RAIBURARE Y'AHA INTANEETI eya Watchtower
Omunaara gw'Omurinzi
RAIBURARE Y'AHA INTANEETI
Runyankore
  • BAIBULI
  • EBITABO
  • ENTEERANE
  • km 8/09 rup. 3-4
  • Teeraho Munonga Kubuurira Abashaija

Vidiyo ei waatoorana teriho.

Haine ekyashoba omu kutaho vidiyo.

  • Teeraho Munonga Kubuurira Abashaija
  • Obuheereza Bwaitu obw’Obukama—2009
  • Ebirikushushana
  • Noobaasa Kukora Ki Kuhwera Omwe aha Bashweraine Otari mu Mazima?
    Obuheereza Bwaitu obw’Obukama—2010
Obuheereza Bwaitu obw’Obukama—2009
km 8/09 rup. 3-4

Teeraho Munonga Kubuurira Abashaija

1. N’enki ekirikwetengwa munonga omu kuhikiiriza emirimo y’Obukama omu bunaku obu?

1 Nk’oku omurimo gw’Obukama gurikweyongyera kuba muhango omu biro ebi eby’emperu, nihetengyesa abashaija abakuzire omu by’omwoyo kuheereza nk’abareeberezi. (Mak. 4:30-32; Byak. 20:28; 1 Tim. 3:1-13) Kwonka omu myanya emwe abakazi nibo barikukira kwega amazima agarikukwata aha Bukama. Omu bicweka ebimwe abashaija nibateekateeka ngu abakazi nibo baine obujunaanizibwa bw’okwegyesa abaana eby’ediini. Nitubaasa kuhiga tuta abashaija abandi kufayo aha by’omwoyo kandi bakatwegaitaho omu kuramya okw’amazima?

2. Okuteeraho kwa Paulo na Petero kubuurira abashaija kukarugamu birungi ki?

2 Teeraho Kubuurira Abashaija: Nyineeka ku arikwega amazima, naakira kuhiga n’abandi ab’omu ka ye kumwegaitaho omu kuramya okw’amazima. Nk’eky’okureeberaho, Paulo na Siila ku baabaire bari omu kihome ahabw’okubuurira kwabo, bakabuurira omurinzi w’ekihome. Omushaija ogwo hamwe n’ab’omu ka ye boona bakabatizibwa. (Byak. 16:25-34) Ahabw’okubuurira kwa Paulo omuri Korinso, ‘Krispo omukuru wa sinagogi akaikiriza Mukama n’eka ye yoona.’ (Byak. 18:8) Petero akatumwa Yehova kubuurira Koruneelio omukuru w’abaserukare owaabaire naamanywa ‘nk’omunyadiini orikutiina Ruhanga.’ Koruneelio hamwe n’ab’omu ka ye n’abanywani be bakabatizibwa.​—Byak. 10:1-48.

3. Omu kutooreza Filipo, ni baahi ‘abarikutegyeka’ abu orikubaasa kubuurira?

3 Okubuurira abashaija ‘abarikutegyeka’ nikubaasa kurugamu ebirungi. (1 Tim. 2:1, 2) Nk’eky’okureeberaho, maraika wa Yehova akagambira Filipo kugamba ‘n’omushaija ow’obushoboorozi bwingi’ owaabaire naareeberera eby’obugaiga bw’omugabekazi wa Esiopia. Filipo akahurira omushaija “naashoma ekitabo kya nabi Isaaya” kandi yamushoboororera amakuru marungi agarikukwata ahari Yesu. Omunyesiopia ogu akahinduka omukuratsi wa Kristo kandi nawe naabaasa kuba yaabugize amakuru marungi obu yaabaire naagaruka owaabo. Kandi naabaasa kuba yaabuuriire omugabekazi hamwe n’abaabaire bari omu kikaari kye, ekyakubaire kitoorobi kubahitsyaho amakuru marungi.​—Byak. 8:26-39.

4. Nitubaasa kuhwera tuta abashaija abandi kuhuurira amakuru marungi?

4 Buurira Abashaija Abandi Baingi: Obu abashaija barikusiiba aha mirimo yaabo, noobaasa kukora entebeekanisa kugira ngu obaase kutunga obwire bw’okubuurira omu mwabazyo, omuri wiikenda, nari omu kihuumuro? Okubuurira omu myanya erikukorerwamu eby’obushuubuzi nikiija kukuha emigisha mingi y’okubuurira abashaija abatarikukira kuba bari omu ka. Ab’eishe-emwe abashaija nibabaasa kufayo munonga kubuurira abashaija abu barikukora nabo. Omu kubuurira enju aha nju, na munonga omu kicweka ekirikukira kubuurirwamu, ab’eishe-emwe abashaija obumwe nibabaasa kuteeraho kugaaniira na baanyineeka.

5. Munyaanyazi-itwe naabaasa kutwaza ata yaabuurira omushaija amakuru g’Obukama akenda kumanya ebirikukiraho?

5 Munyaanyazi-itwe yaabuurira omushaija akenda kumanya ebirikukiraho, tashemereire kugarukayo ow’omushaija ogwo ari wenka. Naabaasa kugyenda na iba nari omubuurizi ondiijo. Omushaija ogwo yaayenda kwega Baibuli, ni kirungi kumuha ow’eishe-emwe akamwegyesa.

