N’Okushemererwa Yetebeekanisize Ekiijutsyo
1. Obwire bw’Ekiijutsyo nibutubaasisa kukora ki?
1 Ekiijutsyo ekiraabeho Maaci, Orwakabiri 26, nikiija kutubaasisa kworeka ngu twine okushemererwa ahabw’entebeekanisa ei Ruhanga yaataireho kutucungura. (Isa. 61:10) Okushemererwa okwo nikwija kutuhwera kwetebeekanisa gye Ekiijutsyo kitakabaireho. Mu muringo ki?
2. Niki ekirikutuhiga kwetebeekanisiza gye omukoro gw’Ekiijutsyo?
2 Yetebeekanisize Ekiijutsyo: Omukoro gw’Ekiijutsyo n’obu guraabe gutarikwetengyesa ebintu bingi, ni mukuru munonga. N’ahabw’ekyo tushemereire kureeba ngu twatebeekanisa gye byona ebirikwetengyesa. (Enf. 21:5) Tushemereire kutebeekanisa gye kugira ngu gubeho omu shaaha ezihikire n’omu mwanya murungi. Tushemereire kutunga omugaati na viinyo ebihikire. Omwanya oguraabemu Ekiijutsyo gushemereire kubonezibwa gye. Otoorainwe kuha orubazo aine kutebeekanisa gye, kandi abaraatooranwe kurabyamu omugaati na viinyo n’abarikwakiira abagyenyi baine kuba nibamanya eki baine kukora. Hatariho kubangaanisa bingi ahari ebyo byakozirwe. Okusiima ekitambo nikutuhiga kwetebeekanisiza gye omukoro gw’Ekiijutsyo.—1 Pet. 1:8, 9.
3. Nitubaasa kutebeekanisa tuta emitima yaitu ahabw’omukoro gw’Ekiijutsyo?
3 Tebeekanisa Omutima Gwawe: Ni kikuru kutebeekanisa gye emitima yaitu kugira ngu tubaase kwetegyereza gye omugasho gw’Ekiijutsyo. (Ezr. 7:10) N’ahabw’ekyo tushemereire kugira obwire tukashwijuma Ebyahandiikirwe ebirikukwata aha Kiijutsyo kandi tukateekateeka munonga aha byabaireho Yesu ari hakye kwitwa. Okuteekateeka munonga aha kwefeerereza kwa Yesu nikiija kutuhiga kumutooreza.—Gal. 2:20.
4. Ni mugasho ki ogw’ekitambo ogurikukirayo kukureetera okushemererwa?
4 Kristo okwikiriza kufa nikyoreka ngu Yehova niwe ahikire kutegyeka byona. Nikituhwera kucungurwa kuruga omu kibi n’okufa. (1 Yoh. 2:2) Nikitubaasisa kugaruka kugira omukago murungi na Ruhanga n’okugira amatsiko g’amagara agatahwaho. (Kol. 1:21, 22) Kandi nikituhwera kuguma tumaririire kukora ebirikuhikaana n’okwehayo kwaitu ahari Yehova n’okuguma turi abakuratsi ba Kristo. (Mat. 16:24) Nitukwendeza kweyongyera kushemererwa waaba nooyetebeekanisa kuba aha Kiijutsyo.