Ab’Eishe-emwe Abakiri Eminyeeto, Nimutunguuka Kuheereza omu Kibiina?
1. Ni ryari obu ow’eishe-emwe okiri omunyeeto arikubaasa kugyendera aha buhabuzi oburi omu 1 Timoseo 3:1?
1 “Omuntu ku ayenda omurimo gw’omureeberezi . . . , aba akunzire omurimo murungi.” (1 Tim. 3:1) Ebigambo ebyo kuruga omu Baibuli nibihiga ab’eishe-emwe kutunguuka bakaheereza omu kibiina. Mbwenu shi oshemereire kubanza waaba omuntu mukuru kuheereza omu kibiina? Buzima, nikiba kiri kirungi kutandika kutunguuka okiri omunyeeto. Obwo noija kutendekwa kandi oyorekye ngu noobaasa kuheereza omu kibiina waaba waakuzire. (1 Tim. 3:10) Waaba ori ow’eishe-emwe okiri omunyeeto, okatunguuka ota kuheereza omu kibiina?
2. Noobaasa ota kugira omutima gw’okwefeerereza kandi okakyoreeka?
2 Okwefeerereza: Manya ngu oriyo nootunguuka kukora omurimo murungi, beitu kutarikutunga ekitiinisa omu kibiina. N’ahabw’ekyo, teeraho kugira ekyetengo ky’okuhwera ab’eishe-emwe na banyaanyaziitwe. Omuringo gumwe gw’okukora ekyo, n’okuteekateeka aha ky’okureeberaho kya Yesu. (Mat. 20:28; Yoh. 4:6, 7; 13:4, 5) Shaba Yehova akuhwere kufayo aha bandi. (1 Kor. 10:24) Noobaasa kugira oku waahwera abakaikwire omu kibiina n’abaine amaani makye? Nooyehayo kuhwera nk’omu kutema ebinyantsi, n’omu bindi ebikwatiraine n’okuboneza ekyombeko ky’Obukama? Noobaasa kwehayo kuha orubazo omu Eishomero ry’Obuheereza orikuba naaza kuruha yaaba atariho? Okwehayo kuhwera abandi nikiija kukureetera okushemererwa.—Byak. 20:35.
3. Noobaasa kutunguuka ota omu by’omwoyo, kandi ahabw’eki kiri kikuru?
3 Eby’Omwoyo: Ni kikuru omuheereza kutunguuka omu by’omwoyo okukira okugira obwengye bw’enzaarwa nari emyoga. Omuntu otunguukire omu by’omwoyo naateeraho kureeba ebintu nk’oku Yehova na Yesu barikubireeba. (1 Kor. 2:15, 16) Naaba naayoreka “ebyana by’[o]mwoyo.” (Gal. 5:22, 23) Naaba ari omubuurizi omweziriki orikwebembeza eby’Obukama. (Mat. 6:33) Noobaasa kugira emitwarize erikworeka ngu otunguukire omu by’omwoyo waaba oine entebeekanisa y’okweyegyesa Baibuli. Eki nikitwariramu okushoma Baibuli burizooba, kushoma buri Watchtower na Awake! n’okutebeekanisa enteerane hamwe n’okuzibamu. (Zab. 1:1, 2; Heb. 10:24, 25) Obu entumwa Paulo yaahiga omunyeeto Timoseo kutunguuka omu by’omwoyo, akamuhandiikira ati: ‘Ta omutima aha bi orikwegyesa.’ (1 Tim. 4:15, 16) N’ahabw’ekyo, tebeekanisa gye embazo ezirikukuheebwa omu Eishomero ry’Obuheereza. Butoosha, yetebeekanisize okubuurira kandi okwejumbemu. Yeteereho ebigyendererwa by’omwoyo kandi oteereho kubihikiriza nk’okuba payoniya, okuheereza aha Beseeli, nari kuza omu Eishomero ry’Ab’eishe-emwe Abatakashweire. Okutunguuka omu by’omwoyo nikiija kukurinda “oyetantare okwetenga okubi kw’obutsigazi.”—2 Tim. 2:22.
4. Ahabw’enki ni kikuru okuba omwesigwa?
4 Ba Omwesigwa: Omu kyasha ky’okubanza, ab’eishe-emwe abaahairwe obujunaanizibwa bw’okugabira Abakristaayo eshoberwa eby’okurya bakaba bari “abarikusiimwa.” Hatariho kubanganisa, bakaba nibamanywa nka abeesigwa. Entumwa zikaba zitaine kwerarikirira yaaba omurimo ogwo guraakorwe. Ekyo kikababaasisa kuta omutima aha bindi ebyabaire biri bikuru. (Byak. 6:1-4) N’ahabw’ekyo, kyona ekiraabe kikuhairwe kukora omu kibiina, teeraho kukikora gye. Tooreza Noa, owaayombekire emeeri nk’oku yaaragirwe. (Kut. 6:22) Waaba ori omwesigwa Yehova naasiima kandi ekyo nikyoreka ngu otunguukiire omu by’omwoyo.—1 Kor. 4:2; Reeba akabokisi “Ebirungi Ebirikuruga omu Kutendekwa.”
5. Ahabw’enki ab’eishe-emwe abakiri eminyeeto baine kutunguuka kuheereza omu kibiina?
5 Nk’oku kyarangirwe, Yehova ariyo naarahutsya omurimo gw’okurundaana abantu baingi. (Isa. 60:22) Kimwe kya kana ky’akakaikuru k’abantu nibo barikubatizibwa buri mwaka. Ahabw’okugira ngu abantu baingi nibaija omu mazima, ab’eishe-emwe abatendekirwe gye nibetengwa kutwara obujunaanizibwa omu kibiina. Hariho bingi ebiine kukorwa omu murimo gwa Yehova na munonga omu bunaku obu. (1 Kor. 15:58) Ab’eishe-emwe abakiri eminyeeto, nimutunguuka kuheereza omu kibiina? Buzima, nooba oyetengire kukora omurimo murungi!
[Ebigambo ebitoorainwe aha rupapura 2]
Ahabw’okugira ngu abantu baingi nibaija omu mazima, ab’eishe-emwe abatendekirwe gye nibetengwa kutwara obujunaanizibwa omu kibiina
[Akabokisi aha rupapura 3]
Ebirungi Ebirikuruga omu Kutendekwa
Omu kibiina, ab’eishe-emwe eminyeeto abarikubaasa kuheebwa obujunaanizibwa nibagasirwa baaheebwa eby’okukora kandi bakatendekwa abareeberezi. Omureeberezi orikutaayaayiira ebibiina akaba ashutami aha puratifoomu arikugaruramu omubuurizi amaani bwanyima y’oruteerane kuhwa. Akareeba omwojo amwemereire haihi, atyo yaamubuuza yaaba aine eki arikwenda kumugambira. Omwojo ogwo yaamugarukamu ngu akaba ahairwe obujunaanizibwa bw’okuboneza aha puratifoomu buri kuhendera kw’enteerane. Abazaire be bakaba bariyo nibaza kutaaha, kwonka omwojo ogwo akaba atarikwenda kutaaha atakahikirize bujunaanizibwa bwe. Omureeberezi orikutaayaayira ebibiina kikamushemeza munonga yaarugaho. Akagira ngu: “Abareeberezi omu kibiina ekyo bakaba nibateeraho kutendeka ab’eishe-emwe abakiri eminyeeto barikubaha obujunaanizibwa omu kibiina. Ekyarugiremu, kikaba nikirahukira abareeberezi kwikiriza ab’eishe-emwe abakiri eminyeeto kuba abaheereza omu kibiina.”