Okwongyera Kubuurira Gye—Okugarukamu Omuntu Owaatugambira n’Ekiniga omu Kubuurira

Ahabw’Enki Kiri Kikuru: Baingi abu turikubuurira nibatutwariza gye. Kwonka, Yesu akagira ngu bamwe bakaba nibaija kutwanga. (Yoh. 17:14) N’ahabw’ekyo, tikishemereire kututangaaza hagira abatugarukamu n’ekiniga. Ekyo kyabaho, twine kugamba omu muringo ogurikushemeza Yehova ou turikujwekyera. (Rom. 12:17-21; 1 Pet. 3:15) Twatwaza tutyo nitwija kwikaikanisa ou turikubuurira. Kandi ekyo nikiija kumuhwera n’abaakireeba kuhurikiza Abajurizi ba Yehova baagaruka kubabuurira.—2 Kor. 6:3.

Oku Turikubaasa Kukikora:

Gamba n’obucureezi kandi omutwarize gye. Eki nikiija kumwikaikanisa. Otagira ekiniga ahabw’ebi baakugambira. (Mub. 7:9) Naabaasa kuba aine ekiniga ahabw’oburemeezi obu aine nari ahabw’okuzayo omu bwire bubi. N’obu yaakuba yaagira ekiniga ahabw’ebi waamubuurira, ekyo nikikira kubaho ahabw’okugira ngu akahabisibwa.—2 Kor. 4:4.
Garukamu n’ebigambo birungi omu bucureezi. (Enf. 15:1) Mbwenu shi waamwiha omu turo nari hariho ebi yaaba naakora? N’obu turaabe tutarikushaba okusaasirwa ahabw’omurimo gwaitu gw’okubuurira, noobaasa kushaba okusaasirwa ahabw’okugira ngu waija omu bwire bubi. Mbwenu shi aine ekiniga ahabw’ebigambo bitahikire ebi agambiirwe ebirikukwata aha Bajurizi ba Yehova? Kyaba nikwo kiri noobaasa kugira oti: “Naayetegyereza ahabw’enki waaba oine kuguubwa kubi. Kwonka, ebi waahuriire bikaba bitahikire. Nimbaasa kukushoboororera ahabw’enki?” Hariho eki turikwikiriza, eki atarikwikiriza, nk’okubinga omu kibiina abarikukora ebibi bakanga kweteisa nari okwanga kuteebwamu eshagama? Noobaasa kugira oti: “Naakwetegyereza. Baingi nibabuuza aha nshonga egi. Okaayenzire ngu nkworekye eki Baibuli erikwegyesa aha birikukwata aha nshonga egi?”
Omuntu yaaba aine ekiniga kingi, ni kiba kiri kirungi kugyenda otamugarukiremu. Kandi yaagira ngu Abajurizi ba Yehova batarigaruka owe, noobaasa kumuhamiza ngu nikwo kiraabe.

Teeraho Kukora Eki Okwezi Oku:

Mwegyezemu mwaba muri omu kuramya kw’eka.
Mwaruga aha u mwabuurira owaaba aine ekiniga hikaanisa ebiteekateekaho n’ou orikubuurira nawe aha ku waaba oine kumugarukamu omu muringo murungi.