Obuheereza Bwawe Butware nk’Omugisha gw’Omuhendo

1. Abantu baingi omu nsi nibareeba bata omurimo gwaitu gw’okubuurira?

¹ Abantu baingi omu nsi ya Sitaane nibareeba omurimo gwaitu gw’okubuurira kuba “obushema.” (1 Kor. 1:18-21) Twaba tutegyendesereize, emiteekateekyere egi egwire neebaasa kutumaramu amaani nari etuubye aha bweziriki bwaitu. (Enf. 24:10; Isa. 5:20) Ni nshonga ki ezishemereire kutureetera kutwara omugisha gwaitu gw’okuba Abajurizi ba Yehova nk’ogw’omuhendo?—Isa. 43:10.

2. Ahabw’enki okubuurira kurikubaasa kwetwa omurimo ogurikwera?

² Omurimo Ogurikwera: Entumwa Paulo akooreka ngu okubuurira n’omurimo gurikwera arikugugambaho nk’omurimo gw’obunyamurwa, obwo arikumanyisa ebyo ebi turikukorera Ruhanga. (Rom. 15:15, 16) Ni mu muringo ki ogu okubuurira kuri omurimo ogurikwera? Twayejumba omu kubuurira nituba ‘abakozi abarikukora kumwe’ n’Ogwo “Orikwera,” Yehova, kandi nituhwera omu kweza eiziina rye. (1 Kor. 3:9; 1 Pet. 1:15) Yehova naareeba okubuurira kwaitu ‘nk’ekitambo ky’okusiima,’ n’ahabw’ekyo okubuurira n’ekintu kikuru omu kuramya kwaitu.—Heb. 13:15.

3. Niki ekirikureetera omurimo gw’okubuurira amakuru marungi kuba ogw’ekitiinisa?

³ Okubuurira amakuru marungi n’omurimo gw’ekitiinisa ogutarikukorwa baingi. Baamaraika bakaashemereirwe kukora omurimo ogwo kandi hatariho kubangaanisa bakaagukozire gye munonga. (1 Pet. 1:12) Kwonka, Yehova atooraine itwe abantu abatahikiriire, abari ‘nk’enyabya z’eibumba’ kuba niitwe twakora omurimo ogu ogw’ekitiinisa!—2 Kor. 4:7.

4. Nitubaasa kworeka tuta ngu nitutwara okubuurira nk’ekintu kikuru?

⁴ Ba Nigwo Waayebembeza: Ahabw’okugira ngu nitusiima omugisha ogutuhairwe, nitutwara okubuurira nka kimwe aha ‘bintu ebirikukira obukuru’ omu magara gaitu. (Fil. 1:10) N’ahabw’ekyo, nitukora entebeekanisa buri saabiiti kugira ngu tutungye obwire bw’okwejumba omu kubuurira. Omweshongozi orikukunda omurimo gwe gw’obweshongozi naayetebeekanisa gye buri kuza kweshongora kandi ateeraho kureeba ngu yaaguma naaboneza omu ku arikweshongora. Nikyo kimwe, niitwe twine kutebeekanisa gye tutakagiire kubuurira kugira ngu tubaase ‘kushoboorora gye ekigambo ky’amazima,’ kandi twine kuteeraho kuboneza n’omu muringo ogu ‘turikwegyesamu.’—2 Tim. 2:15; 4:2.

5. Okubuurira kwaitu nikusiimwa oha?

⁵ Otaikiriza emiteekateekyere y’abatarikusiima okubuurira kwaitu kukumaramu amaani. Ijuka ngu omu kicweka kyaitu hakirimu baingi abarikusiima twazayo kubabuurira. Kwonka, ekigyendererwa kyaitu tikwenda kusiimwa abantu. Ekikuru munonga n’oku Yehova arikureeba obuheereza bwaitu kandi naasiima okuteeraho kwaitu n’obweziriki.—Isa. 52:7.