1 Neetuhwera Kwetantara Oburemeezi

OKUKORESA KUBI AMAARWA

Delphine, orikugambwaho omu kicweka eky’enyima, amaganya gakaba nigamureetera kwenda kuguma naanywa amaarwa. Baibuli terikuzibira omuntu kunywa amaarwa, kwonka neegira eti: “Otariza omu mutwe gw’abanywi ba viinyo.” (Enfumu 23:20) Okukoresa kubi amaarwa nikureeta endwara, emikago mibi, kandi nikurugiramu n’abantu baingi kufa. Bwingi aha buremeezi obu, abantu nibabaasa kubwetantara, baagyendera aha buhabuzi bwa Baibuli.

Delphine akabugyenderaho. Hati naagira ati: “Nketegyereza ngu amaarwa tigarikwihaho amaganya. Nkagyendera aha bwengye oburi omu Abafilipi 4:6, 7, oburikugira buti: ‘Muteemereza omutima aha kintu kyona, kureka mumanyise Ruhanga ebi murikwetenga.’ Buri kiro ku naabaire ngira ebiteekateeko nari nkagira amaganya, nkaba nyeshengyereza Yehova. Nkaba mmugambira enyehurira zangye zoona, otwariiremu ekiniga, obusaasi, n’obujune, kandi nkaba mweshengyereza kumpwera kugira emiteekateekyere mirungi. Kandi buri kasheeshe, nkaba mpamya ngu buzima naayehuzya enyehurira ezo. Okushaba Yehova kukampwera kugira emiteekateekyere mirungi, reero naata omutima aha bintu ebi nyine omu mwanya gw’ebi ntaine. Nkacwamu kutagaruka kunywa amaarwa. Ahabw’okugira ngu obusingye obu naatungire bukaba buri obw’omuhendo, nkacwamu kutabufeerwa.”

EBY’OBUSHAMBANI

Obushambani nibwo burikukirayo kureeta obuhinza mutima n’okugira enaku. Kwonka emisingye ya Baibuli neebaasa kutuhwera kwetantara oburemeezi erikutworeka ebirikubureeta, nk’okweshunga n’abu otarikushushanisa nabo obuhangwa, n’okureeba ebirikwitsa enshoni. Omutsigazi orikwetwa Samuel naagira ati: “Kikaba nikinyorobera kweshunga. Obumwe nkaba mba ntarikurigira omuntu ogwo, kwonka nkaba mmanya ngu naakunda, reero ekyo kindeetera kweshunga nawe.” Samuel akashanga ngu emirundi mingi bakaba bamugira ngu naayeshunga n’obu araabe yaabaire naaba atakigyendereire, reero ekyo kyamureetera kucwamu kugumizamu naayeshunga akigyendereire. Kwonka omuze ogwo gukaba nigumureetera kweshinja. Samuel hati naagira ati: “Gukaba guri ogw’akabi, ahakuba nigureeta emiteekateekyere y’okweyendeza.”

Samuel akashoma ekicweka ky’eminyeeto ekiri aha mukura jw.org. Kandi akateekateeka aha biri omu Enfumu 20:11, aharikugira hati: “Omuntu n’obu yaakuba omwana amanyirwa aha bi arikukora, omurimo gwe gwaba gushemeire, kandi guhikire.” Eki kikamuhwera kita? Akeetegyereza ngu okweshunga kwe kukaba kutashemeire kandi kutahikire. Hati naagira ati: “Kandi nkeega ngu omunyeeto orikweshunga naagira emitwarize erikwija kumuremesa kuba murungi omu bushwere. Nkatandika kuteekateeka aha biro by’omumaisho naataaha omu bushwere, oku omukazi wangye araateekateekye naayeshunga n’omukazi ondiijo. Eki kikampwera kumanya ngu omuze ogu n’ogw’akabi. Ahabw’okugira ngu kyorobi kukikora tikirikumanyisa ngu kihikire.” Samuel akahindura aha mitwarize ye. Okwetantara okweshunga kimuhwereire kwetantara n’eby’obushambani.

Antonio akaba ari omu kabi k’amaani akarikukira n’obushambani. Akaba aine omuze gw’okureeba ebirikwitsya enshoni. N’obu araabe yaabaire ari omu bushwere n’omukazi ou yaabaire naakunda munonga, omuze ogwo gukaba gumuremeireho. Naagira ngu okuteekateeka aha biri omu 1 Petero 5:8 kikamuhwera buzima. Nihagira hati: “Mwerinde; mugume nimureeba. Sitaane omuzigu waanyu naashooba nk’entare erikutsinda, naasherura ou araarye.” Antonio naagira ati: “Ebishushani ebirikwitsa enshoni ni bingi omu nsi egi, kandi ebishushani ebi nibibaasa kuguma omu biteekateeko. Omushororongo ogu buzima gukampwera kuteekateeka aha bukomooko bw’okwohibwa oku. Nkeega kurahuka kwijuka ngu ebishushani ebirikwitsa enshoni ebyo nibiruga aha Muregi. Hati nimmanya ngu Yehova niwe wenka orikubaasa kumpwera ‘kuguma nindeeba’ kugira ngu ndwanise ebirikutaahirira ebiteekateeko byangye, omutima gwangye n’obushwere bwangye.” Antonio akatunga obuhwezi obu yaabaire naayetenga, kandi akarugaho yaasingura omuze gwe. Kandi eki kimuhwereire n’okwetantara emirabanamu endiijo.

Buzima, Baibuli neeha obuhabuzi oburikukora oburikubaasa kutuhwera kwetantara oburemeezi bw’amaani. Kandi shi oburemeezi obwatsimbire emizi oburikureebeka nk’obutarikubaasa kurugaho? Ka tureebe oku Ekigambo kya Ruhanga kirikubaasa kutuhwera kubusingura.