Eshuura y’Ikumi n’Emwe
“Mubanze Musherure Obukama”
1. (a) Ahabw’enki Yesu yaayehanangiriize abaabaire bamuhurikiize kubanza kusherura Obukama? (b) Ni kibuuzo ki eki tushemereire kwebuuza?
NK’EMYAKA 1,900 ehweire, Yesu akeehanangiriza abantu abaabaire beteeraniire omuri Galilaaya ati: “Mubanze musherure obukama [bwa Ruhanga] n’okuhikiirira kwe.” Ahabw’enki eki kyabaire kishemereire kukorwa n’obwira? Obwire bwa Kristo obw’okuheebwa Obukama bukaba butari hare omu maisho? Eego, kwonka Obukama bwa Ruhanga oburikutegyekwa Mesia nibwo Yehova yaabaire naija kukoresa kworeka obutegyeki bwe n’okuhikiiriza ekigyendererwa kye ahabw’ensi. Omuntu weena owaabaire naayetegyereza gye obukuru bw’ebintu ebyo, akaba naija kwebembeza okusherura Obukama omu magara ge. Ekyo ku kiraabe kyabaire kiri kityo omu kyasha ky’okubanza, mbwenu ka nikikuru munonga hati obu Kristo yaaherize kwemekwa nk’Omugabe! Mbwenu eky’okwebuuza n’eki: Oku ndikutwaza nikworeka ngu ninyebembeza Obukama bwa Ruhanga?—Matayo 6:33
2. Abantu okutwarira hamwe nibeemarira omu kusherura ki?
2 Omu bunaku obu, obukaikuru bw’abantu omu nsi yoona nibeebembeza Obukama. Nibooreka ngu nibashemba Obukama barikwemarira omu kukora ebi Yehova akunda, ahabw’okugira ngu bakeehayo ahariwe. Aha rubaju orundi, abarikukira obwingi nibeemarira omu kusherura ebintu ebitaine mutambo. Abantu nibasherura empiiha, eby’obugaiga n’eby’okweshemeza ebi empiiha zirikubaasa kugura. Nibakora n’agaabo goona kweyongyera omu maisho omu bi barikukora. Oku barikutwaza nikworeka ngu nibekunda munonga, ngu nibakunda eby’obugaiga n’eby’okweshemeza. Nibata Ruhanga omu mwanya gwa kabiri, beitu obwo baaba nibamwikiririzamu.—Matayo 6:31, 32.
3. (a) Ni eitungo ki eri Yesu yaayehanangiriize abeegi be kusherura, kandi n’ahabw’enki? (b) Ahabw’enki tutashemereire kwemereza omutima ahabw’ebyetaago by’omubiri?
3 Kwonka Yesu akahabura abeegi be ati: “Murekyere aho kwebiikira eitungo omu nsi,” ahakuba ebintu ebi tibirikubaasa kugumaho ebiro byona. “Kwonka mwebiikire eitungo omu iguru” murikuheereza Yehova. Yesu akeehanangiriza abakuratsi be kugira eriisho “eririkureeba hamwe” barikuta omutima aha kukora ebi Ruhanga akunda. Akabagira ati: “Timurikubaasa kuheereza Ruhanga n’Eitungo.” Kwonka shi bakaatungire bata ebyetaago by’omubiri nk’ebyokurya, ebijwaro n’oburaaro? Yesu akabahabura ati: “Murekyere aho kwemereza emitima yaanyu.” Akabagira ngu beegyere aha nyonyi, ezi Ruhanga ariisa. Yesu akahiga abakuratsi be kwegyera n’aha bimuri ebi Ruhanga ajweka. Mbwenu abaheereza ba Yehova tibarikukirira kimwe ebi? Yesu akagira ati: “Mubanze musherure obukama bwe n’okuhikiirira kwe; n’ebyo byona ebindi [ebirikwetengwa] muryabyongyerwaho.” (Matayo 6:19-34, NW) Ebi orikukora nibyoreka ngu noikiriza ekyo?
