Magaziini Zaitu—Zikozirwe Kushemeza Abantu Batari Bamwe
1. Omwambari omwesigwa kandi ow’obwengye naatooreza ata entumwa Paulo?
1 Nk’oku entumwa Paulo yaabaire ahindahindura omu miringo ei yaabaire abuuriramu amakuru marungi kugira ngu atunge ‘abantu b’emiringo yoona,’ nikwo n’omwambari omwesigwa kandi ow’obwengye arikukoresa magaziini zaitu kuhika aha bantu b’embeera n’enyikiriza zitarikushushana. (1 Kor. 9:22, 23) Okubaasa kukoresa gye Watchtower na Awake! ni kirungi kumanya kandi tukaguma nitwijuka abu zihandiikiirwe.
2. Awake! ehandiikiirwe baahi?
2 Awake!: Magaziini egi ehandiikirwe n’ekigyendererwa ky’okushomwa abantu nk’abo abu entumwa Paulo yaagambire nabo obu yaabaire naabuurira “abashaija ba Aseene.” (Byak. 17:22) Abashaija abo bakaba batarikumanya nyegyesa z’Ekikristaayo, kandi bakaba batarikwetegyereza gye Ebyahandiikirwe. Nikyo kimwe, abu Awake! erikuhandiikirwa tibarikwetegyereza gye Baibuli kandi abamwe tibarikugimanya na kakye. Nibabaasa kuba bataine ki barikumanya aha nyegyesa z’Ekikristaayo, batarikwesiga by’ediini, nari batarikumanya ngu Baibuli erimu obuhabuzi burungi. Ekigyendererwa kikuru kya Awake! n’okuhwera abarikugishoma kumanya ngu hariho Ruhanga ow’amazima. Kandi ekindi n’okuhwera abarikugishoma kugira okwikiriza omu Baibuli kandi bakeetegyereza ngu Abajurizi ba Yehova n’ab’omutaano aha bibiina by’ediini ebindi.
3. Watchtower ey’abantu boona n’ey’okwega omu kibiina zihandiikiirwe baahi?
3 Watchtower: Watchtower ey’abantu boona ehandiikiirwe abo abarikuteeraho kuha Ruhanga ekitiinisa n’Ebyahandiikirwe. Nibamanya bimwe aha biri omu Baibuli kwonka tibarikwetegyereza gye enyegyesa zaayo. Bari nk’abu Paulo yaagambireho nk’abo “abarikutiina Ruhanga.” (Byak. 13:14-16) Watchtower ey’okwega omu kibiina okukira munonga ehandiikiirwe Abajurizi ba Yehova. Paulo akaba atwara abo abaabaire bashoma ebaruha ze nk’abarikwetegyereza gye Ebyahandiikirwe kandi abaine okumanya okuhikire okw’amazima. (1 Kor. 1:1, 2) N’ebicweka ebirikwizira omu Watchtower ey’okwega omu kibiina bihandiikiirwe abarikwija omu nteerane zaitu kandi abarikwetegyereza ebigambo ebirikukoresibwa Abajurizi ba Yehova n’eki birikumanyisa.
4. Ahabw’enki tushemereire kwetegyereza gye ebiri omu magaziini ezi turikukoresa omu kubuurira?
4 N’obu turaabe nitugaba Watchtower na Awake! hamwe, butoosha nitwanjuraho emwe. N’ahabw’ekyo, gira ekigyendererwa ky’okwetegyereza ebiri omu magaziini ezo zombi. Ekyo nikiija kukuhwera kuzigaba orikukoresa ebyo ebirashemeze abu oraabugane omu kubuurira.