Nitusiima Emigisha ei Twine!
1 Kuruga obu Yehova yaahanga omuntu, atwire naaha abaheereza be obujunanizibwa bw’emiringo mingi. Abahaire emigisha atarikwihirira aha myaka yaabo, aha kitiinisa eki baine nari aha buhangwa bwabo. (Luka 1:41, 42; Byak. 7:46; Fil. 1:29) Yehova naatuha migisha ki omu bunaku obu?
2 Emwe aha Migisha ei Twine: Twine omugisha gw’okwegyesibwa Yehova. (Mat. 13:11, 15) Okuhimbisa Yehova turikugira eki twagarukamu omu nteerane z’ekibiina, n’omugisha ogundi ogu twine. (Zab. 35:18) Ku turikutunga omugisha gw’okugarukamu ebibuuzo, nitugarukamu n’ekihika. Nikyo kimwe, twatwara ebi turikuheebwa kukora omu kibiina nk’omugisha, nitubikora n’agaitu goona. Butoosha nitwejumba omu kuboneza Ekyombeko ky’Obukama ngu kigume kiboneire?
3 N’obu abantu baingi baarabe nibebuuza yaaba eshaara zaabo nizihurirwa Ruhanga, itwe twine omugisha gw’omutaano okureeba ngu eshaara zaitu nizihuurirwa Orikukirayo obukuru omu nsi yoona n’omu iguru. (Enf. 15:29) Yehova naayehuririra okushaba kw’abaheereza be. (1 Pet. 3:12) Tarikutaho mirundi ei tushemereire kumushaba. Ka twine omugisha muhango, okubaasa kushaba “obutoosha”!—Efe. 6:18.
4 ‘Abakozi Abarikukora na Ruhanga’: Gumwe aha migisha erikukirayo oburungi ei twine n’ogw’okubuurira amakuru marungi g’Obukama bwa Ruhanga ‘nk’abakozi abarikukora na Ruhanga.’ (1 Kor. 3:9) Ogu n’omurimo ogurikureeta okumarwa n’obugwa gye. (Yoh. 4:34) Yehova tarikwetenga kukoresa abantu kukora omurimo ogu, kwonka agutuhaire nk’omuringo gw’okutworeka rukundo ye. (Luka 19:39, 40) Kwonka Yehova tahaire buri omwe omugisha ogu. Abo abarikwejumba omu kubuurira bashemereire kubanza kuhikiiriza eby’omwoyo ebirikwetegyesa kandi bakaguma nibabihikiiriza. (Isa. 52:11) Nitworeka ngu nitusiima omugisha ogu, turikwejumba omu kubuurira buri saabiiti?
5 Ebi turikukora omu buheereza bwa Yehova nibituma twagira ekigyenderwa omu magara. (Enf. 10:22) Tutaribitwara nk’ebitari bikuru! Ku turikworeka ngu nitusiima obuheereza bwaitu, nitushemeza Tataitwe ow’omu iguru, Omuhi ‘w’engabirano yoona enungi n’ekiconco kyona ekihikire.’—Yak. 1:17.