Otaikiriza Kufeerwa Amazima Agarikukwata aha Bukama
4. Omuntu ku arikwemarira aha kusherura eby’omubiri, n’enki ekirikubaasa kurugamu?
4 Nikirungi okufayo kutunga ebintu ebirikubaasa kuhaazya omuntu n’ab’omu ka ye. Kwonka omuntu ku arikwemarira aha kusherura eby’omubiri, ebirikurugamu nibibaasa kuba bibi. N’obu yaakuba naagira ngu naikiririza omu Bukama, ku arikwebembeza ebindi omu mutima gwe, nibituma amazima g’Obukama gamufeera. (Matayo 13:18-22) Nk’eky’okureeberaho, eizooba rimwe, omutsigazi omutungi akabuuza Yesu ati: “Nkaakora ki okuhungura amagara agatahwaho?” Akaba aine emicwe mirungi kandi arikutwariza gye abandi, kwonka akaba naakunda munonga obutungi bwe. Akaba atarikubaasa kureka obutungi bwe kugira ngu abe omukuratsi wa Kristo. N’ahabw’ekyo akafeerwa omugisha gw’okutegyeka na Kristo omu Bukama bw’omu iguru. Aha izooba eryo, Yesu akagira ati: “Ka nikiremeera abatungi okutaaha omu bukama bwa Ruhanga!”—Mako 10:17-23.
5. (a) Paulo akahiga Timoseo kumarwa na bintu ki, kandi n’ahabw’enki? (b) Sitaane naayejunisa ata “okukunda empiiha” nk’omutego?
5 Bwanyima y’emyaka mingi, entumwa Paulo akahandiikira Timoseo, omu bwire obwo owaabaire ari omuri Efeso orurembo rw’amaani omu by’obushuubuzi arikumwijutsya ati: “Titurareetsire kintu mu nsi, kandi titurikubaasa kwihamu kintu; ku turaabe twine eby’okurya n’eby’okujwara, ebyo bigume bitumare.” Okukora ngu tutungye “eby’okurya n’eby’okujwara,” ebyaitu hamwe n’eby’ab’omu maka gaitu nikirungi. Kwonka Paulo akarabura ati: “Abeetenga kuba abatungi bagwa omu kwohibwa n’omu mutego n’omu kwetenga kwingi kw’obushema okurikushiisha, kukaroha abantu omu kuconcoboza n’okuhwerekyerera.” Sitaane n’endyarya. Naabaasa kutandika kusoonasoona omuntu arikukoresa otuntu tukye. Ekyo nikibaasa kukuratirwa ebintu ebihango, ka tugire nk’omugisha gw’okukuzibwa aha murimo nari ogw’okutunga omurimo ogurikureeta empiiha enyingiho kwonka ogurikumaraho omuntu obwire bwe obw’eby’omwoyo. Twaba tuteerinzire, ‘okukunda empiiha’ nikubaasa kuturemesa kuta omutima aha kintu ekikuru, Obukama. Paulo akagira ati: “Ahakuba okwetenga [“okukunda,” NW] empiiha n’omuzi gw’ebibi byona; hariho bamwe abaagiriire ebyo omururu, bakahaba, bakaruga omu kwikiriza, bakeecumitira kimwe n’enaku nyingi.”—1 Timoseo 6:7-10.
6. (a) Tushemereire kukora ki okubaasa kwetantara okugwa omu mutego gw’okukunda ebintu? (b) Nitubaasa kugira bwesigye ki n’obu haraabe hariho eibura ry’emirimo n’emihendo y’ebintu eri ahaiguru?
