Otakaayebwa Abo Abagarukire Enyima omu by’Omwoyo
1. Ahabw’enki tushemereire kufayo kuhwera abo abagarukire enyima omu by’omwoyo?
1 Hariho ou orikumanya ogarukire enyima omu by’omwoyo? Obundi naabaasa kuba atakiija mu nteerane z’ekibiina. Noobaasa kuba oshangire omuntu nk’ogwo obu obaire noobuurira enju aha ndiijo. Tushemereire kuguma nitwijuka ngu omuntu ogwo naba akiri ow’eishe-emwe mutaahi waitu. Nitwenda ngu tumworeke ngu nitukimukunda kandi tumuhwere kugaruka omu kibiina hamwe n’aha ‘muriisa kandi omureeberezi w’amagara gaitu.’—1 Pet. 2:25.
2. Ogarukire enyima omu by’omwoyo, nitubaasa kumugaruramu amaani tuta?
2 Tworekye Ngu Nitumufaho: Okumuteerera esimu nari okumutaayaayira nikibaasa kworeka omuntu ogwo ogarukire enyima omu by’omwoyo ngu titukamwebirwe. Nitubaasa kumugambira ki? Nitubaasa kumugaruramu amaani turikumumanyisa ngu tubaire nitumuteekateekaho. Ganiira nawe aha bintu ebirungi kandi ebirikwombeka. (Fil. 4:8) Nitubaasa kugamba aha kintu ekitushemeize omu ruteerane oru tuheerize. Nitubaasa kumweta kwija omu ruteerane rw’ekibiina orurikukurataho nari oruteerane oruhango kandi tumumanyise ngu nituza kumukwatira ah’okushutama nari kumuhwera omu by’engyenda.
3. Munyaanyaziitwe omwe akahwerwa ata kugarukamu amaani omu by’omwoyo?
3 Munyaanyaziitwe owaabaire agarukire enyima omu by’omwoyo kumara emyaka erengire omuri 20 eizooba rimwe bakamugwaho barikubuurira. N’obu araabe yaabaire atarikwenda kushomesibwa Baibuli, munyaanyaziitwe owaamugwireho akaguma naamutaayaayira, arikumuha zaamagaziini ensya. Bwanyima y’oruteerane oruhango, munyaanyaziitwe akaganiiraho n’ogwo owaabaire agarukire enyima omu by’omwoyo aha bikuru ebyagambirweho omu ruteerane orwo, nabwanyima yaagarukamu amaani omu by’omwoyo.
4. Tushemereire kutwariza tuta ow’eishe-emwe orikugaruka kwija omu nteerane?
4 Ow’Eishe-emwe Ku Arikugaruka: Ow’eishe-emwe obaire ogarukire enyima omu by’omwoyo ku arikutandika kugaruka kwija omu nteerane, tushemereire kumutwariza tuta? Yesu akatwariza ata abeegi be ku baamuhungireho? Akabeeta “bagyenzi be” kandi yaabooreka ngu naabeesiga. Kandi akabaha n’omurimo mukuru. (Mat. 28:10, 18, 19) Bwanyima y’obwire bukye bakaba nibabuurira amakuru marungi ‘batarikureka.’—Byak. 5:42.
5. Yoreka obu turikwetenga kwebuuza aha abareeberezi b’ekibiina aha bikwatiraine n’ow’eishe-emwe ogarukire enyima omu by’omwoyo.
5 Tutakatandikire kushoma Baibuli n’omuntu ogarukire enyima omu by’omwoyo nari okushaba ow’eishe-emwe omazire obwire bwingi atarikubuurira kugyenda naitwe kubuurira, tushemereire kubanza twayebuuza aha bareeberezi b’ekibiina. Twashanga ow’eishe-mwe ogarukire enyima omu by’omwoyo omu kicweka ki turikubuuriramu, tushemereire kumanyisa abareeberezi b’ekibiina kugira ngu bamuhe obuhwezi oburikwetengyesa.
6. Ni kushemererwa kwa muringo ki oku turikubaasa kutunga ahabw’okuhwera abo abagarukire enyima omu by’omwoyo?
6 Nk’oku Baibuli buzima erikworeka, abo bonka abarikugumisiriza kuhitsya aha muheru nibo barijunwa. (Mat. 24:13) N’ahabw’ekyo, sherura abo abagarukire enyima omu by’omwoyo nari abaateishukire. N’okugumisiriza, ku turikworeka rukundo nk’eya Yehova turikufayo ahari abo abagarukire enyima omu bw’omwoyo, nitubaasa kugira okushemererwa okurikuruga omu kureeba nibagaruka kutwegaitaho omu kuheereza Ruhanga.—Luka 15:4-10.