“Paulo Akasiima Ruhanga Yaaguma Omutima”

Ab’omu kibiina kya Rooma ku baamanyire ngu Paulo naija, ab’eishe-emwe abamwe bakagyenda mahiro 40 nari kiromita 64 kumubugana. Rukundo y’okwefeerereza ei ab’eishe-emwe baayorekire Paulo ekamureetera kukora ki? “Paulo ku yaabareebire, yaasiima Ruhanga, yaaguma omutima.” (Byak 28:15) N’obu Paulo yaabaire naamanywa nk’orikugumya ebibiina, obu yaabaire akomirwe, nawe bakamugumya.​—2Kor 13:10.

Obunaku obu, abareeberezi abarikutaayaayira ebibiina nibataayaayira ekibiina aha kindi kugumya ab’eishe-emwe na banyaanyazi-itwe. Nk’abaheereza ba Yehova boona, obumwe nabo nibaruha, nibagira ebirikuberarikiriza kandi nibahwamu amaani. Ow’eishe-emwe orikutaayaayira ebibiina n’omukazi we ku baraagarukye kutaayaayira ekibiina kyanyu, noobaasa kukora ki kubahwera kugira obumanzi, kugira ngu ‘mugumyane’?​—Rom 1:11, 12.

• 

  Shagika enteerane z’okwetebeekanisa kuza kubuurira. Omureeberezi orikutaayaayira ebibiina naagarukamu amaani yaareeba ababuurizi nibeefeerereza kubaasa kwejumba omu kubuurira omu saabiiti egyo. (1Tes 1:2, 3; 2:20) Noobaasa kuba payoniya omuhwezi omu bwire obwo. Noobaasa kukora nawe nari n’omukazi we omu kubuurira nari otware omwe aharibo aha muntu ou orikwegyesa Baibuli. Omureeberezi orikutaayaayira ebibiina n’omukazi we nibakunda kukora n’ababuurizi batari bamwe, otwariiremu n’abo abakiri basya omu kubuurira nari abarikwehurira nk’abatarikumanya kubuurira gye.

• 

  Ba Efura. Noobaasa kubaha oburaaro nari eby’okurya. Eki nikyoreka omureeberezi orikutaayaayira ebibiina n’omukazi we ngu noobakunda. Tibarikuteekateeka ngu mwine kubakorera ebintu bingi.​—Luk 10:38-42.

• 

  Hurikiza kandi ogyendere aha buhabuzi bwe. Omureeberezi orikutaayaayira ebibiina na rukundo naatuhwera kumanya oku turikubaasa kwongyera aha buheereza bwaitu. Obumwe, naabaasa kutuha obuhabuzi bw’amaani. (1Kor 5:1-5) Nikimushemeza twayoroba kandi tukahurikiza.​—Heb 13:17.

• 

  Yoreka Okusiima. Manyisa omureeberezi orikutaayaayira ebibiina n’omukazi we oku ogasiirwe omu kutaayaaya kwabo. Noobaasa kubamanyisa orikubagambira nari obahandiikire ebaruha.​—Kol 3:15.