Nimbaasa Kubuurira Gye?
1. Ahabw’enki tutaine kwereeba nk’abatarikubaasa kubuurira gye?
1 Ku oraabe orayebuurizeho ekibuuzo nk’ekyo, otakaahwa amaani! Okuba omubuurizi murungi tikurikurugiirira aha bwegyese obu omuntu arikuba aine nari obwengye bw’enzaarwa. Bamwe aha bakuratsi ba Yesu aba ira bakagambwaho nk’abantu “babisi kandi abateegyesiibwe.” Kwonka nabwe, bakaba bari ababuurizi barungi b’amakuru marungi ahabw’okugira ngu bakata omutima aha kukuratira eky’okureeberaho kya Yesu.—Byak. 4:13; 1 Pet. 2:21.
2. Yesu akaba ayegyesa mu muringo ki?
2 Oku Yesu Yaayegyeise: Akaba ayegyesa omu muringo gworobi n’omuntu owaabaire aba ataine bwegyese bw’ahaiguru akaba abaasa kwetegyereza. Ebibuuzo bye, enyanjura zoorobi n’eby’okureeberaho, bikareetera abantu kumuhurikiza. (Mat. 6:26) Akooreka ngu naafa aha bantu. (Mat. 14:14) Kandi, Yesu akaba naahamya ebi yaabaire naagamba kandi abigamba n’obushoboorozi, arikumanya ngu Yehova niwe yaabaire amutumire kandi amuhaire amaani kukora omurimo gwe.—Luk. 4:18.
3. Yehova naatuhwera ata kubaasa kubuurira gye?
3 Yehova Naatuhwera: Arikurabira omu Kigambo kye n’ekibiina, Omwegyesa waitu Omukuru naatutendeka ngu tubaase kubuurira gye amakuru marungi. (Isa. 54:13) Ahabw’okugira ngu Yehova akarinda ebihandiikirwe ebirikworeka emiringo ei Yesu yaayegyeisemu, nitugyega kandi tumutooreza. Yehova naatuha omwoyo gwe ogurikwera kandi atutendeka kurabira omu nteerane z’ekibiina. (Yoh. 14:26) Ekindi Yehova naatuha ababuurizi abarikumanya kubuurira gye abarikubaasa kutuhwera kubuurira gye.
4. Ahabw’enki tuhikire kwereeba nk’abarikubaasa kubuurira gye abandi amakuru marungi?
4 Twine enshonga ehikire kwereeba nk’abarikubaasa kubuurira gye, ahabw’okugira ngu “okubaasa kwaitu kuruga ahari Ruhanga.” (2 Kor. 3:5) Twayesiga Yehova kandi tukaba abeesigwa omu kukoresa byona ebi arikutuha, nitwija ‘kuba tuhikire buzima, twine byona ebishemereire omurimo gwona omurungi.’—2 Tim. 3:17.