Nimbuurira Ekirikumara?
1. Ni bintu ki ebirikubaasa kureetera Omukristaayo omwesigwa kwehurira kubi?
1 Orayebuurizeho ekibuuzo ekyo? Ahabwa bukuru, amagara mabi, nari okweyongyera kugira obujunaanizibwa bw’eka, noobaasa kuba otakyejumba omu kubuurira nk’oku waabaire nookwejumbamu kandi ekyo nikibaasa kukumaramu amaani. Munyaanyazi-itwe oine abaana bashatu akahandiika arikugira ngu naahurira kubi ahabw’okugira ngu tarikwejumba munonga omu kubuurira ahakuba okureeberera eka nikumutwarira obwire bwingi n’amaani maingi. Niki ekirikwija kutuhwera kutagwera rubaju omu nshonga egyo?
2. Yehova naatwenza ki?
2 Eki Yehova Arikutwenza: Hatariho kubangaanisa, buri omwe ahariitwe naaba naayenda kwejumbira kimwe omu kubuurira. Kwonka hariho entaaniso mpango ahagati y’eki turikuba nitwenda kukora n’eki turikubaasa kukora. Okureeba ngu nitukunda kwejumbira kimwe omu kubuurira nikyoreka ngu nitumanya obukuru bw’obwire obu turimu. Tushemereire kwijuka ngu Yehova naamanya gye ebi turikubaasa kukora kandi tarikutwenza ebi tutarikubaasa kukora. (Zab. 103:13, 14) Mbwenu shi naatwenza ki? Naayenda ngu tumuheereze twihire aha mutima, tumuhe ekirikukirayo oburungi.—Kol. 3:23.
3. Niki ekirikubaasa kutuhwera kweshwijuma omu kubuurira?
3 Niki ekiraatuhwere kumanya eki turikubaasa kukora? Nitubaasa kushaba Yehova kutuhwera kureeba eki itwe turikubaasa, kurugiirira aha mbeera zaitu. (Zab. 26:2) Omukristaayo okuzire omu by’omwoyo ou turikwesiga kandi orikutumanya gye kandi otarikutiina kutugambira ahu turikwetenga kukora empindahinduka nawe naabaasa kutuhwera. (Enf. 27:9) Kandi ijuka ngu obu embeera zirikubaasa kuhinduka, ni kikuru kushwijuma embeera zaitu butoosha.—Efe. 5:10.
4. Tushemereire kutwara tuta obuhabuzi oburikutuheebwa, oburikuruga omu Baibuli oburikukwata aha kubuurira?
4 Oku Tushemereire Kutwara Obuhabuzi Oburikukwata aha Kubuurira: Omu mpaka z’okwiruka, abarikuba nibashagika abairuki nibakira kuteera akaari kwongyera abairuki abo amaani. Nibakora ekyo kuhwera abairuki kuhika aha kimariro, beitu kutari kubamaramu amaani. N’ahabw’ekyo obuhabuzi oburikuruga omu Baibuli obu turikuheebwa kurabira omu nteerane n’omu bitabo byaitu ‘okubuurira ekigambo n’obweziriki’ nibutugasira kandi nibuba butarikworeka ngu nitwejumba kakye omu kubuurira. (2 Tim. 4:2) Nituhamya ngu twagumizamu nitubuurira n’amaani gaitu goona, Yehova naija kwijuka ‘rukundo n’emirimo’ yaitu atuhe ebihembo.—Heb. 6:10.