Ebi Yehova Arikutwijutsya N’eby’okwesigwa

1. Ni nshonga ki ezi turikukira kwegaho omu nteerane zaitu, kandi nitugasirwa tuta ahabw’okuguma nituzigarukamu?

WAABA nootebeekanisa Omunaara ogu murikuba nimuza kwega, obumwe nooteekateeka oti: ‘Ka nooshusha oti enshonga egi turaagyegireho?’ Ku oraabe otwire noija omu nteerane z’Ekikristaayo, noobaasa kuba oyetegyereize ngu enshonga ezimwe niziguma nizigarukwamu. Nitukira kwega aha Bukama bwa Ruhanga, ekitambo, okubuurira, n’emitwarize nka rukundo n’okwikiriza. Okuguma nitwega aha nshonga ezi nikituhwera kuguma tuhamiire omu kwikiriza n’okuba “abarikworobera Ekigambo, beitu ti kukihurira kwonka.”​—Yak. 1:22.

2. (a) Ekigambo ‘okwijutsya’ obumwe nikiba nikimanyisa ki? (b) Ebiragiro bya Yehova nibitaana bita aha by’abantu?

² Ekigambo ky’Oruheburaayo ekirikuvunuurwa ‘nk’okwijutsya’ obumwe nikimanyisa ebiragiro, nari obuhabuzi obu Ruhanga arikuha abaheereza be. Ebiragiro bya Yehova nibitaana aha by’abantu ebirikuba bitahikire kandi ebiine kuguma nibihindahindurwa. N’obu bimwe biraabe byatairweho ahabw’embeera eyaabaire eriho, na hati nibikikora. Omuhandiiki wa zaaburi akagira ati: “Ebi waahamize, bituura bihikiriire ebiro byona.”​—Zab. 119:144.

3, 4. (a) Ebi Yehova arikutwijutsya obumwe nibitwariramu ki? (b) Abaisraeli bakaba nibaija kugasirwa bata baabyorobera?

³ Ebi Yehova arikutwijutsya obumwe nibitwariramu okurabura. Ruhanga akaba arabura eihanga rya Israeli kurabira omuri baanabi. Nk’eky’okureeberaho, Abaisraeli batakataahire omu Nsi Eyaaraganisiibwe, Musa akabarabura ati: “Mwerinde, emitima yaanyu etaribeihwa-beihwa, mukateishuka, mukaheereza baaruhanga abandi, mukabaramya, MUKAMA akabagirira ekiniga kingi.” (Bir. 11:16, 17) Baibuli neeyoreka ngu Ruhanga akaba aha abaheereza be obuhabuzi.

⁴ Emirundi mingi, Yehova akahiga Abaisraeli kumutiina, kworobera iraka rye n’okweza eiziina rye. (Bir. 4:29-31; 5:28, 29) Ruhanga akabaraganisa ngu baayorobera ebiragiro bye, naija kubaha emigisha.​—Lev. 26:3-6; Bir. 28:1-4.

OKU ABAISRAELI BAATWIRE OBUHABUZI BWA RUHANGA

5. Ahabw’enki Yehova yaarwaniriire omugabe Hezekia?

⁵ Omu byafaayo byona eby’Abaisraeli, Ruhanga akaguma naahikiiriza ekiraganiso kye. Nk’eky’okureeberaho, Yehova akahwera Omugabe Hezekia arikwohereza maraika, obu Senakeribu Omugabe w’Abaasiria yaataahirira Yuda. Omu kiro kimwe, maraika wa Ruhanga akacwekyereza “abarwani boona ab’amaani” omu mahe g’Abaasiria, ekyareeteire Senakeribu kugaruka omu nsi ye aine enshoni. (2 Bus. 32:21; 2 Bag. 19:35) Ahabw’enki Ruhanga yaarinzire omugabe Hezekia? N’ahabw’okugira ngu “akagumira ahari MUKAMA, tiyaareka kumukuratira, yaaguma naayorobera ebiragiro” bye.​—2 Bag. 18:1, 5, 6.

