Noobaasa Kuhiga Ow’eishe-emwe Otakibuurira

Aha Rwakabiri, Apuri 11, Abakristaayo baingi abatakibuurira nibaija kwija aha Kiijutsyo. Bakatandika kwiruka orugyendo rw’amagara agatahwaho kwonka bahweiremu amaani ahabw’enshonga zitari zimwe na zimwe, zimwe ahari ezo nizigambwaho omu katabo Return to Jehovah. (Heb 12:1) Kwonka, abatakibuurira nibaguma bari ab’omuhendo ahari Yehova, ahakuba akabagura n’eshagama y’Omwana we. (Byak 20:28; 1Pet 1:18, 19) Nitubaasa kubahwera tuta kugaruka omu kibiina?

Abareeberezi omu kibiina nibateeraho kusherura n’okuhwera abatakibuurira nk’oku omuriisa arikusherura entaama erikuba ebuzire. (Luk 15:4-7) Eki nikyoreka ngu Yehova naatukunda kandi naatufaho. (Yer 23:3, 4) Twena hamwe, beitu batari bareeberezi bonka, nitubaasa kuhiga abantu nkabo. Okuteeraho kwaitu kugirira abandi embabazi nikishemeza Yehova kandi nikirugamu ebirungi. (Enf 19:17; Byak 20:35) N’ahabw’ekyo, teekateeka aha muntu ou orikubaasa kugaruramu amaani, kandi okikore ahonaaho!

MUREEBE VIDIYO TEERAHO KUHIGA ABATAKIBUURIRA, REERO MUHIKAANISE EBITEEKATEEKO AHA BIBUUZO EBI:

• Abbey akakora ki obu yaabugana Omujurizi wa Yehova ou yaabaire atarikumanya?

• Ahabw’enki tushemereire kuhikiirira Abareeberezi twaba nituteekateeka kuhwera omuntu otakibuurira?

• Abbey akatebeekanisa ata kutayaayira Laura omurundi gwa kabiri?

• Abbey akooreka ata okumaririra, okugumisiriza, na rukundo obu yaabaire naateeraho kuhiga Laura?

• Nitubaasa kwegyera ki aha ky’okureeberaho eki Yesu yaakoreise ekirikushangwa omu Luka 15:8-10?

• Ni migisha ki eyarugiremu bwanyima y’okuteeraho kukwatanisa kuhwera Laura?