Gaba Zaamagaziini Ezirikuhamya Amazima
1. Omugasho gwa The Watchtower na Awake! ni guuha?
1 Magaziini erikwetwa The Watchtower Announcing Jehovah’s Kingdom na ntaahi yaayo Awake! ni nkuru munonga omu kubuurira amakuru g’Obukama n’okuhindura abantu abeegi. (Mat. 24:14; 28:19, 20) Nikitushemeza butoosha okugaba zaamagaziini ezi omu miringo etari emwe omu buheereza bw’Obukama.
2. Ni mpindahinduka ki ezikozirwe omu The Watchtower na Awake!, kandi n’ahabw’enki?
2 Omu myaka ehingwire, tureebire empindahinduka omu buhango bwa zaamagaziini n’omu biri kuba bizirimu hamwe n’omu miringo ei turikuzigabamu. Empindahinduka ezi zikozirwe n’ekigyendererwa ky’okwongyera aha burungi bwa zaamagaziini ezi kugira ngu amakuru g’Obukama gahikye aha mitima ‘y’abantu boona ngu bakaajunwa, bamanyira kimwe amazima.’—1 Tim. 2:4.
3. Zaamagaziini niziija kukoresibwa zita omu kubuurira?
3 Okuruga Jenwari 2006, twegire kukoresa gye enyanjura zitarikushushana omu kugaba Awake! ya buri kwezi. Hati nitwija kukoresa omuringo nigwo gumwe omu kugaba emwe ahari za The Watchtower Announcing Jehovah’s Kingdom ibiri eza buri kwezi omu buheereza bwaitu. Enyanjura ezirikubaasa kukoresibwa omu kugaba buri emwe ahari zaamagaziini ezi niziba ziri ahamuheru gw’Obuheereza Bwaitu obw’Obukama. Enyanjura ezi butoosha nizikira kugamba aha birikubanza omuri magaziini, kwonka obumwe nizigamba aha bindi ebigirimu ebi abantu barikwenda kumanya. Enyanjura ezo nizibaasa kukoresibwa gye twabanza kwetegyereza gye ebi zirikugambaho, na bwanyima tukazita omu bigambo byaitu kugira ngu zibaase kukora gye omu kicweka kyaitu.
4. Ahabw’enki nikibaasa kuba kiri kirungi okukoresa enyanjura ezindi oyihireho ezo eziri omu Obuheereza Bwaitu obw’Obukama?
4 N’obu Obuheereza Bwaitu obw’Obukama buraabe burimu enyanjura ibiri eza buri magaziini, oine obugabe kukoresa enyanjura endiijo. Enshonga emwe y’okukora ekyo n’okugira ngu noobaasa kushanga ngu ebiri ahansi y’omutwe ogundi ogutarikugambwaho omu nyanjura ezo, nibyo abaingi barikukunda omu kicweka eki murikubuuriramu. Nari noobaasa kuba nooteekateeka ngu enyanjura yaawe neeba nungi waakoresa ebiri ahansi y’omutwe ogu orikukunda.
5. Otakatebeekaniise enyanjura ya magaziini ei orikuza kugaba, oine kukora ki?
5 Oku Waakutebeekanisa Enyanjura Yaawe: Eky’okubanza kya byona, oine kwetegyereza gye ebiri ahansi y’omutwe ogu oraacwemu kugambaho. Butoosha, noobaasa kuteetegyereza gye byona ebiri omu magaziini otakagigabire omu buheereza. Kwonka oine kworeka omuhimbo, kandi okagamba oyihire aha mutima aha bi oraacwemu kugambaho omu magaziini. Eki noobaasa kukikora waaba noyetegyereza gye ebi orikugambaho.
6. Nitubaasa kwetebeekanisiza tuta enyanjura ezaitu?
6 Ekindi, noobaasa kutebeekanisa oku oraatandikye enyanjura yaawe omu miringo etari emwe. Ekibuuzo ekirikureetera omuntu kwenda kuhurikiza kandi ekiine akakwate n’ebiri omu magaziini ebi orikwenda kugambaho, nikibaasa kwejunisibwa kutandika okuganiira. Obutoosha yesigye amaani g’Ekigambo kya Ruhanga okuhika aha mutima gw’omuntu. (Heb. 4:12) Koresa ekyahandiikirwe ekiine akakwate n’enshonga ei orikugambaho, okukira munonga ekyajurizibwa nari ekyayorekwa omu bi orikugambaho. Teekateeka aha ku oraakorese ekyahandiikirwe kuhamya ebi orikugambaho.
7. Nitubaasa kwongyera tuta kuboneza enyanjura zaitu?
7 Koresa Buri Mugisha: Enyanjura yaaba eri ey’okukora gye, oine kugikoresa. Yejumbe n’ekibiina omu kugaba zaamagaziini Orwamukaaga. Heereza abantu zaamagaziini abaabaire baatwaireho ebitabo ebindi. Butoosha heereza abu orikwegyesa Baibuli zaamagaziini hamwe n’abandi abu oraashangeyo. Noobaasa kuha abantu zaamagaziini abu orikugamba nabo waaba noogura ebintu, ori aha rugyendo, nari waaba otegyereize omushaho omu irwariro. Yongyera kuboneza enyanjura zaawe orikuzikoresa omu kwezi kwona.
8. Ni mu miringo ki ei The Watchtower na Awake! ziri ez’omutaano?
8 Zaamagaziini ezi, Watchtower na Awake! n’ez’omutaano. Nizihimbisa Yehova nk’Omutegyeki wa byona. (Byak. 4:24) Nizihuumuriza abantu n’amakuru marungi g’Obukama bwa Ruhanga kandi zihiga abantu kwikiririza omuri Yesu Kristo. (Mat. 24:14; Byak. 10:43) Ekindi, nizooreka oku ebirikubaho omu nsi birikuhikiiriza obunabi bwa Baibuli. (Mat. 25:13) Hwera abantu b’omu kicweka kyanyu kugasirwa zaamagaziini ezi, orikwetebeekanisa kukoresa buri kagisha koona kuzigaba!
9. Nitubaasa tuta kutaho omusingye gw’okugarukira omuntu?
9 Waagaba magaziini, nari n’obu waakugaaniira n’omuntu aha by’omwoyo kwonka, mutsigire ekibuuzo nari ekiteekateeko ekiraakureetere kugarukayo nari kweyongyera kugaaniira aha by’omwoyo. Twaba turi abeeziriki omu kubiba embibo z’amazima, nitubaasa kugira amatsiko ngu Yehova naija kwigura emitima y’abo abarikwenda kumumanya n’okumuheereza.—1 Kor. 3:6.