Okwongyera aha Buheereza Bwaitu
1 Entumwa Paulo akahiga Abakristaayo okugyendera omu muhanda gwa Ruhanga kandi ngu ‘n’okuguma nibatwaza batyo n’okukiraho.’ (1 Tes. 4:1) Eki nikimanyisa ki ahariitwe? Eki nikimanyisa ngu tushemereire kugumizamu kusherura oku twakwongyera kwejumba omu by’omwoyo, obutoosha tukateeraho ‘okuhikiiririza kimwe obuheereza bwaitu’—2 Tim. 4:5.
2 Ekigyendererwa: Okuteeraho kwongyera aha buheereza bwaitu nikuruga aha kyetengo kyaitu eky’okwenda kuheereza Omuhangi waitu omu bwijwire. Nitwenda kukura omu by’omwoyo kandi tukasherura emiringo ei twakwongyera aha buheereza bwaitu. Okugira entebeekanisa nungi n’ekigyendererwa kirungi nibyija kutuhwera kuhikiiriza obuheereza bwaitu ahari Ruhanga.—Zab. 1:1, 2; Fil. 4:6; Heb. 10:24, 25.
3 Okuteeraho kwongyera aha buheereza bwaitu nikyetengyesa ngu tugire omutima gw’okwefiisiriza n’ogw’okugaba. Omutima nk’ogwo nitubaasa kugugira twashaba kandi tukacumitiriza aha ky’okureeberaho kya Yesu. (Mat. 20:28) Yesu akatunga okushemererwa kwingi ahabw’okuheereza abandi omu kubuurira kwe kwona. (Byak. 20:35) Nitubaasa kutooreza Yesu, twafayo aha bantu kandi tukakoresa buri mugisha kwongyera aha buheereza bwaitu.—Isa. 6:8.
4 Obujunaanizibwa bw’Abazaire: Ekyetengo ky’okuheereza abandi n’eky’okwongyera aha buheereza bwaitu nikibaasa kuteebwa omu baana bakiri bato. Abato nibaija kureeba okufayo okw’ab’omuka yaabo hamwe n’oku barikwejumba omu kubuurira kwenda kwongyera aha buheereza bwabo. Ow’eishe-emwe omwe obu yaabaire akiri muto, akahigwa kwongyera aha buheereza bwe ahabw’okukora n’ishenkuru emirimo y’ekibiina. Okureeba obweziriki n’okushemererwa kw’ishenkuru kikamureetera kusherura oku yaakuheereza ab’eishe-emwe bataahi be. Hati n’omuheereza.
5 Ab’Eishe-emwe Nibetengwa: “Omuntu ku ayenda omurimo gw’omureeberezi, aba akunzire omurimo murungi.” (1 Tim. 3:1) Ebigambo ebi nibihiga ab’eishe-emwe kweyongyera omu maisho omu by’omwoyo kubaasa kutunga obujunaanizibwa obundi omu kibiina kya Yehova. Okukora eki tikirikwetengyesa etalanta z’omutaano. Ow’eishe-emwe orikwenda kutunga obujunaanizibwa obwo naija kubanza yaasherura Obukama kandi yaayejumba n’omujinya omu kubuurira. (Mat. 6:33; 2 Tim. 4:5) Naija kuteeraho kuba eky’okureeberaho kirungi aha bandi.
6 Omu Nsi Yoona: Yehova ariyo naarundaana abantu omu bwingi. (Isa. 60:22) Nikyetengyesa ngu abo boona abarikukuratira eky’okureeberaho kya Yesu beeyongyere kwejumbira kimwe omu kubuurira. Ripoota y’omwaka gw’obuheereza ogwa 2006 neeyoreka ngu abantu 248,327 omu nsi yoona nibo baabatiziibwe. Ekyo nikimanyisa ngu abantu basya nka 680 nibo barikubatizibwa buri izooba! Twena ka tugumizemu kusherura oku twakubaasa kwongyera aha buheereza bwaitu.