6. Nitubaasa kutooreza Paulo tuta okubaasa “kubona baingi”?

6 Gamba aha Birikushemeza Abashaija: Entumwa Paulo akaba ateekateeka aha bu yaabaire abuurira kugira ngu abaase “kubona baingi.” (1 Kor. 9:19-23) Naitwe, tushemereire kuteekateeka aha birikubaasa kushemeza abashaija abu turashange omu kubuurira kandi tutebeekanise gye. Nk’eky’okureeberaho, abashaija baingi nibakira kwerarikirira aha by’entatsya, aha by’eby’obutegyeki, n’aha burinzi bw’ab’omu maka gaabo. Nibabaasa kuba nibenda kumanya ekigyendererwa ky’amagara, ebirikwija kubaho omu nsi, n’ahabw’enki Ruhanga naareka okubonabona kukabaho. Nibaija kukunda amakuru g’Obukama, twagamba aha bintu ebyo omu kubuurira.​—Enf. 16:23.

7. Boona omu kibiina nibabaasa kuhwera bata abashaija abatari baikiriza abarikwija omu nteerane?

7 Teeraho Kubuurira Abashaija Abatari Baikiriza: N’obu emitwarize mirungi ya banyaanyazi-itwe Abakristaayo butoosha erikukira kureetera abashaija baabo kwega amazima, ab’omu kibiina boona nabo nibabaasa kuhwera kihango abashaija nk’abo. (1 Pet. 3:1-4) Omushaija otari mwikiriza yaija n’omukazi we omu nteerane, okumwakiira gye nikubaasa kumureetera kukunda amazima. Okwija kwe obundi nikworeka ngu naakunda amazima, kandi naabaasa kwikiriza kwega Baibuli.

8. Ab’eishe-emwe abashaija nibabaasa kuhwera bata baanyineeka abatari baikiriza abatarikukunda gye amazima?

8 Obundi, abashaija abamwe omu kubanza tibarikukira kukunda eby’omwoyo kwonka bwanyima nibabaasa kutandika kwega Baibuli n’ow’eishe-emwe ori munywani waabo. Ab’eishe-emwe omu kibiina kimwe ku baabaire bataayaayira eka erimu nyineeka otari mwikiriza, bakaba bateeraho kugamba aha bi baabaire nibamanya ngu nibimushemeza. Bwanyima ekyo kikarugamu okwega Baibuli nawe, kandi hati n’ow’eishe-emwe. Obundi, ow’eishe-emwe akahwera nyineeka munywani we omu kwombeka orugo okwehinguririza enju ye. Okumufaho omu muringo nk’ogwo kukarugamu okutandika kwega nawe Baibuli. (Gal. 6:10; Fil. 2:4) Waaba ori ow’eishe-emwe omushaija, noobaasa kuteeraho kwega na iba wa munyaanyazi-itwe otari mwikiriza.

9. Niki ekirikubaasa kuruga omu kutendeka abashaija Abakristaayo?

9 Okutendeka Ab’eishe-emwe Ahabw’Obuheereza bw’Ekibiina: Abashaija abarikwega amakuru g’Obukama kandi bakaheebwa obujunaanizibwa omu buheereza bwa Yehova nibabaasa kuba ‘ebiconco omu bantu,’ nibo b’eishe-emwe abareeberezi abarikukoresa amaani gaabo okugumya ebibiina by’abantu ba Yehova. (Efe. 4:8; Zab. 68:18) Abashaija abo nibareeberera ekibiina beekundiire kandi baine ekihika. (1 Pet. 5:2, 3) Ka nibahwera munonga ab’eishe-emwe boona!

10. Okuteeraho kwa Anania kuhwera Paulo kugasiire kuta baingi?

10 Nk’eky’okureeberaho, Saulo akahinduka “entumwa aha Banyamahanga,” n’obu araabe yaabandize kuhiiganisa Abakristaayo. (Rom. 11:13) Entumwa Anania akabanza kutiina kubuurira Paulo ahabw’enshonga egyo. Kwonka, Anania akakuratira obuhabuzi bwa Mukama yaabuurira omushaija owaahindukire entumwa Paulo. Bwanyima y’emyaka mingi, okubuurira kwa Paulo kukagasira obukumi bw’abantu abaahuriire ebi yaabuuriire otwariiremu n’abantu nyamwingi abarikugasirwa omu baruha ze eziri omu Kigambo kya Ruhanga.​—Byak. 9:3-19; 2 Tim. 3:16, 17.

11. Ahabw’enki tushemereire kukora empindahinduka ezirikwetengyesa okubuurira abashaija?

11 Ka tuteereho kukora empindahinduka ezirikwetengyesa okubaasa kubuurira abashaija. Twakora ekyo, nituhamya ngu Yehova naija kutuha emigisha omu kuteeraho kwaitu kukora ebi akunda kandi n’okufayo aha by’Obukama.

    Ebitabo Ebiri omu Runyankore (1996-2025)
    Shohora
    Taahamu
    • Runyankore
    • Yoherereza ondiijjo
    • Ebi Orikukunda
    • Copyright © 2025 Watch Tower Bible and Tract Society of Pennsylvania
    • Ebiine Kukuratirwa
    • Okurinda Ebirikukukwataho
    • Privacy Settings
    • JW.ORG
    • Taahamu
    Yoherereza ondiijjo