Empindahinduka Nungi Omuri The Watchtower!
1 Enyimaho omu mwaka ogu, ebibiina bikatunga ekirango kirungi eki: Kutandika na n’Okw’okubanza 2008, The Watchtower neija kuba eri ey’emiringo ebiri, emwe eri ey’okugabira abantu, endiijo eri ey’Ab’eishe-emwe! Noobaasa kuba obaire nooyebuuza: ‘Magaziini ezi ibiri niziija kutaana zita? Ni birungi ki ebiri omu kugira Watchtower ebiri ez’omutaano? Hariho ebintu ebisya ebiraabe biri omuri zaamagaziini ezi ebi turikubaasa kutegyereza n’ekihika?’
2 Entaaniso: Watchtower eya kibanza ekya buri kwezi neija kwetwa ey’okugabira Abantu. Byona ebiraabe biri omuri magaziini egi nibiija kuba bitebeekanisiibwe kugasira abantu boona. Watchtower ey’ebiro 15 ebya buri kwezi neija kuba eri ey’okwega omu kibiina kandi terikwija kugabirwa bantu omu kubuurira. Neija kuba erimu ebi ekibiina kiraashomeho eby’okwezi kwona hamwe n’ebindi ebirikubaasa kugasira Abakristaayo abehaireyo. The Watchtower ey’okugabira Abantu neija kushemeza Abajurizi otaireho n’abatari Bajurizi kwonka abarikwikiririza omu Baibuli. Awake!, yo neija kuguma eri ey’abantu ab’emiringo yoona, otwariiremu abarikubangaanisa hamwe n’abari omu diini ezitari z’Ekikristaayo.
3 Ebirungi Ebiraarugemu: Omuri Magaziini ey’okwega omu Kibiina, nikiza kuba kitakyetengyesa okushoboorora ebigambo nka “payoniya” omu muringo ogu abantu abatari Bajurizi barikubaasa kwetegyereza. Magaziini egi neija kuba erimu n’ebindi ebitebeekanisiibwe kuhwera Abajurizi ba Yehova hamwe n’abeegi ba Baibuli abarikukora gye omu by’omwoyo. Kandi shi magaziini ey’okugabira Abantu? Ahabw’okugira ngu ebiraagambweho n’omuringo ogu biraahandiikwemu nibiza kuba bigyendereire kugasira abantu boona, omuntu otari Mujurizi ashemereire kukunda kushoma magaziini yoona. Buzima buri Mujurizi wa Yehova naija kugasirwa okushoma zaamagaziini zombi. Ahabw’okugira ngu nituza kuba nitugaba Watchtower emwe na Awake! emwe buri kwezi, nitwija kuba twine okwezi kwona kureeba oku turaazanjure gye.
4 Ebisya Ebirimu: Hariho ebintu ebisya ebirikuza kuteebwa omu The Watchtower ey’okugabira Abantu. Kimwe aharibyo, magaziini egi neija kugamba aha nyegyesa za Baibuli omu muringo ogworobi. Neija kugamba n’aha ku Baibuli erikubaasa kuhwera amaka. Neija kuba erimu n’eby’okuhwera eminyeeto kwega Baibuli. Omuri buri magaziini egi, nihaija kuba harimu ekicweka kuruga omu Baibuli ekirikutwegyesa aha mitwarize ya Yehova.
5 Nitushaba ngu Yehova ahe omugisha entebeekanisa egi ensya eya The Watchtower. Ekyetengo kyaitu n’okugira ngu magaziini egi hamwe na Awake!, bihitsye amakuru marungi aha bantu abandi baingi abarikukunda amazima.—Mat. 10:11.