Oku Turikubaasa Kuhwera Abarikugumirwa Kushoma
1. Ni buremeezi ki obu turikubaasa kushanga omu kwegyesa Baibuli abarikugumirwa okushoma?
1 Abu turikubuurira abarikugumirwa okushoma nibabaasa kuba nibenda kwega amazima kwonka ahabw’okugira ngu baine kushoma Baibuli n’ebitabo ebindi kibareetere kutiina. Okuha abantu nk’abo akatabo Eki Baibuli Erikwegyesa aha murundi gw’okubanza, nikibaasa kutaba kirungi. Nitubaasa kubahwera tuta kwega amazima? Ababuurizi abarikumanya kubuurira gye kuruga omu mahanga agarikurenga 20 baakabuuzibwa oku barikukira kukikora. Ebi baagarukiremu biri ahaifo.
2. Ni bitabo ki ebi turikubaasa kukoresa kuhwera orikugumirwa okushoma?
2 Orikwenda kwega Baibuli yaaba atarikumanya kushoma nari arikugumirwa okushoma, noobaasa kukoresa akatabo Hurikiza Ruhanga nari Hurikiza Ruhanga Obone Kugumaho Ebiro Byona. Payoniya omwe kuruga omu United States naayoreka orikwenda kwega Baibuli obutabo obu bwombi reero amubuuza akarikukunda. Ofiisi y’eitaagi omuri Kenya neegira ngu obutabo obu buhwereire abantu kwega Baibuli ahakuba kuruga ira, omu mahanga ga Africa, abantu bakaba beega barikukoresa ebitebyo beitu kutari kukoresa ebibuuzo n’eby’okugarukamu. Omuntu oshomire n’obu araabe naabaasa kukunda okushoma hamwe n’okubuuzibwa ebibuuzo, omuringo ogu nigubaasa kutaba murungi aha muntu otashomire. Orikwenda kwega Baibuli yaaba naabaasa kushoma kwonka atarikubaasa kushoma gye, ababuurizi baingi nibakira kukoresa akatabo Amakuru Marungi Kuruga Ahari Ruhanga!, nari N’Obaasa Kuba Munywani wa Ruhanga!, nari Ekitabo Kyangye eky’Ebitebyo by’Omu Baibuli.
3. Ebiraatuhwere kwegyesa gye abatarikumanya kushoma ni biiha?
3 Guma Omusiime: Abatarikumanya kushoma nibatiina kuhemuka kandi nibereeba nkʼabʼahansi. Ekintu kyʼokubanza eki tushemereire kukora nʼokubahwera kutatiina, ekyo nikiija kutubaasisa kubegyesa amazima. Abantu abaingi abatarikumanya kushoma nibaba baine obwengye kandi nibabaasa kwega. Bahe ekitiinisa kandi obaatwarize gye. (1 Pet. 3:15) Nibaija kugira omuhimbo gw’okugumizamu nibeega bamanya ngu okuteeraho kwabo tikwabusha kandi nibongyera kutunguuka omu by’omwoyo. N’ahabw’ekyo guma noobasiima.
Abatarikumanya kushoma nibatiina kuhemuka kandi nibereeba nk’ab’ahansi. Ekintu ky’okubanza eki tushemereire kukora n’okubahwera kutatiina, ekyo nikiija kutubaasisa kubegyesa amazima
4. Nitubaasa kuhiga tuta abarikugumirwa okushoma kutebeekanisiza okwega Baibuli?
4 Ou orikwega nawe Baibuli n’obu yaakuba naagumirwa okushoma, muhige kuguma naatebeekanisa. Ababuurizi abamwe omu South Africa nibahiga abeegi baabo ba Baibuli kushaba abu barikutuura nabo nari banywani baabo abarikumanya kushoma kubahwera. Omubuurizi omwe omuri Bungyereza naahiga omwegi we arikumuha akatabo ake akatebeekanise kuba niko yaakoresa kureeba oku kyorobi kutunga eby’okugarukamu yaaba atebeekanise. Ow’eishe-emwe omuri India naahiga abeegi be ba Baibuli kushwijuma ebishushani by’eishomo eri baraayege sabiiti eraakurateho kandi bakabiteekateekaho, okwega kutakahikire.
5. Nitubaasa kworeka tuta okugumisiriza twaba nitwega n’abeegi ba Baibuli?
5 Gira Okugumisiriza: Akatabo aku muraabe nimukoresa koona omu kwega, ta omutima aha nshonga enkuru kandi ohwere omwegi waawe wa Baibuli kuzeetegyereza gye. Aha murundi gw’okubanza, ni kirungi kuhikaanisa ebiteekateeko omu dakiika 10 nari 15. Nikiba kitari kirungi kumwegyesa ebintu bingi. Kandi gira okugumisiriza omwegi wa Baibuli yaaba naashoma arikugaiturura. Ku araayeyongyere kumanya Yehova nikibaasa kumuhiga kwongyera kwega kushoma gye. Kubaasa kuhwera omwegi wa Baibuli kwega kushoma gye, ni kirungi kumuhiga kwija omu nteerane kwiha obu oratandikye kwega nawe Baibuli.
6. Nitubaasa kuhwera tuta abantu kwega okushoma?
6 Abeegi ba Baibuli ku barikwega kushoma, nibarahuka kutunguuka omu by’omwoyo. (Zab. 1:1-3) Baingi bahwereire abeegi baabo kwega kushoma barikukoresa akatabo Apply Yourself to Reading and Writing bwanyima y’okwega nabo barikukoresa edakiika nkye. Omwegi wa Baibuli yaahwa amaani ahabw’okutamanya kushoma gye, noobaasa kumuhiga orikumugambira ebi abaasize kwega. Muhigye kuguma naashaba kandi omuhamize ngu Yehova naija kumuhwera ahabw’okuteeraho kwega okushoma. (Enf. 16:3; 1 Yoh. 5:14, 15) Ababuurizi abamwe omuri Bungyereza nibahiga abeegi baabo kweteeraho ebigyendererwa ebi barikubaasa kuhikiiriza, nk’okwega enyuguta, okusherura n’okushoma ebyahandiikirwe ebitoorainwe hamwe n’okushoma ebitabo ebirikukwata ahari Baibuli ebyorobi okushoma. Okuhwera abantu kwega okushoma nikitwariramu okubahiga kukukunda beitu kutari kubegyesa kwonka.
7. Ahabw’enki tutashemereire kureka kwegyesa abarikugumirwa okushoma amazima?
7 Yehova tarikutwara abatarikumanya kushoma nk’ab’ahansi. (Yob. 34:19) Yehova naacaaka omutima gw’omuntu. (1 Bus. 28:9) N’ahabw’ekyo otareka kwegyesa amazima abarikugumirwa okushoma. Hariho ebitabo bingi ebi orikubaasa kukoresa kubahwera. Bwanyima, noobaasa kutandika kwega nawe omu katabo Eki Baibuli Erikwegyesa reero oyongyere kumuhwera kwetegyereza ebyahandiikirwe.