Okwijuka Ekitambo n’Okusiima
1, 2. Ahabw’enki tushemereire kwijuka ekitambo n’okusiima?
1 Barikworobera ekiragiro kya Yesu, Abakristaayo omu nsi yoona nibaija kuteeranira hamwe aha Rwamukaaga, Maaci 22, 2008 eizooba ryaheza kurenga, okwijuka okufa kwa Yesu Kristo. (Luka 22:19; 1 Kor. 11:23-26) Nitukora ekyo twekundiire okworeka okusiima ahabw’ebyahikiiriziibwe aha kiro ekyo emyaka nka 1,975 ehingwire. Yesu ahabw’okuguma ari omwesigwa kandi akafeera aha muti omu busaasi bwingi, akeeza iziina ry’eishe, yaaha Ruhanga eky’okugarukamu Sitaane ekirungi.—Yobu 1:11; Enf. 27:11.
2 Eshagama ya Yesu eyaasheeshekire ekabaasisa endagaano ensya kubaho, kyabaasisa abantu abatahikiriire kuhinduka abaana ba Ruhanga abaine amatsiko g’okutegyeka na Kristo omu Bukama bw’omu iguru. (Yer. 31:31-34; Mako 14:24) Ekindi, Rukundo mpango ei Ruhanga ainiire abantu ekeeyoreka gye obu yaahayo Omwana we omukundwa nk’ekitambo, nk’oku Yesu we wenka yaashobororoire Nikodemu.—Yoh. 3:16.
3. Abo abaraije aha Kiijutsyo nibaija kugasirwa bata?
3 Yeta Abandi: Omu Obuheereza Bwaitu Obw’Obukama aka Jenwari, tukahaburwa kuhandika abu turikumanya kandi tukabekwatsiza obupapura bw’okubeeta aha kiijutsyo. Waatandikire kweta abo abu ohandiikire? Oriyo nootaho entebeekanisa kwejumbira kimwe omuri kampeyini y’okweta abantu aha Kiijutsyo erikwija kutandika Maaci 1? Abo abaraije aha Kiijutsyo nibaija kuhurira ebirikukwata ahari Baibuli ebirikubaasa kwombeka okwikiriza omu kitambo, okuraije kubabaasisa kutunga amagara agatahwaho.—Rom. 10:17.
4. Ahabw’enki tushemereire kwija kare aha mwanya oguraabeho Ekiijutsyo?
4 Abo boona abarikubaasa bashemereire kuteebekanisa kwija kare, n’okushemererwa bakaakiira abo abaikiriize kwija aha kiijutsyo. Ahabw’okugira ngu abarikwija aha Kiijutsyo nibaba bari baingi, ni kikuru na munonga kufayo aha basya hamwe n’abandi abarikukira kwija omu nteerane.
5. Noobaasa kutebeekanisa ota omutima gwawe ahabw’omukoro ogu?
5 Tebeekanisa Omutima Gwawe: Examining the Scriptures Daily—2008 na 2008 Calendar birimu entebeekanisa ey’omutaano ey’okushoma Baibuli omu bwire bw’Ekiijutsyo kutandika na Maaci 17. Okushwijuma ebintu bikuru ebyabaire ahari Yesu ari haihi kuruga omu nsi, nikiija kukuhwera kuteebekanisa omutima gwawe kubaho aha Kiijutsyo. (Ezr. 7:10) Okushaba n’okucumitiriza aha byabaireho ebyo ebiri omu Baibuli nikiija kutuhwera kwongyera aha kusiima kwaitu ahabwa rukundo ya Yehova n’ey’Omwana we omu kuhayo ekitambo.—Zab. 143:5.
6. Twateeraho kworeka okusiima ahabw’ekitambo nikiija kutugasira kita?
6 Obu Ekiijutsyo kiriyo nikiirira haihi, ka twetebeekanise gye kandi tuhwere n’abandi kwetebeekanisiza omukoro ogu omukuru. Okwijuka ekitambo n’okusiima nikiija kuhamya omukago gwaitu na Yehova hamwe n’Omwana we. (2 Kor. 5:14, 15) Kandi nikiija kutuhiga kubatooreza omu kworeka rukundo y’okwefeereza ahabw’abandi.—1 Yoh. 4:11.