Cwamu Kushagika Obukama bwa Ruhanga Hati!
Teera akashushani ngu eihunga ry’amaani riri haihi kuteera ekicweka kyanyu. Ebitongore bya gavumenti nibiranga obutumwa bukuru bw’okurabura ngu: “MUSHOHORE! MUSHERURE OBUHUNGIRO HATI!” Mbwenu shi eky’obwengye eky’okukora ni kiiha? Nooba oine kuhungira omu mwanya ogutarimu kabi.
Omu muringo nigwo gumwe, twena turi haihi kuhikwaho “eihunga,” eri Yesu yaayetsire “okubonabona kwingi.” (Matayo 24:21) Tihaine eki turikubaasa kukora kuhunga okubonabona kwingi. Kwonka haine eki turikubaasa kukora kwerinda. Nitubaasa kukora ki?
Yesu Kristo omu rubazo rwe orw’aha rushozi, akaha obuhabuzi obu: “Mubanze musherure obukama [bwa Ruhanga] n’okuhikiirira kwe.” (Matayo 6:33) Ekyo nitukikora tuta?
Twine kubanza kusherura Obukama bwa Ruhanga. Eki nikimanyisa ngu tushemereire kutwara Obukama bwa Ruhanga nka bukuru kukira ekindi kintu. (Matayo 6:25, 32, 33) Ahabw’enki twine kubureeba tutyo? Ahakuba abantu tibarikubaasa kumaraho oburemeezi. Obukama bwa Ruhanga bwonka nibwo burikubaasa kuhikiiriza omurimo gugumire ogwo.
Twine kusherura okuhikiirira kwe. Tushemereire kuteeraho kugyendera aha biragiro bya Ruhanga n’emisingye ye ehikiriire. Ahabw’enki? Ahakuba twayeteeraho emitindo y’ekihikire n’ekigwire, nihaija kurugamu ebintu bibi. (Enfumu 16:25) Kwonka, twagyendera aha mitindo ya Ruhanga, titurikumushemeza kyonka, beitu naitwe nitugasirwa.—Isaaya 48:17, 18.
Twine kugumizamu nitusherura Obukama bwa Ruhanga n’okuhikiirira kwe. Yesu akarabura ngu abamwe nibabaasa kuhuga, barikuteekateeka ngu nibabaasa kutunga oburinzi barikukora esente nyingi nk’oku kirikubaasika. Abamwe nibarengwa amaganya bahika n’aha kuburwa obwire bw’okusherura Obukama bwa Ruhanga.—Matayo 6:19-21, 25-32.
Kwonka Yesu akaraganisa ngu abarikushagika Obukama bwa Ruhanga nibaija kutunga ebirikwetengyesa hati, n’emigisha y’obutwire omu biro by’omumaisho.—Matayo 6:33.
N’obu abeegi ba Yesu omu kyasha ky’okubanza baabaire nibeebembeza okusherura Obukama bwa Ruhanga n’okuhikiirira kwe, omu bwire bwabo obusaasi n’okubonabona tibirahwaireho. Kwonka bakaba barinzirwe. Mu muringo ki?
Bakaba nibagyendera aha mitindo ya Ruhanga ehikiriire, kandi ekyo kikabarinda kutabonabona nk’abo abaabaire nibeehuzya emitindo ya Ruhanga. Okugira okwikiriza kuhami ngu Obukama bwa Ruhanga bukaba nibuza kwija, kikabahwera kugumira oburemeezi bw’amaani. Kandi Ruhanga akabaha “amaani agarikukirira kimwe” kubaasa kugumisiriza.—2 Abakorinso 4:7-9.
NOIJA KUBANZA KUSHERURA OBUKAMA?
Abakristaayo omu kyasha ky’okubanza bakoorobera ekiragiro kya Yesu eky’okubanza kusherura Obukama. Bakabuurira amakuru marungi g’Obukama omu bicweka byona eby’ensi yaabo. (Abakolosai 1:23) Mbwenu shi haine abarikukora eki hati?
Eego! Abajurizi ba Yehova nibamanya ngu hatsigaireyo obwire bukye Obukama bwa Ruhanga bukacwekyereza ensi egi embi. N’ahabw’ekyo nibagyendera aha bigambo bya Yesu ebi: ‘Engiri egi ey’Obukama neija kugambwa omu nsi zoona okuba eky’okuhamya aha mahanga goona; obwo nibwo emperu eraahikye.’—Matayo 24:14.
Noija kutwaza ota waaheza kuhurira amakuru marungi aga? Nitukuhiga kutooreza abantu b’omu kyasha ky’okubanza aba Makedonia orurembo rwa Beroya. Entumwa Paulo ku yaabagambiire amakuru marungi agarikukwata aha Bukama, bakaikiriza obutumwa bwe “n’emitima erikukundira kimwe.” Bakaba “nibashwijuma omu Byahandiikirwe” kuhamya yaaba ebi bahuriire bihikire, kandi bakagyendera aha bi baayegire.—Ebyakozirwe 17:11, 12.
Naiwe noobaasa kukora nikyo kimwe. Waabanza kusherura Obukama bwa Ruhanga n’okuhikiirira kwe, noija kutunga obuhungiro n’oburinzi hati, kandi noija kutunga obusingye n’oburinzi obwabuzima omu biro by’omumaisho.