“Okaagarukamu Ota?”
1. N’enki ekirikugumira baingi omuriitwe?
1 Nookunda Ekigambo kya Ruhanga, kwonka kikugumira okwijuka bingi ebi orikushoma omu Baibuli nari ei Ebyahandiikirwe ebimwe birikushangwa? Nooyenda ngu abaana baawe beetegyereze gye enyegyesa za Baibuli ezirikutandikirwaho? Omutwe “Okaagarukamu Ota?” oguri aha rupapura 31 omuri Awake! eya buri kwezi nigubaasa kuhwera abato n’abakuru okwetegyereza gye Ekigambo kya Ruhanga.—Byak. 17:11.
2. Ebicweka ebiri ahansi y’omutwe “Okaagarukamu Ota?” nibibaasa kukoresibwa bita?
2 Noobaasa ota kukoresa gye orupapura oru? Awake! eya Jenwari 2006 ekahabura eti: “Twara akiire oshome ebiri aha rupapura 31 . . . Ebimwe ebiri aha rupapura oru nibiija kushemeza abashomi abato; ebindi nibiija kuhwera abashomire Baibuli kumara akiire kumanya yaaba nibaijuka. Ekicweka ekirikugira ngu, ‘Bikabaho Ryari omu Byafaayo?’ nikiija kukuhwera kumanya obu abarikugambwaho omu Baibuli baabaire bariho n’obu ebintu bikuru byabaho. N’obu eby’okugarukamu eby’ekicweka ‘Ebiihirwe omu Katabo Aka’ biraije kushangwa aha mpapura zitari zimwe omu magaziini egi, eby’okugarukamu eby’ebindi bibuuzo nibiija kuba biri aha rupapura oruraije kworekwa omu katabo niko kamwe, ahu biraateebwe bicurikire. Ahabw’enki otarikusherura eby’okugarukamu ahabwawe otakabishomire aha rupapura orwo, reero bwanyima okagaaniiraho n’abandi aha bi waayega? Noobaasa n’okukoresa orupapura oru orwine omutwe ogurikugira ‘Okaagarukamu Ota?’ omu kugaaniiraho n’ab’omu maka gaanyu nari omu kuhanuura ahari Baibuli.
3. Ebiri ahansi y’omutwe “Okaagarukamu Ota?” bigasiire bita amaka agamwe, kandi ni kicweka ki ekirikukirayo kukushemeza?
3 Amaka maingi nigakunda kukoresa ebiri aha rupapura oru omu kwega kw’amaka. Omuzaire omwe naagira ati: “Nyowe n’ibanyi tukateekateeka ngu ni kirungi okwongyera ekicweka ‘Okusherura Ebishushani Okw’Abaana’ omu kushoma kwaitu nk’eka kandi eki kikashemeza munonga muhara waitu ow’emyaka eshatu. Nikitushemeza okumureeba naasherura n’ekihika omuri Awake! ye, naashuuruura buri rupapura okuhitsya obu arikubona eki arikuba naasherura.” Omuzaire omwe omuri Brazil naagira ati: “Nyowe na mutabani wangye ow’emyaka mushanju nitukunda ebiri aha rupapura oru omuri Awake! Kihweraire Moises okutaho omutima, okusherura ebyahandiikirwe, okwetegyereza eki ebishushani birikumanyisa n’okwetegyereza emyaka obu ebintu bikuru byabaho.” Ashley, omwishiki w’emyaka munaana, akahandika ati: “Mwebare okututeera omuri Awake! omutwe ‘Okaagarukamu Ota?’ Nigumpwera kwega bingi omu Baibuli.”
4. Amaka gakaakoresa gata ebiri ahansi y’omutwe “Okaagarukamu Ota?” nka bimwe aha by’okwegaho omu kwega Baibuli okw’eka?
4 Ahabw’enki obumwe mutarikukoresa ebiri ahansi y’omutwe “Okaagarukamu Ota?” omu kwega kwanyu nk’eka? Noobaasa kukoresa Index nari Watchtower Library eri aha CD-ROM waaba ogiine, okusherura eby’okugarukamu by’ebibuuzo ebigumire munonga. Omu kukora otyo, noija kuba noyegyesa abaana baawe oku baakubaasa kwesherurira ebi barikwenda kumanya. Ku oraabe oine abaana bakuru, ahabw’enki otarikubashaba okusherura eby’okugarukamu by’ebibuuzo eby’ekicweka nka “Ndi oha?” nari “Bikabaho Ryari omu Byafaayo?” okwega kwanyu nk’eka kutakahikire? Bwanyima omu kwega kwanyu nk’eka, nibabaasa kugambira abandi ebi beegire omu kusherura kwabo. Okukoresa gye orupapura oru n’omuringo gumwe ogu abazaire barikubaasa kwegyesa abaana baabo Ekigambo kya Ruhanga, bakabahwera kwetegyereza “Ebyahandiikirwe ebirikwera” kuruga omu buto.—2 Tim. 3:15; Bir. 6:7.