“Mugume Mukore Mutyo”
Ekiijutsyo Nikiija Kubaho Apuri 5
1. Ahabw’enki omukoro gw’Ekiijutsyo guri mukuru munonga?
1 “Mugume mukore mutyo okuunyijukiraho.” (Luk. 22:19) Omu bigambo ebi, Yesu akaragiira abakuratsi be kuguma nibaijuka okufa kwe. Ahabw’ebi ekitambo kyabaasiise kubaho, Ekiijutsyo nigwo mukoro mukuru kandi ogw’omuhendo aha Bakristaayo. Obu Ekiijutsyo ky’omwaka ogu kiri haihi kubaho Apuri 5, nitubaasa kworeka tuta ngu nitusiima Yehova?—Kol. 3:15.
2. Nitubaasa kukora ki kworeka okusiima kwaitu ahabw’Ekiijutsyo?
2 Okwetebeekanisa: Butoosha nitwetebeekanisiza ebintu ebi turikutwara nka bikuru. Nitubaasa kwetebeekanisiza Ekiijutsyo nk’eka turikwega hamwe kandi tukateekateeka munonga aha byabaireho omu biro bya Yesu ebyahererukireyo omu nsi. (Ezr. 7:10) Ebyahandiikirwe ebimwe ebirikukwata aha kufa kwa Yesu biri aha karenda n’omu katabo Examining the Scriptures Daily, kandi ebindi n’eshuura z’akatabo Greatest Man ezirikubishoboororaho, biri omu Watchtower eya Febwari 1, 2011 orupapura 23-24.
3. Aha bikwatiraine n’okubuurira nitworeka tuta ngu nitusiima Ekiijutsyo?
3 Okubuurira: Kandi nitubaasa kworeka okusiima kwaitu turikwejumbira kimwe omu kubuurira. (Luk. 6:45) Kampeyini y’okweta abantu aha Kiijutsyo eraabeho omu nsi yoona neija kutandika Orwamukaaga, Maaci 17. Noobaasa kwetebeekanisa gye kugira ngu oyejumbire kimwe omu kubuurira, obundi orikuba payoniya omuhwezi. Nimubaasa kukigaaniiraho nk’eka omu Kuramya okw’Eka okuraakurateho.
4. Nitubaasa kugasirwa tuta twabaho aha Kiijutsyo?
4 Ka nitugasirwa munonga ahabw’okubaho aha Kiijutsyo buri mwaka! Twateekateeka aha ku Yehova yaayefeerereize akahayo Omwana we omwe nyamunegyere nk’ekitambo, nitweyongyera kushemererwa n’okumukundira kimwe. (Yoh. 3:16; 1 Yoh. 4:9, 10) Eki nikituhiga kutabaho ahabwaitu twenka. (2 Kor. 5:14, 15) Kandi nikituhiga kwongyera kumanyisa abandi ebirikukwata ahari Yehova. (Zab. 102:19-21) Buzima, abaheereza ba Yehova twine ekihika ky’okuba aha Kiijutsyo ekiraabeho Apuri 5 ekiraatuhwere kworeka ngu nitwijuka ‘okufa kwa Yesu.’—1 Kor. 11:26.