Okugumyana
1. Okutaayaaya kw’abareeberezi abarikutaayaayira ebibiina nikutuha mugisha ki ogw’omutaano?
1 Entumwa Paulo akahandiikira ekibiina ky’omuri Rooma ati: “Mbainiire orushusho ngu mbone kubaha omugisha gw’omwoyo, gubagumye, nikwo kugira ngu tugumyane, nyowe ngumibwe okwikiriza kwanyu, naimwe okwangye.” (Rom. 1:11, 12) Okutaayaaya kw’abareeberezi abarikutaayaayira ebibiina omu bunaku obu naitwe nikutuha omugisha gw’okugumyana.
2. Ahabw’enki okutaayaaya kw’omureeberezi orikutaayaayira ebibiina kurikurangwa hakirikuburayo obwire?
2 Ekibiina: Okutaayaaya kw’omureeberezi orikutaayaayira ebibiina nikurangwa omu kibiina hakirikuburayo ameezi nk’ashatu. Eki nikitubaasisa kwetebeekanisa bukiri kare kugira ngu tubaase kugasirwa omu bwijwire. (Efe. 5:15, 16) Ku oraabe nookora, obundi noobaasa kushaba ebiro bikye aha murimo kugira ngu oyejumbe omu kubuurira omuri saabiiti egyo. Abamwe nibetebeekanisa kuheereza nka baapayoniya abahwezi omu kwezi okwo. Ku oraabe obaire oine ahu orikwenda kuza omu saabiiti y’orutaayaayo, noobaasa kukora empindahinduka kugira ngu obe oriho esaabiiti egyo?
3. Itwe nk’abantu nitubaasa kukora ki omu bwire bw’orutaayaayo okugira ngu tugumibwe?
3 Ekigyendererwa ekikuru ky’okutaayaaya kw’omureeberezi orikutaayaayira ebibiina n’okugumya ab’eishe-emwe hamwe n’okubatendeka omu kubuurira. Noobaasa kushaba kukora nawe nari n’omukazi we, ku araabe amwine? Omureeberezi orikutaayaayira ebibiina naakunda okukora n’ababuurizi batari bamwe, otwariiremu n’abo abakiri basya omu kubuurira nari abarikwenda kumanya oku baakukora gye omu kubuurira. Boona nibabaasa kwegyera aha nyanjura ze nari kugyendera aha buhabuzi obu arikuha. (1 Kor. 4:16, 17) Okumweta kurya nawe nikwija kwongyera kubaha omugisha gw’okugumyana. (Heb. 13:2) Obu embazo ze zirikuba nizikwata aha byetaago by’ekibiina, hurikiza gye.
4. Nitubaasa tuta kugumya omureeberezi orikutaayaayira ebibiina?
4 Omureeberezi Orikutaayaayira Ebibiina: Entumwa Paulo akaba ataine ntaaniso n’ab’eishe-emwe abu yaabaire aheereza. Akaba ahikwaho oburemeezi kandi akaba agira amaganya, n’ahabw’ekyo akaba naayetenga ow’okumugumya kandi akaba asiima weena owaamugumya. (2 Kor. 11:26-28) Ab’omu kibiina ky’omuri Rooma ku baakimanyire ngu Paulo, embohe, akaba naija, bamwe omuri bo bakaza aha katare ka Apio kumubugana—orugyendo rwa mailo 46! “Paulo ku yaabareebire, yaasiima Ruhanga, yaaguma omutima.” (Byak. 28:15) Omu muringo nigwo gumwe, naiwe nimubaasa kugumya omureeberezi orikutaayaayira ebibiina. Muhe “ekitiinisa kingi” murikushagika orutaayaayo rwe n’obweziriki. (1 Tim. 5:17) Mwebaze kandi mworekye ngu buzima noosiima byona ebi arikubakorera. We n’omukazi we nibaija kushemererwa ku baraareebe okwikiriza kwawe, rukundo yaawe, n’okugumisiriza kwawe.—2 Tes. 1:3, 4.
5. Ahabw’enki twena nitwetenga ow’okutugumya omu bunaku obu?
5 Omu biro ebi ‘eby’akabi kaingi,’ n’oha omuriitwe otarikwetenga okugumibwa? (2 Tim. 3:1) Cwamu hati kwejumbira kimwe omu kubuurira omuri saabiiti egyo ey’omutaano ei muraamare n’omureeberezi orikutaayaayira ebibiina. Twena—abareeberezi abarikutaayaayira ebibiina n’ababuurizi—nitubaasa kugumyana. Omu muringo ogu, naitwe nitwija kuguma ‘nitugumyana kandi turikwombekana.’—1 Tes. 5:11.