Okubuurira Nikutuhwera Kuguma Tuhamire omu by’Omwoyo
1. Ni birungi ki ebi turikutunga omu kubuurira?
1 Okwejumbira kimwe omu kubuurira nikubaasa kuhamya omukago gwaitu na Yehova kandi tweyongyera kushemererwa. Buzima, nitwejumba omu kubuurira kubaasa kushemeza Yehova. Kwonka ku turikworobera ekiragiro ‘ky’okubuurira ekigambo,’ nitutunga emigisha ya Yehova kandi kituhwera n’omu miringo endiijo. (2 Tim. 4:2; Isa. 48:17, 18) Okubuurira nikubaasa kutuhamya kuta kandi nikutureetera kuta okushemererwa?
2. Okubuurira nikutuhamya mu miringo ki?
2 Nituhama Kandi Tuheebwa Emigisha: Okubuurira nikutuhwera kuta omutima aha migisha y’Obukama baitu butari buremeezi oburiho hati. (2 Kor. 4:18) Okushoboorora aha nyegyesa za Baibuli nikuhamya okwikiriza kwaitu aha bi Yehova aragaaniise kandi kutuhwera kwongyera kukunda amazima. (Isa. 65:13, 14) Omu kuhwera abandi okugira omukago murungi na Yehova, bakareka ‘kuba ekicweka ky’ensi egi’ nikituhwera kumaririra okuguma twetaaniise aha nsi egi.—Yoh. 17:14, 16; Rom. 12:2.
3. Okubuurira kwaitu nikutuhwera kuta okugira emitwarize y’Ekikristaayo?
3 Okwejumba omu kubuurira nikutuhwera kugira emitwarize y’Ekikristaayo. Nk’eky’okureeberaho, okuteeraho ‘kuhinduka byona, ahari boona’ nikutuhwera kwongyera kugira obucureezi. (1 Kor. 9:19-23) Okubuurira abarikuba “baburaburiirwe, bashobeirwe nk’entaama ezitaine muriisa,” nikituhiga kuba abanyambabazi. (Mat. 9:36) Twaguma nitubuurira n’obu abantu bakwanga kwikiriza nari bakatuhiiganisa, nitwega okugumisiriza. Nitwongyera kushemererwa twayehayo kuhwera bandi.—Byak. 20:35.
4. Okubuurira kwawe n’okutwara ota?
4 Ka n’omugisha okugira obuheereza oburikutubaasisa kuhimbisa ogwo Wenka oshemereire kuhimbisibwa! Okubuurira nikutuhamya. Nikureeta emigisha mingi ahari buri omwe orikwejumbira kimwe omu ‘kubuurira hoona amakuru marungi.’—Byak. 20:24, NW.