‘Kora Byona ahabw’Amakuru Marungi’
1. Omubuurizi w’Obukama naaba ayeteekateekire kukorera ki abandi, kandi n’ahabw’enki?
1 Entumwa Paulo akaba naahurira aine eibanja ry’okubuurira abandi amakuru marungi. (1 Kor. 9:16, 19, 23) Nikyo kimwe, okufayo kwaitu aha biro by’omumaisho by’abantu, nikutuhiga kubabuurira amakuru marungi.
2. Omu kubuurira, ni mpindahinduka ki ezi turikubaasa kukora, kandi n’ahabw’enki?
2 Buurira Ahu Abantu Barikubaasa Kushangwa n’Obu Orikubaasa Kubashanga. Omujubi murungi w’eby’enyanja naatega ahu n’obu eby’enyanja birikubaasa kukwatwa, beitu hatari ahu n’obu arikuhurira naayenda kujuba. Naitwe ‘nk’abajubi b’abantu,’ nitubaasa kukora empindahinduka kugira ngu tubaase kubuurira obu abantu barikubaasa kushangwa omu kicweka eki turikubuuriramu kugira ngu tutungye okumarwa omu murimo ogu ogw’omutaano ogw’okurundaana “eby’enyanja by’emiringo yoona.” (Mat. 4:19; 13:47) Nitubaasa kubuurira omu mwabazyo obu turikubaasa kushanga abantu omu maka gaabo nari aha nguuto omu kasheeshe abantu barikuza kukora? Ekigyendererwa kya Paulo kikaba kiri “okubuurira hoona amakuru marungi,” kandi akaba akoresa buri mugisha gwona omurungi kubuurira.—Byak. 17:17; 20:20, 24, NW.
3, 4. Twaba turi omu kubuurira, nitubaasa kuhindahindura tuta omu nyanjura zaitu, kandi niki ekirikurugamu?
3 Hindahindura Enyanjura Zaawe Kuhikaana n’Ekicweka Eki Murikubuuriramu: Abajubi nibahindahindura omu miringo ei barikujubamu kubaasa kukwata omuringo gw’eby’enyanja ebi barikuba nibenda. Nitubaasa kubuurira tuta amakuru marungi g’Obukama omu muringo ogurikushemeza abantu b’omu kicweka eki turikubuuriramu? Omu bwengye twine kugamba aha nshonga erikukwata munonga aha bantu baingi kandi tuhurikize gye baaba nibatugambira eki bo barikuteekateeka. (Yak. 1:19) Nitubaasa kubabuuza eki barikuteekateeka aha nshonga egyo kubaasa kubareetera kugaaniira naitwe. (Enf. 20:5) Omu muringo ogu nitwija kubaasa kwanjura amakuru marungi omu muringo ogurikubaasa kubakwataho bo nk’abantu. Paulo akahinduka ‘byona ahari boona.’ (1 Kor. 9:22) Okuhindahindura omu nyanjura zaitu ni kikuru okubaasa kuhika aha mitima y’abu turikubuurira.
4 Okubuurira abantu “amakuru marungi g’ebigambo birungi” ka nikureeta okushemererwa kwingi! (Isa. 52:7) Ka tuteereho ‘kukora byona ahabw’amakuru marungi’ kubaasa kuhika aha bantu bingi nk’oku kirikubaasika.—1 Kor. 9:23.