Awake! y’Omutaano Kugabwa Omuri Novemba!

¹ Abantu baingi baine ebibuuzo birungi ebirikukwata aha mugasho gwa Baibuli. Abantu ku baraabe nibo bagihandiikire, neebaasa eta kwetwa Ekigambo kya Ruhanga? Ni nshonga ki ezishemereire kundetera kwikiriza Baibuli kumpabura? Naataho amaani, nkahayo n’obwire kushoma hamwe n’okwega Baibuli, ningasirwa nta? Ni mpindura ki eya Baibuli ei nshemereire kukoresa? Ebi ni bimwe aha bibuuzo ebirikugarukwamu omuri Awake! ey’omutaano eya Novemba eine omutwe “Noobaasa Kwesiga Baibuli?”

² Nitwenda ngu tugabe Awake! egi ey’omutaano omu kicweka kyona eki turikubuuriramu. Kyaba nikibaasika, yejumbe n’ekibiina omu kubuurira enju aha ndiijo buri Rwamukaaga omuri Novemba. Awake! egi ey’omutaano gyorekye abanyabuzaare baawe, abataahi, abu orikukora nabo, abashomesa, abu orikushoma nabo, n’abarikwenda kumanya ebirikukiraho abu waabaire waataayaayiire. Gyendanaho zimwe waaba nooza kugura ebintu na waaba ori aha rugyendo. Awake! egi eriho omu bwingi kugira ngu ekibiina kitungye ezirikumara.

³ Tandika Kwegyesa Omuntu Baibuli: Waaha omuntu magaziini egi, noobaasa kumworeka eki muraagaaniireho ekirikubaasa kukuhwera kutandika kwega nawe Baibuli. Nk’eky’okureeberaho, noobaasa kugira oti, “Omurundi ogundi, niinyija kukworeka oku Baibuli erikugarukamu ekibuuzo eki, ‘Ekigyendererwa kya Ruhanga ahabw’ensi n’enki?’” Garukayo n’akatabo Eki Baibuli Erikwegyesa haza omworekye ebiri aha rupapura 4 na 5, nari shoma nawe akacweka 1-3 omu shuura 3. Nari noobaasa kugira oti, “Omurundi ogundi, niinyija ngaaniireho naiwe aha bunabi bwa Baibuli oburiyo nibuhikiirizibwa hati.” Waagarukayo, mworekye eshuura 9 ey’omu katabo aka reero, muhanuure aha kacweka 1-3. Nari noobaasa kumugira oti: “Baingi nibashanga kitoorobi okwetegyereza ebi barikushoma omuri Baibuli. Omurundi ogundi, niinyija kukworeka oku orikubaasa kwetegyereza gye Baibuli.” Waagarukayo, muhe akatabo Eki Baibuli Erikwegyesa, kandi mworekye oku arikubaasa kwega Baibuli.

⁴ Baibuli yonka niyo erimu “Ebyahandiikirwe ebirikwera,” ebirikubaasa ‘kutuha obwengye bw’okutuhabura omuhanda gw’okujunwa.’ (2 Tim. 3:15) N’ahabw’ekyo, nitwenda ngu twena twejumbe n’omujinya omu kugaba Awake! egi ey’omutaano okuhwera abantu kwesiga Baibuli!