3 Neetuhwera Kwemera Oburemeezi

ENDWARA EZITARIKUKIRA

Rose naagira ati: “Nyine endwara y’akarondo erikundeetera obusaasi bwingi obutarikutuuza. Amagara gangye nigeeyongyera kusiisikara.” Ekyabaire nikikirayo kumwerarikiriza n’okugira ngu obumwe akaba atarikubaasa kuta omutima aha kwega Baibuli n’ebindi ebiine akakwate n’okuramya kwe. Kwonka akahwerwa munonga ebigambo bya Yesu ebiri omuri Matayo 19:26, aharikugira hati: “Ahari Ruhanga byona nibibaasika.” Rose akeega ngu hariho emiringo mingi y’okwegamu. Ahabw’okugira ngu obusaasi bwe obumwe bukaba bumuremesa kushoma, akatandika kuhurikiza Baibuli n’ebitabo ebikwatsirwe omu maraka.a Naagira ati: “Ku ogire ngu omuringo ogu tiguriho, tindikumanya yaaba naakubaasize kuguma mpami omu by’omwoyo.”

Rose ku arikugira enaku ahabw’okutabaasa kukora ebi yaabaire naakora, naahuumurizibwa ebigambo ebiri omu 2 Abakorinso 8:12, ebirikugira biti: “Ahu okukunda kuri, nikwikirizibwa nk’oku omuntu aine, ti nk’oku ataine.” Ebigambo ebyo nibiijutsya Rose ngu Ruhanga naasiima ebi arikukora, ahakuba naakora kyona eki arikubaasa kuhikaana n’obweremwa bwe.

OBUSAASI BW’OKUFEERWA

Delphine owaaba yaagambirweho, naagira ati: “Muhara wangye w’emyaka 18 ku yaafiire, nkagira obusaasi bwingi naahika n’aha kuteekateeka ngu tindikubaasa kuguma mpuriire. Buri kimwe kikahinduka.” Kwonka akatunga okuhuumurizibwa omu bigambo ebiri omuri Zaaburi 94:19, ahu omuhandiiki wa Zaaburi yaagambire ahari Ruhanga ati: “Ku nteekateeka bingi, naayemereza omutima, okuhuumuriza kwawe kugwisa gye amagara gangye.” Naagira ati: “Nkashaba Yehova kumpwera kutunga eby’okukora ebirikwikaikanisa obusaasi bwangye.”

Akaguma naayejumba omu murimo gw’okuhwera abandi. Ku haahingwireho obwire, akatandika kwegyeragyeranisa n’ebirangi by’okuhuugisa, n’obu birikuba bihendekire nabwo nibihuuga. Nikyo kimwe, n’obu araabe naayehurira nk’ohendekire, akeega ngu nabwo naabaasa kuhwera abandi. Naagira ati: “Nkamanya ngu okukoresa emisingye ya Baibuli n’okukoresa Ebyahandiikirwe omu kuhwera abeegi bangye ba Baibuli, nigwo omuringo ogu Yehova arikukoresa kumpuumuriza.” Akahandiika amaziina ga bamwe abarikugambwaho omu Baibuli abaarabire omu busaasi bw’amaani. Akashanga ngu boona bakaba nibakunda okushaba. Kandi akamanya ngu kubaasa kwemera buremeezi bwe aine kushoma Baibuli.

Okweyegyesa Baibuli kihwereire Delphine kumanya ekindi kintu, okuta omutima aha by’omumaisho beitu bitari by’enyima. Amatsiko agarikugambwaho omu Ebyakozirwe 24:15 nigamuhuumuriza ngu nihaija kubaho “okuzooka kw’abahikiriire n’abatahikiriire.” Aine buhame ki ngu Yehova naija kuzoora omuhara? Delphine naagarukamu ati: “Niinteera akashushani ndikureeba muhara wangye omu biro by’omumaisho. Nyine obuhame ngu ninyija kugaruka kureeba muhara wangye omu bwire obu Yehova ataireho. Nnindeeba gye ndi nawe omu musiri gwaitu nk’obu naamureeba aherize kuzaarwa nkamukunda.”