Yegyesa Abo Abatarikumanya Kushoma Gye
1. Ni buremeezi ki obu turikubaasa kushanga omu kubuurira?
1 Ku turikuba nitubuurira, nitukira kushanga kitoorobi okwegyesa amazima abo abatarikumanya kushoma gye. Nitubaasa kukora ki?
2. Ahabw’enki nituha ekitiinisa abo abatarikumanya kushoma gye kandi nitukibaha tuta?
2 Bahe Ekitiinisa: Omutima gw’omuntu baitu butari bwegyese bwe nikyo kikuru ahari Yehova. (1 Sam. 16:7; Enf. 21:2) N’ahabw’ekyo, titushemereire kugaya abo abatarikumanya kushoma gye. Abantu nk’abo nibaija kwikiriza obuhwezi bwaitu twabaha ekitiinisa kandi tukagumisiriza. (1 Pet. 3:15) Ekyo nikibaasa kutwariramu okutayangisiriza ngu bashome ekyahandiikirwe nari akacweka. Omuntu nk’ogwo yaayeyongyera kwega amazima ga Baibuli, naabaasa kugira ekihika ky’okweyongyera kuboneza omu ku arikushoma okutunga okushemererwa okurikuruga omu kushoma Ekigambo kya Ruhanga “nyomushana na nyekiro.”—Zab. 1:2, 3.
3. Ni miringo ki ey’okwegyesamu erikubaasa kukoresibwa kwegyesa abo abatarikumanya kushoma gye?
3 Emiringo y’Okwegyesamu Abeegi ba Baibuli: Ebishushani nibihwera munonga omu kwegyesa abantu kwijuka ebi barikwega. Noobaasa kubuuza omwegi kugamba eki arikureeba omu kishushani ekiri omu katabo aku muri kwega. Reero okorese ebibuuzo kumuhwera kwetegyereza eki ekishushani kirikwegyesa. Koresa Ebyahandiikirwe ebirikwegyesa enshonga enkuru ezi orikwenda kuhamiiriza aha kishushani ekyo. Ebishushani nibibaasa kukoresibwa omu kweyijutsya ebi mwayega omu ishomo. Otakamwegyesa ebintu bingi omurundi gumwe. Hamiiriza omutwe hamwe n’enshonga enkuru omu eishomo, kandi yetantare okureetamu enshonga ez’aheru y’eishomo. Shoma ebyahandiikirwe kuruga omu Baibuli, kandi koresa ebibuuzo kuhamya ngu omwegi yaayetegyereza eki waashoma. Eki nikibaasa kuhwera omwegi kwongyera kuboneza omu ku arikushoma kubaasa kwongyera kusherura amazima g’omu Baibuli.
4. Nitubaasa kuhwera tuta omwegi waitu kwongyera kushoma gye?
4 Ebirikuhwera Omuntu Kwongyera Kushoma Gye: Abatarikumanya kushoma gye nari abataratungire mugisha gw’okwega kushoma gye nibabaasa kwetegyereza ebi barikwega kandi bagume nibabyijuka. Noobaasa kuhiga abantu nk’abo kuhurikiza gye abandi abarikushoma gye baaba nibabashomera reero bo bakakuratira omu kitabo kyabo. Eki nikiija kuhwera omuntu kwongyera kushoma gye. Naabaasa n’okuhwerwa akatabo Apply Yourself to Reading and Writing. Omu bicweka ebimwe, abareeberezi nibabaasa kukora entebeekanisa kugira ngu omu kibiina habemu okwegyesa okushoma gye. Eki nikibaasa kuhwera abo abatarikumanya kushoma gye, kwetegyereza “Ebyahandiikirwe ebirikwera,” ebirikubahwera kugira obwengye oburikubahitsya aha kujunwa.—2 Tim. 3:15.