Waaba Oine Endwara y’Amaani

“Ku naamanyire ngu nyine ekookoro y’omu kihaha n’omu rura rwa kitiiri, nkamanya ngu hati naaza kufa. Kwonka ku naahikire omuka bwanyima y’okureeba omushaho, nkateekateeka nti: ‘Buzima eki naaba ntakyeteekateekiire, kwonka nyine kureeba oku ndaakyemere.’”—Linda, ow’emyaka 71.

“Nyine endwara erikusharaza omushaya gumwe ogwa bumosho erikundeetera obuhurizi bwingi. Obumwe, obusaasi obu ndikuba nyine nibundeetera amaganya maingi. Kaingi ninyehurira nk’otsigirweho, kandi nteekateeka n’aha kweita.”—Elise, ow’emyaka 49.

Omushaija omurwaire ari omu kagaari ayetooroirwe abakundwa

WAABA oine endwara y’amaani nari omukundwa waawe yaaba niwe agiine, ekyo buzima nikireeta amaganya maingi. Oyihireho endwara yaawe nooba nooteganisibwa n’enyehurira. Okukora entebeekanisa y’okureeba omushaho nikireeta amaganya, kigumire kutunga obujanjabi nari kubushashurira, kandi n’emibazi neereeta oburemeezi. Omuntu orikuba aine endwara y’amaani naabaasa kurengwa amaganya.

Nitubaasa kwiha nkahi obuhwezi? Baingi bareebire ngu okuhuumurizibwa okurikukirayo nikuruga omu kwesiga Ruhanga kurabira omu kushaba n’okushoma Ekigambo kye Baibuli. Obuhwezi obundi nibubaasa kuruga omu banywani n’abanyabuzaare.

OKU ABAMWE BABAASIZE KUGUMISIRIZA

Robert ow’emyaka 58 naagira ati: “Omu kurwara kwawe ta amatsiko gaawe omuri Ruhanga, naija kukuhwera kugumisiriza. Shaba Yehova. Mumanyise oku orikwehurira. Mushabe kukuha omwoyo gurikwera. Mushabe kukuhwera kugira emiteekateekyere mirungi, ogumye ab’omu ka yaawe, kandi ogume oikaikaine waaba noogumisiriza endwara yaawe.”

“Nikihwera munonga ab’omu ka yaawe baamanya enyehurira zaawe, kandi bakakuhwera. Buri izooba omwe nari babiri nibanteerera esimu barikumbuuza ngu, ‘Ori ota?’ Abanywani abarikuruga omu myanya etari emwe n’emwe nibangumya. Buzima ekyo nikindeetera kwehurira gye kandi nikimpwera kugumisiriza.”

Waaba oine munywani waawe arwaire, yetegyereze eki Linda arikugamba: “Omurwaire hatariho kubangaanisa naaba atarikwenda baamutwarize nk’ori kubi munonga, kandi naabaasa kutenda kugaaniira aha ndwara ye buri kaire. N’ahabw’ekyo teeraho kugaaniira nawe aha nshonga ezindi.”

Ahabw’obuhwezi bwa Ruhanga, Ebyahandiikirwe, abanywani, n’abanyabuzaare, nitubaasa kugira obuhame ngu n’eky’omugasho kuguma ohuriire, n’obu waakuba oine endwara y’amaani.

Ebyahandiikirwe Ebirikubaasa Kukuhwera

Yesigye Ruhanga.

“Nkasherura Mukama, yaangarukamu, yankiza ebyabaire nibintiinisa byona. Enshoberwa egi ekatakira Mukama, yaagihurira.”—Zaaburi 34:4, 6.

Linda, orikugambwaho enyima naagira ati: “Tindikushaba ngu, ‘ompwere kuba gye.’ Butoosha ninshaba ngu, ‘ompwere kuhama, kandi ompwere kwemera endwara yangye.’”

Gumibwa Ekigambo kya Ruhanga.

‘Tihaine mutuuzi waayo orikwija kugira ati: Ndwaire.’—Isaaya 33:24.

Teekateeka aha bi Ruhanga arikuraganisa kutuha omu biro by’omumaisho, kikuhwere kugumisiriza.

Shaba ab’eka yaawe n’abanywani bakuhwere.

“Munywani w’omuntu amukunda ebiro byona, kandi ow’eishe-emwe azaarirwa okuhwera abantu omu bihikiirizi.”—Enfumu 17:17.

Elise orikugambwaho enyima naahabura ati: “Reka kwetaanisa aha bandi. Yikiriza banywani baawe bakuhwere. Haine obu orikubaasa kuhurira nk’ori wenka kandi okateekateeka ngu Ruhanga tarikukufaho, kwonka otakaayetaanisa aha bandi.”