Mutwaze omu Muringo gw’Obusingye aha Bantu Boona
1. Nitubaasa kukuratira buhabuzi ki bwa Baibuli twabuurira omuntu akaguubwa kubi?
1 Abaheereza ba Yehova nibakunda obusingye kandi amakuru agu turikubuurira n’ag’obusingye. (Isa. 52:7) Kwonka obumwe abantu nibaguubwa kubi ku turikubabuurira. Niki ekirikubaasa kutuhwera kuguma turi ab’obusingye omu mbeera nk’egyo?—Rom. 12:18.
2. Ahabw’enki kiri kikuru kukoresa okwetegyereza omu kubuurira?
2 Yetegyereze Ahabw’Enki Baatwaza Batyo: N’obu abantu abamwe baraabe nibatugambira kubi ahabw’okwanga amazima, abamwe nibabaasa kututwariza kubi ahabw’enshonga ezindi ezitaine kakwate n’okubuurira kwaitu. Obundi nitubaasa kuba twababuurira omu bwire butari burungi. Nibabaasa kuba bagwirwe kubi ahabw’oburemeezi obu baine. N’obu baakuba baaguubwa kubi ahabw’okubabuurira, twijukye ngu nibabaasa kututwariza batyo ahabw’okugira ngu nibahabisibwa. (2 Kor. 4:4) Twayetegyereza ahabw’enki baatutwariza batyo nikituhwera kuguma tucureire.—Enf. 19:11.
3. Nitubaasa kworeka tuta ngu titurikugaya ou turikubuurira?
3 Otakaabagaya: Baingi abu turikubuurira nibaba bahamiire munonga aha nyikiriza zaabo. (2 Kor. 10:4) Baine obugabe bw’okucwamu kuhurikiza nari kwanga. Titushemereire kugaya ebi barikwikiriza nari kubatwara nk’abataine ki barikumanya ahabw’okugira ngu nitumanya bingi kuruga omu Baibuli. Omuntu yaatushaba ngu turugye owe tugyende, tushemereire kugyenda omu busingye.
4. Omuntu yaatugambira kubi nitubaasa kumugarukamu tuta omu muringo murungi?
4 Garukamu omu Muringo gw’Embabazi: N’obu baakutugambira kubi, tushemereire kubagarukamu omu muringo murungi. (Kol. 4:6; 1 Pet. 2:23) Okubaasa kwetantara empaka teeraho kugamba aha ki murikubaasa kwikirizanaho. Omu muringo murungi noobaasa kumubuuza ahabw’enki yaahakanisa eki waamubuurira. Okwetantara kwongyera kumugwisa kubi, obumwe nikiba kiri kirungi kutagumizamu noogaaniira nawe.—Enf. 9:7; 17:14.
5. Ni birungi ki ebirikuruga omu kurinda obusingye omu kubuurira?
5 Twarinda obusingye, ou turikubuurira naija kuguma naijuka oku twamutwariize abaase kuhurikiza abandi baamubuurira aha murundi ogundi. (Rom. 12:20, 21) Naabaasa kuba omuheereza wa Yehova n’obu yaakuba naareebeka nk’ohamiire aha nyikiriza ye kandi arikuhakanisa. (Gal. 1:13, 14) N’obu yaakwikiriza nari akanga amazima, itwe nituba twahaisa Yehova ekitiinisa kandi twaguma turi abeerinzi turikutwaza omu muringo gw’obusingye nitwija kureetera abandi kusiima ebi turikwegyesa.—2 Kor. 6:3.