemezibwa enyegyesa ezo. (Abarooma 1:25) Kwonka obukaikuru bw’abantu nibamanya amazima agarikukwata ahari Ruhanga barikwega Baibuli.—Shoma Ebyakozirwe 17:11.