6 Ahabw’okugira ngu Paulo akaba ainiire Timoseo Omukristaayo mutaahi we rukundo eya buzima, akamwehanangiriza ati: “Oyetantare ebyo” kandi “rwana okurwana okurungi okw’okwikiriza.” (1 Timoseo 6:11, 12) Nikyetengyesa okutaho amaani okubaasa kwetantara okukunda ebintu okwijwire omu nsi egi. Kwonka twayezirika tukakora n’amaani, Yehova tarikwija kututsigaho. N’obu ebintu biraabe nibigurwa empiiha nyingi kandi n’emirimo eri ey’eibura, Yehova naija kuhamya ngu twatunga ebi turikwetenga. Paulo akahandiika ati: “Mutarigira omutima ogurikukunda empiiha, ebi mwine bibe nibyo byabamara; ahakuba We [Ruhanga] akagira ati: Tindikutsigaho, kandi tindikuhemukaho na kakye. Nikyo turikugambira, tutarikubanganisa, tuti: Mukama niwe muhwezi wangye, tinditiina; omuntu naabaasa kungira ata?” (Abaheburaayo 13:5, 6) N’Omugabe Daudi akahandiika ati: “Nkaba ndi omutsigazi, mbwenu ndi omugurusi; kwonka tinkareebaga ohikiriire atsigirweho, n’obu baakuba abaana be nibashaba ak’okurya.”—Zaaburi 37:25.
Abeegi aba ira Bakataho eky’Okureeberaho
7. N’enki eki Yesu yaaragiire abeegi be aha bikwatiraine n’okubuurira, kandi ahabw’enki yaabaragiire atyo?
7 Yesu ku yaaherize kutendeka gye abakuratsi be, yaabohereza omuri Israeli kubuurira amakuru marungi n’okurangirira bati: “Obukama bw’omu iguru bwiriire haihi.” Ka gaabaire gari amakuru marungi! Yesu Kristo, owaabaire ari Mesia Omugabe, akaba ari ahagati omuribo. Ahabw’okugira ngu abakuratsi ba Yesu bakaba beehaireyo kuheereza Ruhanga, Yesu akabahiga kugira obwesigye ngu Ruhanga akaba naija kubareeberera. N’ahabw’ekyo akabagira ati: “Mutagira eki mwagyendana, n’obu yaakuba enkoni, nari enshaho, nari eby’okurya, nari empiiha; kandi mutatwara amakanzu abiri. Enju yoona ei muraataahemu, mugume omwo, kandi nimwo muriruga.” (Matayo 10:5-10; Luka 9:1-6) Yehova akaba naija kuhamya ngu baatunga ebi barikwetenga kuruga aha Baisraeli bataahi baabo, obu obufura bwabaire buri omucwe gwabo.
8. (a) Harikuburayo obwire bukye akaitwa, ahabw’enki Yesu yaahaire ebiragiro bisya aha kubuurira? (b) N’enki eki abakuratsi ba Kristo baabaire baine kugumizamu nibeebembeza?
8 Bwanyima Yesu ari haihi kufa, akarabura abeegi be ngu omu biro by’omu maisho embeera ekaba neija kuhinduka. Ahabw’okugira ngu omurimo gwabo gukaba nigwija kuhakanisibwa omu butongore, bakaba nibabaasa kutoorekwa bufura omuri Israeli. Ekindi, omu mwanya mukye bakaba nibaija kuba nibabuurira amakuru g’Obukama omu Banyamahanga. N’ahabw’ekyo bakaba baine kutwara “enshaho y’empiiha” hamwe ‘n’entanda y’ebyokurya.’ N’obu baraabe baabaire bashemereire kusherura eby’okurya n’eby’okujwara, bakaba baine kwebembeza Obukama bwa Yehova n’okuhikiirira kwe, baine obwesigye ngu akaba naija kubahwera kubitunga.—Luka 22:35-37.
9. Paulo akeebembeza ata Obukama omu magara ge obwo arikwereeberera omu byetaago bye eby’omubiri, kandi akaha buhabuzi ki aha nshonga egi?
