Eka Yaawe Neyetebeekanisiza Okuhonaho?
1 Obunabi obwahikiriziibwe nibuha obuhame bw’amaani ngu emperu y’ensi egi embi eri haihi kuhika. Ebiro ebi turimu ni bibi munonga nk’ebyabandiize Omwegyemure. (Mat. 24:37-39) Noa akakira okuhwerekyerera kw’ensi egyo eya ira ahabw’okugira ngu ‘akaguma naagyenda na Ruhanga.’ (Kut. 6:9) Noa aine kuba yaayegyeise ab’omu ka ye emihanda ya Yehova ahabw’okuba nabo bakakira. Ni mu muringo ki ogu turikubaasa kutoorezamu Noa reero tukeetebeekanisa nk’eka kukira okucwekyerera kw’obusingye obu obubi?
2 Omubuurizi w’Okuhikiirira: Noa akagumisiriza ‘nk’omubuurizi w’okuhikiirira’ kumara emyaka nka 40 nari 50. (2 Pet. 2:5) Bataahi be, yaaba baabaire nibakoresibwa nari batarikukoresibwa baamaraika abagomi, baine kuba baamushekyereire arikubabuurira. Butoosha abantu tibarikufayo aha bi turikubabuurira kandi nibatushekyerera, ekirikworeka ngu muheru y’obusingye obu eri haihi. (2 Pet. 3:3, 4) Kwonka obutashushana n’abantu b’omu bunaku bwa Noa, baingi hati nibahurikiza kandi ‘bahimintikira’ omu kuramya kwa Yehova. (Isa. 2:2) Twagumisiriza, nitwija ‘kwejuna kandi tujune n’abarikutuhurikiza’. (1 Tim. 4:16) Ka ni kikuru abazaire kwegyesa abaana baabo omu bigambo n’omu bikorwa obukuru bw’omurimo gw’okubuurira omu biro ebi!—2 Tim. 4:2.
3 ‘Akatwaza Atyo’: Okukira kwa Noa n’eka ye kukarugiirira aha kukuratira ebiragiro bya Yehova n’obwegyendesereza. (Kut. 6:22) Kandi ni kikuru ahariitwe ‘kuguma tweteekateekire kworobera’ obuhabuzi oburikuruga omu Baibuli hamwe n’aha mwambari omwesigwa. (Yak. 3:17, NW) Ishe abaana omwe akagyendera aha buhabuzi obu yaatungire kuruga omu kibiina kya Yehova. Nk’eky’okureeberaho, akaba ayebembera okushoma kwabo okw’eka buri saabiiti kandi agyenda n’ab’omuka ye kubuurira buri wiikenda nk’oku obuhabuzi bwabaire nibugira. Buri saabiiti, akaba ateeraho kugyenda n’omwe aha baana be omu kubuurira. Okuguma ‘naatwaza atyo’ kukahwera abaana be, kandi boona mukaaga bakakura baaba abaheereza ba Yehova abeesigwa.
4 Emperu y’obusingye obu neija kubaho kitaraariire. (Luka 12:40) Twatooreza Noa kandi tukooreka okwikiriza ahabw’okujunwa, itwe n’ab’omu ka yaitu buzima nitwija kuba twetebeekaniise.—Heb. 11:7.