Amazima shi Gakiri Makuru?

Nooreeba ngu kigumire kutaanisa amazima aha bishuba? Abantu hati nibakunda kugyendera aha nyehurira zaabo n’emiteekateekyere yaabo omu mwanya gw’ebihikire n’amazima. Omu nsi yoona, abantu baingi tibarikwikiriza ngu hakiriho amazima.

Emiteekateekyere egi ti misya. Emyaka nka 2,000 enyima, Omutegyeki Omurooma Pontio Pilaato omu muringo gw’okukiniika akabuuza Yesu ati: “Amazima n’enki?” (Yohaana 18:38) N’obu Pilaato araabe atarategyereize Yesu kumugarukamu, ekibuuzo kye kikaba kiri kikuru. Baibuli neegarukamu ebihikire, kandi nibibaasa kukuhwera omu nsi egi etarimu mazima.

Beitu amazima go gariho?

Eego. Baibuli neekoresa ekigambo “amazima” kumanyisa ebiine obuhame, n’ebihikire. Neeyegyesa ngu Yehovaa Ruhanga niwe bukomooko bw’amazima genyini, erikumweta “Ruhanga orikwesigwa,” nari ow’amazima. (Zaaburi 31:5) Baibuli erimu amazima agarikuruga ahari Ruhanga, kandi neegyeragyeranisa amazima n’ekyererezi, ahabw’okugira ngu nigabaasa kutwebembera omu nsi egi eshobire hati.—Zaaburi 43:3; Yohaana 17:17.

Noobaasa kutunga ota amazima?

Ruhanga tarikwenda ngu twikirize amazima ga Baibuli tutaine buhame. Kureka, naayenda ngu tugashwime turikukoresa okubaasa kwaitu kw’okuteekateeka, omu mwanya gw’okwesiga enyehurira zaitu. (Abarooma 12:1) Naayenda ngu tumumanye kandi tumukunde ‘n’obwengye bwaitu bwona,’ kandi twehamize amazima g’ebi turikwega omu Baibuli.—Matayo 22:37, 38; Ebyakozirwe 17:11.

Okubeiha kukaruga nkahi?

Baibuli neegira ngu Sitaane Omuregi, omuzigu wa Ruhanga ou Baibuli erikweta “ishe w’ebishuba,” niwe yaatandikireho okubeiha. (Yohaana 8:44) Akabeiherera Ruhanga aha bantu b’okubanza. (Okutandika 3:1-6, 13, 17-19; 5:5) Kuruga obwo, Sitaane atwire naajanjaaza ebishuba, kandi arikushereka amazima agarikukwata ahari Ruhanga.—Okushuuruurwa 12:9.

Ahabw’enki hariho okubeiha kwingi hati?

Omu biro ebi, ebi Baibuli erikweta ‘ebiro by’emperu,’ Sitaane naareetera abantu kwongyera kubeiha. Abantu nibakira kugamba ebishuba kuhabisa bagyenzi baabo, n’okwenda kubanyagaho ebyabo. (2 Timoseo 3:1, 13) Ebishuba biijwire n’omu madiini maingi ebiro ebi. Nk’oku Baibuli yaagambire kare aha bwire bwaitu, abantu ‘beekanyisiize abeegyesa abarikwegyesa nk’oku okwetenga kwabo kuri,’ baacwamu ‘kwigara amatu ngu batahurira amazima.’—2 Timoseo 4:3, 4.

Ahabw’enki amazima ni makuru?

Amazima nigareetera abantu kwesigana. Ahatari kwesigana, obunywani n’obutuura gye bw’abantu nibihwaho. Baibuli neegira ngu Ruhanga naayenda ngu okuramya kwaitu kwegamire aha mazima. Neegira eti: ‘Abarikuramya [Ruhanga] bashemereire kumuramya [baine] omwoyo n’amazima.’ (Yohaana 4:24) Okwega oku amazima ga Baibuli garikubaasa kukuhwera kumanya ebishuba by’ediini kandi okabyecwaho, shoma ebicweka ebikurataine, ebiine omutwe, “Ebirikureetera Baingi Kugumirwa Kukunda Ruhanga.”

Ahabw’enki Ruhanga naayenda ngu mmanye amazima?

Ruhanga naayenda ngu ohikye aha kujunwa, kandi oine kwega amazima agarikumukwataho kubaasa kujunwa. (1 Timoseo 2:4) Waayega emitindo ya Ruhanga erikukwata aha kihikire n’ekigwire kandi okagigyenderaho, noija kuba munywani we ow’aha mara. (Zaaburi 15:1, 2) Ruhanga akoohereza Yesu omu nsi, kuhwera abantu kwega amazima. Ruhanga naayenda ngu twikirize enyegyesa za Yesu.—Matayo 17:5; Yohaana 18:37.

Ruhanga shi naija kwihaho okubeiha?

Eego. Ruhanga tarikwendera kimwe kureeba abantu nibahabisa bagyenzi baabo barikukoresa ebishuba. Naaraganisa ngu naija kucwekyereza abamaririire kugumizamu nibabeiha. (Zaaburi 5:6) Kandi Ruhanga naija kuhikiiriza n’okuraganisa kwe ngu, ‘eminwa erikugamba amazima neija kugumaho ebiro byona.’—Enfumu 12:19.