Twine Kugarukayo Ahari Abo Abarikwenda Kumanya Ebirikukiraho Bwanyima ya Bwire Ki?
1. Niki ekirikutwarirwa omu kuhindura abantu abeegi?
1 Okuhindura abantu abeegi nikutwariramu okugarukayo ahari abo abarikworeka ngu nibenda kwega ebirikukwata aha Bukama bwa Yehova. (Mat. 28:19, 20) Obwire burungi bw’okugarukayo aha muntu orikwenda kumanya ebirikukiraho nibukira kurugiirira aha ntebeekanisa yaitu n’ey’ogwo ou twabuurira. Ahabw’enki twine kurahuka kugarukayo aha muntu ogwo?
2, 3. Ahabw’enki twine kuteeraho kurahuka kugarukayo aha barikwenda kumanya ebirikukiraho?
2 Ahabw’enki Twine Kurahuka Kugarukayo? Omurimo gw’okubuurira ‘amakuru marungi aga ag’obukama’ guri haihi kuhendera, kandi n’emperu y’obusingye obu eri haihi. (Mat. 24:14; 1 Pet. 4:7) N’ahabw’ekyo, obu abo abarikwenda kumanya ebirikukiraho barikubaasa kuhonokaho aha “izooba ry’okujunirwaho,” twine ‘kubuurira ekigambo kya Ruhanga n’obweziriki,’ kandi ekyo nikitwariramu n’okurahuka kugarukayo kubeegyesa.—2 Kor. 6:1, 2; 2 Tim. 4:2.
3 Sitaane ayeteekateekire kucwekyereza embibo y’Obukama yoona ei turikuba tubibire omu mutima gw’omuntu orikuba naayenda kumanya ebirikukiraho. (Mak. 4:14, 15) Abarikuba boreekire ngu nibenda kumanya ebirikukiraho, emirundi mingi nibashekyererwa abo abu barikutuura nabo, abu barikukora nabo nari abandi. Twarahuka kugarukayo, nituhwera omuntu ogwo kuguma aine ekyetengo ky’okwenda kumanya amazima.
4. Niki eki turikubaasa kukora aha murundi gw’okubanza kubuurira omuntu, ekiraije kutuhwera kugarukayo?
4 Kora Nawe Entebeekanisa: Aha murundi gw’okubanza kugaaniira n’omuntu, ni kirungi kukora nawe entebeekanisa y’okugarukayo. Mubuuze ekibuuzo eki oraagarukyemu ku oraagarukeyo. Ni kikuru kugira ahu waahandiika ebi mwagaaniiraho n’obu oraije kugarukayo. Kyaba nikikubaasikira, noobaasa kumushaba kugarukayo eizooba erirakurateho nari haahinguraho ebiro bikye. Waamubuurira omuri wiikenda, kwonka omu biro bya saabiiti arikukora, obundi naabaasa kwikiriza ngu ogarukeyo wiikenda eraakurateho. Waakora entebeekanisa n’omuntu teeraho kugihikiiriza.—Mat. 5:37.
5. Okurahuka kugarukayo aha bantu nikwija kutuhwera kuta kuhikiiriza omurimo gw’okuhindura abantu abeegi ogu Yesu yaatuhaire?
5 Twine enshonga nungi okurahuka kugarukayo ahari abo abarikwenda kumanya ebirikukiraho. N’ahabw’ekyo, kora entebeekanisa kandi orahuke kugarukayo, ahakuba ‘hatsigaire obwire bukye.’ (1 Kor. 7:29) Oku turaarahuke kugarukayo ahari abo abaine ekyetengo ky’okumanya amakuru g’Obukama, nikwo n’okuteeraho kwaitu kuraarugyemu ebirungi.