Akakwatsibwa Eky’Obutungi
1 Entumwa Paulo akaba naatwara omurimo gw’okubuurira ogu yaahairwe Ruhanga nka mukuru munonga, kandi akagweta “obutungi.” (2 Kor. 4:7) Akeemera oburemeezi n’okuhiiganisibwa omu kukora omurimo ogwo. N’age goona, akabuurira buri omwe ou yaabaire ashanga. Akagyenda engyendo ndaingwa nyingi aha butaka n’aha nyanja, ezaabaire zigumire kandi ziri ez’akabi. Nitubaasa kutooreza tuta Paulo kandi tukooreka ngu nitukunda omurimo gwaitu ogw’okubuurira? (Rom. 11:13) N’enki ekirikutuma omurimo gwaitu ogw’okubuurira gwaba eky’obutungi ekirikukirayo?
2 Eky’Obutungi Ekirikukirayo: Obutungi bw’ensi egi emirundi mingi nibureetera omuntu kwemereza omutima kandi ebirungi ebirikuburugamu tiby’obutwire. Kwonka, omurimo gwaitu ogw’okubuurira nigutureetera ebirungi ebitarihwaho, itwe hamwe n’abandi. (1 Tim. 4:16) Niguhwera abantu ab’emitima egororokire okumanya Yehova, okukora empindahinduka ezirikwetengyesa omu magara gaabo, n’okugira amatsiko aga buzima, nigo ag’okutunga amagara agatahwaho. (Rom. 10:13-15) Ku turikutwara omurimo gwaitu ogw’okubuurira nk’ekintu kikuru munonga, nitugira ekigyendererwa omu magara, okumarwa, n’amatsiko gahamire aha biro by’omu maisho.—1 Kor. 15:58.
3 Yoreka Ngu Okubuurira Nookutwara nka Kukuru: Oku turikutwara ekintu nk’eky’omuhendo, emirundi mingi nikureebekyera omu bi tweteekateekire kwefeereza ahabwakyo. Ka n’omugisha gw’amaani okukoresa obwire bwaitu n’amaani gaitu kuhimbisa Yehova! (Efe. 5:16, 17) Oku turikukoresa obwire bwaitu kushemereire kworeka ngu nitutwara eby’omwoyo nka bikuru okukira eby’omubiri. Obu twine ekintu ky’omuhendo eki tushemereire kumanyisa n’abandi, nitwenda kubuurira n’omuhimbo kandi tweteekateekye kukoresa buri kagisha koona okubuurira amakuru marungi.
4 Ebintu eby’obuguzi bwingi tibirikukira kusherekwa, kureka nibiteebwa ahu abandi barikubaasa kubireeba. Twaba nitutwara obuheereza bwaitu nk’eky’obutungi, nitwija kubwebembeza omu magara gaitu. (Mat. 5:14-16) N’emitima eijwire okusiima, butoosha ka tutooreze entumwa Paulo kandi tukorese buri kagisha koona okworeka ngu buzima omurimo gwaitu ogw’okubuurira nitugutwara nk’eky’obutungi.