Noija Kukoresa Omugisha Ogu?
Obwire bw’Ekiijutsyo Nibutubaasisa Kworeka Okusiima
1. Obwire bw’Ekiijutsyo nibutuha mugisha ki?
1 Ekiijutsyo ekirikuza kubaho Apuri 14 nikituha omugisha gw’omutaano kworeka okusiima kwaitu ahabw’eki Yehova yaatukoreire. Ebiri omuri Luka 17:11-18 nibyoreka oku Yehova na Yesu barikutwara okusiima. Eky’obusaasi, omwe aha babembe abaashemeziibwe niwe yaayorekire okusiima. Omu biro by’omumaisho, ekitambo ekyahairweyo nikiija kubaasisa endwara zoona kuhwaho tutungye amagara agatahwaho. Hatariho kubanganisa, obwo turyasiima Yehova buri izooba ahabw’emigisha nk’egyo. Kwonka shi nitubaasa kworeka tuta okusiima omu saabiiti eziraije?
2. Niki ekiraatuhwere kwongyera kusiima ekitambo?
2 Teeraho Kusiima: Okusiima nikutandikira omu biteekateeko. Kutuhwera kwongyera kusiima ekitambo, entebeekanisa y’omutaano ey’okushoma Baibuli omu bwire bw’Ekiijutsyo neebaasa kushangwa omu byongeirweho B12 ebiri omu New World Translation ehindwirwemu, Karenda, n’omu katabo Examining the Scriptures. Nimubaasa kubishwijuma nk’eka. Eki nikiija kwongyera kutuhwera kusiima ekitambo, kandi kituhwere kwongyera kutwaza gye.—2 Kor. 5:14, 15; 1 Yoh. 4:11.
3. Ni mu miringo ki ei turikubaasa kworekamu ngu nitusiima ekitambo omu bwire bw’Ekiijutsyo?
3 Yoreka Okusiima: Okusiima nikureebekyera omu bikorwa. (Kol. 3:15) Omushaija omubembe owaashemeziibwe akateeraho kusherura Yesu kumusiima. Hatariho kubanganisa, omushaija ogwo akagambira abandi oku yaashemeziibwe. (Luk. 6:45) Okworeka ngu nitusiima ekitambo nikiija kutuhiga kwejumbira kimwe omu kampeyini y’okweta abantu kwija aha Kiijutsyo. Okuba payoniya omuhwezi nari okwongyera aha bwire obu turikumara omu kubuurira omu bwire bw’Ekiijutsyo nagwo n’omuringo murungi gw’okworeka ngu nitusiima ekitambo. Okworeka ngu nitusiima ekitambo, nikiija kutuhiga kushemerererwa abaraije aha Kiijutsyo n’okugarukamu ebibuuzo byabo.
4. Obwire bw’Ekiijutsyo eki nitubaasa kubukoresa gye tuta?
4 Mbwenu shi Ekiijutsyo eki nikiija kuba eky’aha muheru? (1 Kor. 11:26) Titurikumanya. Kwonka nitumanya ngu Ekiijutsyo eki ku kiraahwe, omugisha gw’omutaano ogw’okworeka okusiima niguba gwahingura. Mbwenu shi omugisha ogu noija kugukoresa? Ka tuteereho kureetera Yehova okushemererwa owaatuhaire ekitambo omu bigambo n’omu biteekateeko.—Zab. 19:14.