Kampeyini y’Omutaano ey’Okugaba Turakiti— Kuruga Okitoba 20–Novemba 16!
1 Okutandika n’Orwokubanza, Okitoba 20, kumara esaabiiti ina, nitwija kwejumba omuri kampeyini y’omutaano ey’okugaba kaaturakiti akaine omutwe Nooyenda Kumanya Amazima? Twine amatsiko ngu kampeyini egi ey’omutaano eraije kuba omu nsi yoona neija kuhiga abantu baingi kwenda kweyongyera kwetegyereza obukomooko bwonka obw’amazima.—Yoh. 17:17.
2 Kaaturakiti aka nikooreka oku Baibuli erikugarukamu omu bigufu ebibuuzo ebi mukaaga ebikuru: “Ruhanga buzima naatufaho?” “Entaro n’okubonabona biryahwaho?” “Omuntu naagumizamu kuba ohuriire bwanyima y’okufa?” “Abaafiire baryagaruka kuba abahuriire?” “Nshemereire kushaba nta okubaasa kuhurirwa Ruhanga?” na “Nimbaasa kutunga nta okushemererwa omu magara?” Amakanisa ga Kristendomu tihariho obu garagarukiremu ebibuuzo ebi omu muringo oguhikire buzima. Nangwa n’abo abatarikweyeta Bakristaayo noobaasa kushanga bareebuurizeho ebibuuzo nk’ebyo, kwonka nibabaasa kuba batarikumanya ngu eby’okugarukamu ebihikire nibishangwa omuri Baibuli. N’ahabw’ekyo, twine amatsiko ngu amakuru aga nigaija kushemeza abantu baingi.
3 Mukagabe omu Kicweka Kyona Eki Murikubuuriramu: Muteereho kugaba kaaturakiti aka enju aha nju omu kicweka kyona eki murikubuuriramu nk’oku kirikubaasika. Ku muraabe mwine ekicweka kihango, abareeberezi nibabaasa kucwamu ngu mutsige kaaturakiti aka omu maka agu mutaraashangyemu bantu. Ijuka kuha abataahi, abanyabuzaare, abu orikukora nabo nari abu orikushoma nabo, n’abo abu orikukira kugaaniira nabo kaaturakiti aka. Obundi noobaasa kutebeekanisa kukora nka payoniya omuhwezi omuri Okitoba nari Novemba. Oine omwana nari omwegi wa Baibuli orikukura omu by’omwoyo kandi orikubaasa kubuurira naitwe omuri kampeyini egi nk’omubuurizi otabatiziibwe? Ku araabe ariho manyisa abareeberezi.
4 Eby’Okugamba: Kubaasa kuhika aha bantu baingi n’amakuru aga, ni kirungi kukoresa enyanjura ngufu. Buuza ou oriyo noobuurira kimwe aha bibuuzo mukaga ebiri aha kaaturakiti aka reero omworekye ahu eky’okugarukamu kiri omu kaaturakiti aka. Ababuurizi boona nibaija kuhindura omu nyanjura zaabo okuhikaana n’embeera z’ekicweka eki murikubuuriramu. Oraayorekye ngu naayenda kumanya ebirikukiraho, tebeekanisa kugarukayo. Ahari wiikenda, zaamagaziini ensya nizibaasa kugabwa hamwe na kaaturakiti. Bwanyima ya Kampeyini egi erikwija kuhwa Novemba 16, nitwija kutandika kugaba akatabo Eki Baibuli Erikwegyesa. Bwaturakiti oburaatsigareho nibwija kuba nibugabwa nk’obundi oku burikugabwa.
5 Tandika Kwegyesa Omuntu Baibuli: Okukira munonga kaaturakiti aka katairwe kutuhwera kutandika kwegyesa abantu Baibuli. Waaba noogarukayo aha muntu oraayorekye ngu naayenda kumanya ebirikukiraho, noobaasa kumubuuza oti, ni mazima ki g’omuri Baibuli agaakuhuumuriize? Mworekye ebiri aha muheru ahu entebeekanisa yaitu ey’okwega Baibuli erikworekwa, kandi muhe akatabo Eki Baibuli Erikwegyesa. Ku kiraabaasike, shoma nawe akacweka kamwe nari bubiri kuruga omu shuura erikugamba aha bi mwaba nimugaaniiraho.
6 Yehova naasherura abo abaraamuramye “omu mwoyo n’omu mazima.” (Yoh. 4:23) Twena ka tuteereho kwejumba omuri kampeyini egi ey’omutaano okubaasa kuhwera abandi kumanya amazima!