Oyeteekateekire Kukora Empindahinduka?
1. Empinduka ezirikubaho omu nsi nizitureetera kukora ki?
1 Omu 1 Abakorinso 7:3, Baibuli neyoreka ngu ensi neeguma neehinduka. Empinduka ezirikubaho omu nsi nizitureetera twahindura omu miringo y’okubuurira, obu turikubuurira n’omu nyanjura zaitu. Mbwenu shi oyeteekateekire kukora empindahinduka?
2. Ahabw’enki tushemereire kukora empindahinduka kubaasa kugyendera hamwe n’ekibiina kya Yehova?
2 Omu Miringo y’Okubuuriramu: Ekibiina Ekikristaayo kitwire nikikora empindahinduka. Obu Yesu yaatuma abeegi be omu kubanza, akabagira ngu bataritwara efurebe nari esente omu nshaho zaabo. (Mat. 10:9, 10) Bwanyima akahindura omu buhabuzi obu yaabaire abahaire ahabw’okumanya ngu abeegi be bakaba nibaija kuhiiganisibwa kandi n’omurimo gwabo gw’okubuurira gukaba nigwija kuhika n’omu bicweka ebindi. (Luk. 22:36) Omu kyasha ekihweire ekibiina kya Yehova kikoreise emiringo y’okubuurira etarikushushana— nka bwakaada, radiyo n’emotoka ezi baabaire bataho emizindaaro, nk’oku kyabaire nikyetengyesa obwire obwo. Obunaku obu, abantu baingi omu myanya mingi tibarikukira kuba bari omuka, n’ahabw’ekyo nituhigwa kwongyerera aha kubuurira enju aha nju turikubuurira kitaraariire n’omu myanya erikuba erimu abantu baingi. Tukahigwa kubuurira enju aha nju omu mwabazyo ahabw’okuba omu ihangwe abantu nibaba bari aha mirimo. Oyeteekateekire kuguma noogyenda n’ekigaari kya Yehova nk’oku kirikugyenda nikihindahinduka?—Ezk. 1:20, 21.
3. Okuba twetebeekaniise kukora empindahinduka omu nyanjura nikituhwera kita twaba nitubuurira omu kicweka kyaitu?
3 Omu Nyanjura: Abantu b’omu kicweka kyanyu nibeerarikirira aha by’entaasya, entaro n’aha bikwatiraine n’amaka? Ni kirungi kumanya embeera n’oburemeezi ebiri omu kicweka kyaitu kubaasa kutebeekanisa enyanjura erikuhikaana nakyo. (1 Kor. 9:20-23) Abu turikubuurira baaba baine ekindi eki barikwenda kumanya nitubaasa kuba nikyo twagambaho, omu mwanya gw’okuta omutima aha nyanjura ei turikuba tutebeekanise.
4. Ahabw’enki ni kikuru kukora empindahinduka tutarikweziringa?
4 Omu bwire butari bwa hare “omuhango gw’ensi” nigwija kuhwaho reero okubonabona kwingi kutandikye. “Hatsigaire ebiro bikye.” (1 Kor. 7:29) Ka ni kikuru kukora empindahinduka tutarikweziringa kubaasa kukora bingi omu bwire bukye obutsigaireyo!