Okworeka Okusiima ahabw’Ekiconco kya Ruhanga Ekirikukirayo Kuba eky’Omuhendo
1. Niki eki turikusiimira Yehova munonga?
1 Omu ‘biconco ebirungi’ bingi ebi Yehova atuhaire, ekitambo eki Omwana we omukundwa yaahaireyo nikyo kirikukirayo. (Yak. 1:17) Nikitubaasisa kutunga emigisha mingi, otwariiremu n’okusaasirwa ebibi byaitu. (Efe. 1:7) Nikyo butoosha turikworekyera okusiima ahabw’ekiconco ekyo. Okukira munonga omu bunaku bw’Ekiijutsyo, nituteekateeka aha kiconco ekyo eky’omuhendo.
2. Iwe n’eka yaawe nimubaasa kwongyera kusiima muta ekitambo?
2 Oku Turikubaasa Kuhwera ab’Omu Maka Gaitu Kwongyera Kusiima Ekitambo: Kubaasa kuhwera ab’omu ka yaawe kwongyera kworeka okusiima, omu saabiiti ez’enyima Ekiijutsyo kitakabaireho Maaci 30, ahabw’enki otarikukoresa obwire bw’Okuramya kw’Eka okw’omu mwabazyo mukeijutsya ebirikukwata aha kitambo? Kandi nk’eka, buri izooba muteereho kushomera hamwe Ebyahandiikirwe by’omutaano kuruga omuri Baibuli ebirikukwata aha Kiijutsyo. Iwe nk’omuntu teekateeka aha ku ekitambo kikugasiire n’oku kikukwatsireho omu ku orikureeba Yehova, oku orikwereeba, oku orikureeba abandi n’ebiro by’omumaisho. Kandi noija kushanga kirikuhwera kwegyeza omu byeshongoro bibiri ebisya ebiraakoresibwe aha Kiijutsyo, ekyeshongoro 8 na 5.—Zab. 77:12.
3. Nitubaasa kworeka tuta okusiima kwaitu ahabw’ekitambo?
3 Oku Turikubaasa Kworeka Okusiima: Okusiima ekitambo nikutuhiga kugambira abandi ebirikukwata ahari Yehova na rukundo ye mpango ei yaayorekire omu kwohereza Omwana we. (Zab. 145:2-7) Omuri Maaci, Apuri, na Mei, amaka agamwe nigooreka ngu nigasiima ekitambo garikutebeekanisa kugira ngu omwe omu ka abaase kuheereza nka payoniya omuhwezi. Ekyo kyaba kitarikubaasika, nimubaasa ‘kugura obwire’ kugira ngu mwongyere kwejumbira kimwe omu kubuurira. (Efe. 5:16) Okusiima ekitambo nikwija kutuhiga kuhwera abandi kwija kuba naitwe aha Kiijutsyo. (Kush. 22:17) Tandika kuhandiika amaziina g’abo abarikwenda kumanya ebirikukiraho, abeegi ba Baibuli, abanyabuzaare, abu orikukora nabo n’abataahi abu oraayete, kandi oteereho kwejumbira kimwe omuri Kampeyini egi ey’omutaano ey’okweta abantu aha Kiijutsyo.
4. Ni mu miringo ki ei turikubaasa kukoresamu gye obwire bw’Ekiijutsyo?
4 Obwire bw’Ekiijutsyo nibutuha omugisha gw’okworeka Yehova oku turikusiima ekiconco eki yaatuhaire itwe abantu. Twena ka tuteereho kukoresa obwire obwo, kwongyera kworeka okusiima kwaitu ahabw’ekitambo ‘n’obutungi bwona obwa Kristo obutaine bugarukiro.’—Efe. 3:8, NW.