6. Omugabe Yosia akooreka ata ngu naayesiga Yehova?

⁶ Omuntu ondiijo owaayorobeire ebiragiro bya Yehova n’omugabe Yosia. Kuruga omu buto bwe, ‘akakora ebirikusiimwa MUKAMA . . . tiyaateishuka kutoora aha rubaju rwa buryo nari orwa bumosho.’ (2 Bus. 34:1, 2) Yosia akooreka ngu naayesiga Yehova arikucwekyereza ebishushani ebyabaire biri omu Israeli kandi arikugaruraho n’okuramya okw’amazima. Omu kukora ekyo, Yosia akatunga emigisha hamwe n’eihanga ryona.​—Shoma 2 Obusingye 34:31-33.

7. Abaisraeli ku baabaire banga kukuratira ebi Ruhanga arikubaijutsya niki ekyabaire kirugamu?

⁷ Kwonka eky’obusaasi, Abaisreali tibaragumire niboorobera obuhabuzi bwa Yehova. Kumara ebyasha bingi, bakaguma nibagomera Yehova. Kandi okwikiriza kwabo ku kwatuubire, abandi bakabareetera kuramya baaruhanga ab’ebishuba. (Efe. 4:13, 14) Ku baabaire banga kukuratira ebi Ruhanga arikubaijutsya bakaba babonabona.​—Lev. 26:23-25; Yer. 5:23-25.

8. Niki eki turikwegyera aha Baisraeli?

⁸ Niki eki turikwegyera aha Baisraeli? N’abaheereza ba Ruhanga obunaku obu, nibatunga obuhabuzi n’okuhanwa. (2 Pet. 1:12) Ekigambo kya Ruhanga nikitwijutsya buri kukishoma. Nk’abantu abaine obugabe bw’okwecweramu, nitubaasa kucwamu kukuratira obuhabuzi bwa Yehova nari tucwemu okukora ebyaitu. (Enf. 14:12) Ka tureebe enshonga zimwe ahabw’enki nitubaasa kwesiga ebi Yehova arikutwijutsya kandi n’oku turikugasirwa twabikuratira.

YOROBERA YEHOVA OBE GYE

9. Obu Abaisraeli baabaire bari omu ihamba, Yehova akabahamiza ata ngu naabahwera?

⁹ Obu Abaisraeli baatandika orugyendo orwamazire emyaka makumi ana barikuraba omu ihamba, Yehova tarabashoboororeire oku yaabaire naaza kubarinda, kubeebembera n’okubareeberera. Kwonka nabwo, akaguma naabooreka ngu nibabaasa kumwesiga n’obuhabuzi bwe. Arikukoresa ekicu nyomushana, n’ekicu eky’omuriro nyekiro, Yehova akaba aijutsya Abaisraeli ngu ariyo naabashagika omu rugyendo orwo orwabaire rugumire. (Bir. 1:19; Kur. 40:36-38) Kandi akabahwera kutunga ebirikwetengyesa munonga. ‘Ebijwaro byabo tibirakuzire n’ebigyere byabo tibirazimbire.’ Buzima, ‘tibaragizire ki baakyena.’​—Neh. 9:19-21.

10. Yehova naayebembera ata abantu be obunaku obu?

¹⁰ Abaheereza ba Ruhanga obunaku obu bari haihi kutaaha omu nsi ensya. Nitwesiga ngu Yehova naija kutuhwera kutunga ebirikwetengyesa kubaasa kuhonokaho omu ‘kubonabona kwingi’? (Mat. 24:21, 22; Zab. 119:40, 41) N’amazima, Yehova tatutereireho kicu kutwebembera kuhika omu nsi ensya. Kwonka naakoresa ekibiina kye kutuhwera kuguma turi abeeziriki. Nk’eky’okureeberaho, nituhigwa kwongyera kugira omukago murungi na Yehova turikweshomesa Baibuli, turikwejumba omu kuramya kw’eka, okuguma nituza omu nteerane n’okubuurira. Mbwenu shi waakozire entebeekanisa kukuratira obuhabuzi obwo? Okukora ekyo nikiija kutuhwera kugira okwikiriza okuraatubaasise kutaaha omu nsi ensya.

11. Ruhanga naayoreka ata ngu naatufaaho?

¹¹ Ekibiina kya Ruhanga nikituha obuhabuzi oburikutuhwera kucwamu gye. Nk’eky’okureeberaho, nituhigwa kwetantara kusherura eby’obutungi kandi tukamarwa n’ebi twine, kubaasa kwetantara amaganya. Nituheebwa obuhabuzi aha by’enjwara, eby’okweshemeza, n’okucwamu aha bikwatiraine n’obwegyese obu turaatungye. Kandi teekateeka n’aha buhabuzi oburikukwata aha kureeberera ebiiruka byaitu, amaka gaitu, Ebyombeko byaitu by’Obukama, n’okwetebeekanisiza oburemeezi oburikubaasa kubaho ahonaaho. Obuhabuzi nk’obwo nibworeka ngu Ruhanga naayenda ngu tube gye.

