“Mugume Mukore Mutyo Okuunyijukiraho”
Okufa kwa Yesu Nikwija Kwijukwa Apuri 2
1. Ahabw’enki Apuri 2, 2007, kiri ekiro kikuru?
1 Apuri 2, 2007, obukaikuru bw’abantu omu nsi yoona nibaija kwerundaana kwijuka okufa kwa Yesu. Yesu akafa ahabw’okushemba obutegyeki bw’Ishe ow’omu iguru, yaaha obuhame ngu Sitaane Omuregi akabeiha obu yaagira ngu abantu nibaheereza Ruhanga ahabw’okwesherurira ebyabo. (Yobu 2:1-5) Kyakiro ya Mukama Waitu kandi hoona netwijutsya ngu kurabira omu kufa, Yesu nk’omuntu owaabaire ahikiriire, ‘akahayo amagara ge okucungura baingi.’ (Mat. 20:28) N’ahabw’ekyo, Yesu akaragiira abeegi be ati: “Mugume mukore mutyo okuunyijukiraho.” (Luka 22:19) Okusiima ekiconco kya Ruhanga eki eky’omutaano, kwakureeteire kutandika kukora entebeekanisa z’okwijuka ekikorwa kya rukundo eki ekirikukirayo?—Yoh. 3:16.
2. Nitubaasa kutebeekanisa omutima gwaitu tuta ahabw’Ekiijutsyo?
2 Tebeekanisa Omutima Gwawe: Twayetegyereza ebyabaireho ahari buri kimwe omu biro bya Yesu ebyahererukireyo omu magara ge ag’obuntu, nitubaasa kutebeekanisa omutima gwaitu ahabw’Ekiijutsyo ekyo. (Ezr. 7:10) Okutuhwera omuri eki, entebeekanisa y’omutaano ey’okushoma Baibuli neebaasa kushangwa omu katabo Examining the Scriptures—2007 hamwe n’ahari 2007 Calendar. Okushoma oku kutebeekanisiibwe kubaho aha biro ebirikukwatagana gye n’ebiro obu ebintu ebikwatiraine n’okufa kwa Yesu byabaho. Amazooba hamwe n’ebiro ebirikugambwaho omu Byahandikirwe, nibiruga ahari karenda y’Abayudaaya, erikubara ebiro kuruga aha kurenga kw’eizooba kuhika aha kurenga kw’erindi. Entaaniso egi omu kubara amazooba ekateekateekwaho omu kukora entebeekanisa egi ey’okushoma Baibuli omu bwire bw’Ekiijutsyo. Okushoma Baibuli okwo hamwe n’okucumitiriza ahari rukundo mpango ya Ruhanga nibiija kutuhwera kugasirwa munonga Ekiijutsyo ekyo.
3. Nitubaasa kuhwera tuta abarikukunda amazima hamwe n’abo abagarukire enyima omu by’omwoyo kugasirwa Ekiijutsyo?
3 Yeta n’Abandi Babeho: Akapapura ak’omunda ya Obuheereza bwaitu obw’Obukama aka Febwari kakagamba ahari kampeyini y’omutaano ey’okweta abantu aha mukoro ogu omukuru. Waakozire entebeekanisa okwejumba omuri kampeyini egi omu bwijwire? Waahandikire abu orikwenda kweta, kandi waatandikire kubahikaho? Kora entebeekanisa kwija kare aha eizooba ry’Ekiijutsyo kugira ngu obaase kwakiira abu oyetsire hamwe n’abandi abaraije. Noobaasa kwenda kushutama nabo kuhamya ngu baatunga Baibuli n’akatabo k’ebyeshongoro. Yanjurira ab’omu kibiina abantu abo. Bwanyima y’Ekiijutsyo kuhwa, teeraho kugarukamu ebibuuzo ebi baakuba baine. Beete kwija kuhurikiriza orubazo oruraije kuheebwa Apuri ebiro 15. Abareeberezi b’ekibiina nibaija kufayo okureeba ngu baayeta ab’eishe-emwe abagarukire enyima omu by’omwoyo kwija aha Kiijutsyo hamwe n’aha rubazo orw’omutaano.
4. Nitubaasa kuhwera tuta abantu kuhama omu by’omwoyo bwanyima y’Ekiijutsyo?
4 Hwera Abasya n’Abagarukire Enyima Kuhama omu by’Omwoyo: Oraahe orubazo aha Kiijutsyo, omu bigufu naija kushoborora aha ntebeekanisa y’okushomesa abantu Baibuli kandi ahige abasya abaija kugumizamu barikwega ahari Yehova. Noobaasa kukoresa ebi omugambi araagambe kwongyera kuha abu oraayete obuhwezi omu bw’omwoyo. Baaba batakatandikire kushoma Baibuli, teeraho kubataayaayira Ekiijutsyo kiherize kuhwa kandi oboorekye oku barikubaasa kushomesibwa Baibuli. Okubaasa kweyongyera kuhama omu by’omwoyo, nikiija kubetengyesa okuza omu nteerane z’ekibiina. (Heb. 10:24, 25) Oine eki omu biteekateeko, bahige kutandika kuza omu nteerane butoosha. Abareeberezi b’ekibiina bashemereire kukora entebeekanisa kutaayaayira Abakristaayo abagarukire enyima omu by’omwoyo abaizire aha Kiijutsyo n’okubahwera kwongyera kuteekateeka aha byagambirweho omu rubazo. Eki nikibaasa kubahwera kugaruka kwejumba omu buheereza.
5. Okubaho aha kwijuka okufa kwa Yesu nikwija kutugasira kuta?
5 Okubaho aha Kiijutsyo nikituha omugisha gw’okucumitiriza aha ki Yehova na Yesu batukoreire. Okucumitiriza okwo nikwongyera ahari rukundo ei tubainiire kandi kutureetera kuhindura aha mitwarize yaitu. (2 Kor. 5:14, 15; 1 Yoh. 4:11) Obu nibwo bwire itwe hamwe n’abarikukunda amazima kutandika kwetebeekanisiza omukoro ogu omukuru ogurikutubaasisa ‘kurangirira okufa kwa Mukama.’—1 Kor. 11:26.