9 Entumwa Paulo akaba ari eky’okureeberaho kirungi omu kugyendera aha buhabuzi bwa Yesu obu. Akahindura obuheereza ekintu kikuru munonga omu magara ge. (Ebyakozirwe 20:24, 25) Ku yaabaire aza omu mwanya kubuurirayo, akaba ayereeberera omu byetaago bye eby’omubiri; akaba abaziira n’amahema. Akaba atarikuteekateeka ngu abandi bakaba nibaija kumureeberera. (Ebyakozirwe 18:1-4; 1 Abatesalonika 2:9) Kwonka abandi ku baabaire bamuha ebiconco nk’omuringo gw’okworeka obufura na rukundo yaabo, akaba abyakiira n’okusiima. (Ebyakozirwe 16:15, 34; Abafilipi 4:15-17) Paulo akeehanangiriza Abakristaayo okuteebwa obujunaanizibwa bwabo obw’omu maka ahabw’okubuurira, kureka ngu bahikiirize obujunaanizibwa bwabo bwona. Akabahabura kukunda ab’omu maka gaabo, kukora n’amaani n’okubagana n’abandi. (Abaefeso 4:28; 2 Abatesalonika 3:7-12) Akabehanangiriza kwesiga Ruhanga, beitu butari butungi bwabo, kandi n’okukoresa amagara gaabo omu muringo ogurikworeka ngu buzima nibeetegyereza ekirikukira obukuru. Okurugiirira aha nyegyesa ya Yesu, ekyo kikaba nikimanyisa okwebembeza Obukama bwa Ruhanga n’okuhikiirira Kwe.—Abafilipi 1:9-11.
Guma Nooyebembeza Obukama
10. Okwebembeza Obukama nikimanyisa ki?
10 Itwe nitubuurira abandi engiri y’Obukama ekirikwingana ki? Ekyo nikirugiirira aha mbeera zaitu n’aha ku turikusiima amakuru g’Obukama. Guma noijuka ngu Yesu taragizire ngu: ‘Musherure Obukama mwaba mutaine kindi ky’okukora.’ Ahabw’okugira ngu Yesu akaba naamanya obukuru bw’Obukama, akooreka eki Ishe akunda arikugira ati: ‘Mugume nimusherura Obukama.’ (Luka 12:31) N’obu baingi omuriitwe turaabe twine kukora kutungira ab’omu maka gaitu eby’okubahwera, twaba twine okwikiriza, nitwija kwebembeza omurimo gw’Obukama. Kandi hoona nitwija kuhikiiriza n’obujunaanizibwa obu twine omu maka gaitu.—1 Timoseo 5:8.
11. (a) Yesu akooreka ata ngu boona bakaba batarikwija kukora ebirikwingana omu murimo gw’okubuurira amakuru g’Obukama? (b) Eki omuntu arikubaasa kukora nikirugiirira ahari ki?
11 Bamwe omuriitwe nitubaasa kumara obwire bwingiho omu kubuurira engiri y’Obukama. Kwonka omu nfumu ye erikukwata aha miringo mingi y’eitaka, Yesu akooreka ngu boona abu emitima yaabo eri nk’eitaka erirungi bakaba nibaija kwana ebyana. Birikwingana ki? Kikaarugiiriire aha mbeera z’omuntu, ahabw’okuba hariho abari omu myaka ya bukuru, abaine amagara mabi, n’abaine obujunaanizibwa omu maka. Kwonka buzima omuntu yaaba naasiima amakuru marungi g’Obukama, naabaasa kukora kihango.—Matayo 13:23.
12. Ni bigyendererwa ki eby’omwoyo ebi abatsigazi barikuhigwa kugira?
12 Ni kirungi okugira ebigyendererwa ebiraatuhwere kwongyera aha bwire obu turikumara nitubuurira aha Bukama. Eminyeeto eshemereire kuteekateeka munonga aha ky’okureeberaho kirungi ky’omutsigazi Timoseo owaabaire aine omujinya. (Abafilipi 2:19-22) Mbwenu n’enki ekyakubaasa kubakirira okuheereza Ruhanga obutwire bwona bwanyima y’okuheza emishomo yaabo? Abakuru nabo nibagasirwa kihango baagira ebigyendererwa eby’omwoyo ebibashemereire.
13. (a) N’oha orikucwamu eki itwe turikubaasa kukora omu murimo gw’Obukama? (b) Ku turikwebembeza Obukama, nituha buhame ki?
