Oyetebeekanisiize Ekiijutsyo?

Ekaba eri Nisani 13 ogwa 33. Yesu akaba naamanya ngu atsigaizeyo omwabazyo gumwe kuba hamwe na banywani be haza akaitwa. Akaba aine kurya nabo Okuhingurwaho okw’ahamuheru kandi akataho omukoro omusya, Ekiihuro kya Mukama Waitu. Omukoro ogwo buzima gukaba gwine kutebeekanisibwa. N’ahabw’ekyo, akoheereza Petero na Yohaana kutebeekanisa. (Luk. 22:7-13) Kuruga obwo buri mwaka, kitwire kiri kikuru aha Bakristaayo kutebeekanisiza Ekiijutsyo. (Luk. 22:19) Ni bintu ki ebikuru ebi twine kukora kutebeekanisiza Ekiijutsyo ekirabeho Apuri 3?

Ebi Abareeberezi Baine Kutebeekanisa:

Mukore entebeekanisa kukoresa Ekyombeko ky’Obukama nari omwanya ogundi. Omwanya gushemereire kuba gwine entebe zirikumara, amataara n’obumoori. Mutebeekanise kuboneza omwanya bukiri kare.
Musherure orikubaasa kuha gye orubazo, ceyamaani, n’ab’eishe-emwe abaraashabire omugaati na viinyo.
Ebibiina ebirikurenga ahari kimwe ku biraabe nibiza kukoresa omwanya gumwe, mutebeekanise obwire obu enteerane ziraabereho, ah’okutahiraamu n’ah’okushohoorera hamwe n’omwanya gw’okwemerezamu ebiiruka.
Mutoorane ab’okwakiira abantu hamwe n’ab’okurabyamu omugaati na viinyo kandi mubagambire n’ebi baine kukora bukiri kare.
Mutebeekanise kutunga omugaati na viinyo ebishemereire, amasohaani, amagiraasi, emeeza eringaniire n’ekitambaara ky’emeeza.

Ebi Ababuurizi Baine Kutebeekanisa:

Tebeekanisa kwejumbira kimwe omu kampeyini y’okweta abantu kwija aha Kiijutsyo.
Handiika amaziina g’abeegi baawe ba Baibuli, abanyabuzaare, abu orikwega nabo aha ishomero, abu orikukora nabo, n’abandi abu orikumanya kandi obeete.
Shoma kandi oteekateekye aha byahandiikirwe eby’okushomwa omu bwire bw’Ekiijutsyo.
Ija aha Kiijutsyo oyetebeekaniise kwakiira abagyenyi.