Ka Tworekye Okusiima Kwaitu Ekiijutsyo Nikiija Kubaho Apuri 17
1. Ni nyehurira ki ey’omuhandiiki wa Zaaburi erikuhikaana n’obwire bw’Ekiijutsyo?
1 Omuhandiiki wa Zaaburi ahabw’okusiima embabazi nyingi ezi Yehova yaamugiriire n’oku yaamucungwire, akabuuza ati: “N’enki eki ndizimuurira MUKAMA, ahabw’ebirungi bye byona ebi yankoreire?” (Zab. 116:12) Obunaku obu, hariho enshonga nkuru erikureetera abaheereza ba Ruhanga kumusiima. Bwanyima y’emyaka mingi ebigambo ebyo biherize kuhandiikwa, Yehova akaha abantu ekiconco ekirikukirayo obukuru—ekitambo. Twaba nitwetebeekanisiza okwijuka okufa kwa Kristo okuraabeho Apuri 17, twine enshonga ehikire kworeka okusiima kwaitu.—Kol. 3:15.
2. Ni nshonga ki ezimwe ezirikutureetera kusiima ekitambo?
2 Emigisha y’Ekitambo: Ahabw’ekitambo nitubaasa “kusaasirwa ebibi byaitu.” (Kol. 1:13, 14) Eki nikitubaasisa kuramya Yehova n’omuntu w’omunda omurungi. (Heb. 9:13, 14) Twaba nitushaba nitubaasa kugamba na Yehova tutarikutiina. (Heb. 4:14-16) Abo abarikwikiririza omu kitambo baine amatsiko g’okutunga amagara agatahwaho.—Yoh. 3:16.
3. Nitubaasa kworeka tuta ngu nitusiima Yehova ahabw’ekitambo?
3 Oku Turikworeka Okusiima: Omuringo gumwe ogu turikworekamu okusiima kwaitu n’okushoma buri izooba Ebyahandiikirwe ebirikukwata aha Kiijutsyo kandi tukabiteekateekaho munonga. Ekicweka ky’omuri Watchtower eya Febwari 1, 2011, ekirikugira ngu “Oyeetebeekanisiize Ekiro Ekirikukirayo Obukuru omu Mwaka?” kitebeekanisiibwe kutuhwera omu kukora ekyo. Kurabira omu kushaba, nitubaasa n’okugambira Yehova oku turikusiima munonga ekitambo. (1 Tes. 5:17, 18) Okworobera ekiragiro kya Yesu tukabaho aha Kiijutsyo nikyoreka okusiima kwaitu. (1 Kor. 11:24, 25) Ekindi, nitubaasa kutooreza rukundo ya Yehova mpango twete n’abandi baingi kwija kubaho naitwe.—Isa. 55:1-3.
4. Tushemereire kumariirira kukora ki?
4 Abaheereza ba Yehova abarikusiima tibarikutwara Ekiijutsyo nk’enteerane ezindi eza butoosha. N’oruteerane orurikukirayo obukuru omu mwaka! Nk’oku Ekiijutsyo kiri haihi kuhika, ka tumariirire kugira emiteekateekyere nk’ey’omuhandiiki wa Zaaburi owaagizire ati: “Singiza MUKAMA, iwe magara gangye, kandi oteebwa ebirungi byona ebi yaakukoreire.”—Zab. 103:2.