“Omuntu Orikugumisiriza omu Kugyezibwa Aine Omugisha”
1 Abakristaayo boona nibagyezibwa. (2 Tim. 3:12) Ebigyezo nibibaasa kwija nk’endwara, obworo, okwohibwa, okuhiiganisibwa nari omu miringo endiijo mingi. Ebigyezo ebirikureetwa Sitaane nibiba bigyendereire kutumaramu amaani, kutureetera kutafayo aha kubuurira kwaitu, nari kuturemesa kuheereza Ruhanga. (Yobu 1:9-11) Okugumisiriza ebigyezo nikureeta kuta okushemererwa?—2 Pet. 2:9.
2 Yetebeekanisize Ebigyezo: Yehova atuhaire Ekigambo kye eky’amazima, ekirimu ebirikukwata aha magara ga Yesu n’enyegyesa ze. Twahurira kandi tukoorobera ebigambo bya Yesu, nitweteeraho omusingi oguhamire, tutyo twetebeekanisiza ebigyezo. (Luka 6:47-49) Nitutunga n’amaani kuruga ahandi—kuruga omu b’eishe-emwe, omu nteerane z’ekibiina, n’omu bitabo by’omwambari omwesigwa kandi ow’obwengye. Butoosha nitukoresa ekiconco ky’okushaba eki Ruhanga atuhaire.—Mat. 6:13.
3 Yehova kandi atuhaire amatsiko. Ku turikuhamya okwikiriza kwaitu omu bi Yehova yaaraganiise, amatsiko gaitu nigaba ‘ekitsibo ky’amagara ekihamire kandi ekitarikunyiganyigibwa.’ (Heb. 6:19) Omu bwire obu Baibuli yaabaire neekihandiikwa, emeeri zikaba zitagyenda zitaine bitsibo, n’obu embeera y’obwire yaabaire eba eri nungi. Eihunga ku ryabaire ryaija kitaraariire, okushuumya ebitsibo kikaba kizibira emeeri kutomera ebibaare bya haihi n’enkungu y’enyanja. Nikyo kimwe, okuhamya okwikiriza kwaitu hati omu bi Ruhanga arikuraganisa, nikwija kutuhwera kutanyiganyigibwa oburemeezi oburi nk’eihunga. Oburemeezi nibubaasa kubaho kitaraariire. N’obu okubuurira kwa Paulo na Barunaba kwabaire nikugyenda gye omuri Lusitura, omu kaanya kakye ebintu bikahinduka Abayudaaya abazigu ku baizire.—Byak. 14:8-19.
4 Okugumisiriza Nikurugamu Okushemererwa: Okugumizamu nitubuurira n’omu bwire bw’okuhiiganisibwa nikireeta obugwa gye. Nitushemererwa ku turikuhemurwa nituturwa eiziina rya Kristo. (Byak. 5:40, 41) Okugumisiriza ebigyezo nikutuhwera kugira emitwarize nka obucureezi, okworoba, n’okugumisiriza omubwijwire. (Bir. 8:16; Heb. 5:8; Yak. 1:2, 3) Nikutwegyesa kwesiga Yehova, okwesiga ebi yaaraganiise n’okumuhindura obuhungiro bwaitu.—Enf. 18:10.
5 Nitumanya ngu ebigyezo n’eby’okuhwaho juba. (2 Kor. 4:17, 18) Ebigyezo nibituha omugisha gw’okworeka obuhango bwa rukundo ei twiniire Yehova. Ku turikubigumisiriza, nitworeka ngu ebi Sitaane yaagambire n’ebishuba. N’ahabw’ekyo, tutahwamu amaani! “Omuntu orikugumisiriza omu kugyezibwa aine omugisha; ahakuba ku arisingura, aryaheebwa ekirunga ky’amagara.”—Yak. 1:12.