Noobaasa Kukora Ki Kuhwera Omwe aha Bashweraine Otari mu Mazima?
1. Ahabw’enki Abakristaayo abashweraine n’abatari mu mazima tibo bonka abaine ekyetengo ky’okubahwera kwega amazima?
1 Haine ababuurizi abari omu kibiina kyanyu abashweraine n’abatari mu mazima? Kyaba nikwo kiri, hatariho kubanganisa ababuurizi abo baine ekyetengo ngu abu bashweraine nabo babeegaiteho omu kuramya okw’amazima. Kwonka tibo bonka abaine ekyetengo ekyo. Nka Ruhanga, ekibiina kyona kiine ekyetengo ngu “abantu boona bajunwe, bamanyire kimwe amazima.” (1 Tim. 2:4) Nitubaasa kukora ki kuhwera abatari mu mazima abashweraine n’abagarimu?
2. Okwetegyereza nikwija kutubaasisa kuta kuhwera abatari mu mazima abashweraine n’abagarimu?
2 Eky’okubanza, tushemereire kuteeraho kureeba enshonga nk’oku ogwo otari mu mazima arikuzireeba. Baingi abashweraine n’abari omu mazima nibakunda amaka gaabo kandi nibateeraho kuba barungi omu bushwere bwabo n’okuba abazaire barungi. Obundi nibaba baine enyikiriza zaabo ezirikutaana n’ezaitu. Nibabaasa kuba batarikumanya bingi aha Bajurizi ba Yehova okwihaho ebyo ebi baagambiirwe banywani baabo abatarikukunda Bajurizi ba Yehova. Abamwe nibaguubwa kubi ahabw’okugira ngu abu bashweraine nabo abari omu mazima obwire obu baabaire nibakoresa kuba n’ab’omu maka gaabo hati nibabukoresa omu kuramya. Okwetegyereza nikwija kutuhwera kutwariza otari mwikiriza omu muringo gw’embabazi n’ekitiinisa kandi tuhurire twikaikaine twaba turi nawe.—Enf. 16:20-23.
3. Ni muringo ki omurungi ogw’okureetera otari mwikiriza kwikiriza kwega amazima?
3 Yoreka ngu Noomufaho: Omuringo murungi gw’okureetera otari mu mazima oshweraine n’ogarimu kwikiriza kwega amazima, omu kubanza nikubaasa kuba okurabira omu bikorwa beitu kutari mu kugaaniira ahari Baibuli. (1 Pet. 3:1, 2) Ekikuru munonga omuri eki n’okumufaho. Banyaanyazi-itwe omu kibiina nibabaasa kufayo aha mukazi otari mwikiriza oshweraine n’ow’eishe-emwe, reero ab’eishe-emwe bafeyo aha mushaija otari mwikiriza oshweraine na munyaanyazi-itwe. Mu muringo ki?
4. Nitubaasa kworeka tuta ngu nitufayo ahari ogwo otari mwikiriza?
4 Ku oraabe otakareebaga omukazi nari omushaija ogwo, noobaasa kukikora bwanyima y’okugaaniira n’ou ashweraine nawe Omukristaayo aha mbeera ye. Otakahwamu amaani, omu kubanza yaaba atoorekire ngu yaasiima ebi waagaaniira nawe. Twamuhwera kandi tukamufaho nikibaasa kumureetera kukunda Abajurizi ba Yehova. (Rom. 12:20) Abakristaayo abamwe abakuzire omu by’omwoyo bacwiremu kweta otari mwikiriza n’ab’omu ka ye kurya nabo, baine ekigyendererwa ky’okwenda kumumanya gye n’okumaraho rwango ei yaakuba aine aha Bajurizi ba Yehova. Nibagaaniira aha birikumushemeza omu mwanya gw’okugaaniira munonga aha by’omwoyo. Bwanyima, otari mwikiriza ku arikubamanyiira nibabaasa kutandika kugaaniira nawe aha Byahandiikirwe. Nari naabaasa kwikiriza kwija omuri rumwe aha nteerane zaitu kureeba ebi omukazi we arikwega, na munonga obu arikuba naamanya bamwe aha b’omu kibiina. N’obu yaakuba atakenzire kumanya amazima, nitubaasa kumusiima ahabw’okushagika omukazi we ori omu mazima.
5. Abareeberezi nibabaasa kufayo bata aha otari mwikiriza?
5 Okukira munonga abareeberezi omu kibiina baine kufayo aha batari baikiriza nk’abo kandi bakareeba oku baraababuurire. Otari mwikiriza owaabaire atarikwenda kugaaniira naitwe ahari Baibuli, yaaba arwaire naabaasa kwikiriza okuhuumurizibwa okurikuruga omu Byahandiikirwe. Omukristaayo oshweraine n’otari mwikiriza yaatunga oburemeezi nk’okufeerwa omuntu, abareeberezi nibabaasa kweta otari mwikiriza ogwo nawe kubaho baaba nibahuumuriza eka egyo.
6. Ni nshonga ki ezishemereire kutureetera kufayo aha batari mu mazima abashweraine n’abari omu mazima?
6 Teekateeka aha kushemererwa oku Omukristaayo ori omu kibiina kyaitu arikubaasa kugira ou ashweraine nawe yaikiriza akaija omu mazima! Ekyo nikiija n’okushemeza munonga Yehova, baamaraika n’abandi boona omu kibiina. (Luk. 15:7, 10) Kwonka, n’obu otari mwikiriza yaakuba ataikiriize mazima omu kubanza, nabwo nitubaasa kushemererwa ahabw’okugira ngu okuteeraho kwaitu nikushemeza Yehova ‘otarikwenda muntu weena kuhwerekyerera, kureka oyenda ngu boona bahikye aha kweteisa.’—2 Pet. 3:9.
[Ebigambo ebitoorainwe aha rupapura 6]
Omuringo murungi gw’okureetera otari mu mazima oshweraine n’ogarimu kwikiriza kwega amazima, omu kubanza nikubaasa kuba okurabira omu bikorwa beitu kutari mu kugaaniira ahari Baibuli