13 Omu mwanya gw’okumara amaani abo abu turikuteekateeka ngu bakaabaire nibakora ekirikukiraho, tukaataireho amaani okwongyera aha buheereza bwaitu kugira ngu tuheereze Ruhanga n’amaani gaitu goona okurugiirira aha mbeera zaitu. (Abarooma 14:10-12; Abagalatia 6:4, 5) Nk’oku Sitaane yaagambire ahari Yobu, naagira ngu nitukunda munonga eby’omubiri, okwetungira ebyaitu, n’obugwa-gye kandi ngu ekigyendererwa kyaitu omu kuheereza Ruhanga n’okwesherurira ebyaitu. Kwonka buzima ku turikwebembeza Obukama, nituba bamwe ahari abo abarikworeka ngu Sitaane n’omubeihi mukuru. Nitworeka ngu ekirikubanza omu magara gaitu n’okuheereza Ruhanga. Omu bigambo n’omu bikorwa nitworeka ngu nitukunda Yehova na bataahi baitu, kandi ngu nitushemba obutegyeki bwe.—Yobu 1:9-11; 2:4, 5; Enfumu 27:11.
14. (a) Ahabw’enki kiri kikuru okugira entebeekanisa y’okugyenderaho omu kubuurira? (b) Abajurizi baingi nibejumba omu kubuurira ekirikwingana ki?
14 Okugira entebeekanisa y’okugyenderaho nikituhwera kukora kihango okukira aha ki twakukozire. Yehova we wenka ‘ataireho obwire’ bw’okuhikiiririzamu ekigyendererwa kye. (Okuruga 9:5; Mako 1:15) Nikirungi okubuurira omurundi gumwe nari emirundi erengireho buri saabiiti kyaba nikibaasika. Obukumi n’obukumi bw’Abajurizi ba Yehova omu nsi nibabuurira nka baapayoniya abashagiki, barikumara eshaaha nka ibiri omu kubuurira amakuru marungi buri izooba. Obukumi n’obukumi bw’abandi nibaheereza nka baapayoniya abaabutoosha, babuurira amakuru g’Obukama kumara eshaaha nk’ibiri n’ekicweka buri izooba. Baapayoniya ab’omutano n’abamiisani bo nibamara eshaaha nyingiho barikubuurira. Naitwe nitubaasa kukoresa buri mugisha okubuurira buri omwe oraatuhurikize aha matsiko g’Obukama. (Yohaana 4:7-15) Ekyetengo kyaitu kishemereire kuba eky’okwejumba omu murimo ogwo n’agaitu goona nk’oku embeera zaitu ziri, ahabw’okuba Yesu akagira ati: “Engiri egi ey’obukama eryagambwa omu nsi zoona okuba eky’okuhamya aha mahanga goona; obwo nibwo emperu erihika.”—Matayo 24:14; Abaefeso 5:15-17.
15. Aha bikwatiraine n’okubuurira, noogira ngu n’ahabw’enki obuhabuzi bw’omu 1 Abakorinso 15:58 ni bukuru na munonga omu bunaku obu?
15 Omu nsi yoona, Abajurizi ba Yehova boona hamwe, nibejumba omu murimo ogu ogw’okubuurira. Nibagyendera aha buhabuzi bwa Baibuli oburikugira buti: “Murekye kunyiganyigibwa, mweyongyere obutoosha kukora omurimo gwa Mukama, ahabw’okuba nimumanya ngu okukora kwanyu ti kwa busha omuri Mukama.”—1 Abakorinso 15:58.
Eby’Okweijutsya
• Obu Yesu yaagira ngu “mubanze musherure obukama,” n’enki eki yaabaire naayoreka ngu kishemereire kuza omu mwanya gwa kabiri?
• Tushemereire kutwara tuta obujunaanizibwa bw’okwereeberera omu by’omubiri itwe n’ab’omu maka gaitu? Ruhanga naija kutuha buhwezi ki?
• Ni buheereza bwa muringo ki obu turikubaasa kwejumbamu?
[Ekishushani ekiri aha rupapura 107]
Omu nsi yoona, Abajurizi ba Yehova ebiro ebi nibabuurira amakuru marungi, emperu etakahikire