Oku Turikubaasa Kwongyera Kubuurira Gye—Okufayo aha U Orikubuurira
Ahabw’Enki Kiri Kikuru: Yesu akaba naafayo ahari buri muntu. Nk’eky’okureeberaho, izooba rimwe, Yesu akeetegyereza ngu omushaija owaabaire afiire amatu akaba naatiina kuhemuka, n’ahabw’ekyo, kuza kumutambira akabanza yaamwiha ahagati y’abantu baingi. (Mak. 7:31-35) Akooreka ngu naafayo aha beegi be arikuteeraho kumanya obweremwa bwabo kandi atarikubagambira bintu bingi omurundi gumwe. (Yoh. 16:12) Yesu n’obu araabe ari omu iguru, naayoreka ngu naafayo aha bantu. (2 Tim. 4:17) Ahabw’okugira ngu turi abakuratsi be nitwenda kumutooreza. (1 Pet. 2:21; 1 Yoh. 3:16, 18) Nitwija kwongyera kubuurira gye twayoreka ngu nitufayo aha bu turikubuurira kandi tukateeraho kumanya embeera yaabo, ekirikubashemeza n’ebi barikwenda kumanya. Ou orikubuurira yaamanya ngu noomufaho beitu kutarikumutsigira obutabo kwonka naabaasa kukuhurikiza.
Teeraho Kukora Eki Okwezi Oku:
Yegyezemu omu bwire bw’okuramya kw’eka nari mwaba muri omu kubuurira, kworeka oku omubuurizi arikubaasa kuhindahindura omu nyanjura kuhikaana n’ebi ou arikubuurira yaagamba.
Omu ruteerane rw’okwetebeekanisa kuza kubuurira, orikwebembera naabaasa kukoresa eby’okureeberaho nari kuhikaanisa ebiteekateeko aha ku turikubaasa kworeka ngu nitufayo aha u turikubuurira.