‘Hayo Amagara Gaawe’ aha Beegi Baawe
1. Niki eki oine kukora okuhwera omwegi waawe wa Baibuli?
1 Okubaasa kuhwera omwegi waawe wa Baibuli kuhika aha kwehayo, hariho eki oine kukora ekirikukira aha kumwegyesa Baibuli butoosha. Entumwa Paulo akagyeragyeranisa omukago ogu yaabaire aine n’abo abu yaabaire naayegyesa n’ogu omukazi orikwontsya arikuba aine n’omwana we. Naitwe nitushemererwa kuhayo “amagara gaitu” kubaasa kuhwera abeegi baitu ba Baibuli kukura omu by’omwoyo.—1 Tes. 2:7-9.
2. Ahabw’enki twine kufayo aha beegi baitu, kandi eki nitubaasa kukikora tuta?
2 Fayo aha Mwegi Waawe: Omwegi wa Baibuli ku arikutandika kugyendera aha bi arikwega, omuntu we ow’omunda naija kumureetera kurekyeraho kugira omukago guhamire n’abo abatarikugyendera aha misingye ya Baibuli. (1 Pet. 4:4) Ab’omu ka yaabo nibabaasa kumwanga. (Mat. 10:34-36) Nitubaasa kuhuumuriza omwegi nk’ogwo turikumworeka ngu nitumufaho munonga. Ow’eishe-emwe omwe omazire obwire buraingwa arikuheereza nk’omumisani naaha obuhabuzi obu: “Otarahuka kugyenda waaheza kwega n’omwegi waawe. Kyaba nikibaasika, gumaho ogaaniireho nawe.” Teeraho kuha omwegi waawe obuhwezi yaaba naabwetenga. Nk’eky’okureeberaho, noobaasa kumuteerera esimu nari kumutaayaayira yaaba arwaire. Noobaasa kushutama nawe omu nteerane, kandi omuhwere aha baana yaaba abaine.
3. Nitubaasa kuhwera tuta omwegi waitu kutunga okuhuumurizibwa kuruga omu kibiina?
3 Obuhwezi bw’Ekibiina: Mwaba nimubuurira haihi n’eka ei omwegi waawe arikutuuramu, noobaasa kumutaayaayiraho kakye kandi omwanjurire abu oriyo noobuurira nabo. Kyaba nikibaasika, waaba nooza kwega nawe guma ogyende n’ababuurizi batari bamwe na bamwe otwariiremu n’abareeberezi. Kandi, waatandika oti kwegyesa omuntu Baibuli, muhige kwija omu nteerane aha Kyombeko ky’Obukama. Eki nikiija kumubaasisa kuba hamwe n’ab’eishe-emwe omu kibiina abarikubaasa kumwombeka omu by’omwoyo.—Mak. 10:29, 30; Heb. 10:24, 25.
4. Nitubaasa kutunga ki ahabw’obweziriki bwaitu?
4 Omuzaire orikuteeraho kuhwera abaana be omu by’omwoyo naashemererwa munonga ku barikucwamu kuheereza Yehova kandi bakagyendera omu mazima. (3 Yoh. 4) Naitwe nitubaasa kugira okushemererwa nk’okwo twaba nituhayo amagara gaitu kuhwera abeegi baitu ba Baibuli.