OBUHABUZI BUKAHWERA ABAKRISTAAYO ABA IRA KUGUMA BARI ABEESIGWA

12. (a) Ni mutwarize ki ogu Yesu yaabaire akira kugambira abeegi be? (b) Ni ishomo ki eri Petero yaagumire naijuka, kandi eki kishemereire kutukwataho kita?

¹² Omu kyasha ky’okubanza, abaheereza ba Ruhanga bakaba batunga obuhabuzi. Yesu akaguma naagambira abeegi be ahabw’enki kyabaire nikibetengyesa kuba abacureezi. Akashoboorora eki kirikumanyisa okuba omucureezi kandi yaabateeraho n’eky’okureeberaho. Aha kiro ekyahereerukireyo Yesu akaitwa, akaba ari hamwe n’entumwa ze aha kuhingurwaho. Entumwa ze ku baabaire nibarya, Yesu akaimuka yaatandika kubanaabisa ebigyere. Omurimo nk’ogwo gukaba gukorwa abahuuku. (Yoh. 13:1-17) Bakaguma nibaijuka ekikorwa ekyo eky’obucureezi. Bwanyima y’emyaka 30, entumwa Petero owaabaire ariho aha mukoro ogwo akaha abaikiriza bagyenzi be obuhabuzi aha kuba abacureezi. (1 Pet. 5:5) Eky’okureeberaho kya Yesu, twena kiine kutuhwera kutwarizana omu muringo gw’obucureezi.​—Fil. 2:5-8.

13. Yesu akahiga abeegi be kugira mutwarize ki omukuru?

¹³ Kandi akaba ahiga abeegi be kugira okwikiriza. Ku baateireho kubinga daimoni omu mwojo bakaremwa, bakabuuza Yesu bati: “Ahabw’enki itwe tutabaasize kumubinga?” Yesu akabagarukamu ati: “N’ahabw’okwikiriza kwanyu kukye. Kandi buzima nimbagambira nti: Ku muraabe mwine okwikiriza nk’akajuma ka sinaapi, . . . tihariho kintu kyona ekiribarema.” (Mat. 17:14-20) Omu buheereza bwa Yesu bwona akeegyesa abakuratsi be ngu okwikiriza n’omutwarize mukuru. (Shoma Matayo 21:18-22.) Mbwenu shi nooyejumba omu ntebeekanisa ezitairweho kuhamya okwikiriza kwaitu, nk’enteerane mpango ez’ebiro bishatu, ez’ebiro bibiri, n’eza butoosha? Enteerane ezo nizitureetera kushemererwa, kwonka okukira munonga nizituhwera kworeka ngu nitwesiga Yehova.

14. Ahabw’enki kiri kikuru kugira rukundo nk’eya Kristo?

¹⁴ Ebyahandiikirwe eby’Orugriika birimu obuhabuzi bwingi oburikutuhiga kugirirana rukundo. Yesu akagira ngu “kunda mutaahi waawe nk’oku oyekunda,” nikyo kiragiro kya kabiri ekikuru. (Mat. 22:39) Na mwene ishe Yesu orikwetwa Yakobo akagira ngu rukundo ‘n’ekiragiro kya Mukama.’ (Yak. 2:8) Entumwa Yohaana nawe akagira ati: “Abarikukundwa, tindikubahandiikira kiragiro kisya, kureka ekya ira, eki mwabaire mwine okwiha iranaira.” (1 Yoh. 2:7, 8) Yohaana akaba naamanyisa ki obu yaagamba aha ‘kiragiro ekya ira’? Akaba naamanyisa ekiragiro ky’okukunda. Kikaba kiri “ekya ira” ahabw’okugira ngu Yesu akaba yaakigambireho “okwiha iranaira.” Kwonka kikaba kiri “kisya” ahabw’okugira ngu kikaba nikyetengyesa rukundo y’okwefeerereza, ei abakuratsi be baabaire nibaija kwetenga haabaho embeera nsya. Nk’abakuratsi ba Kristo, nitusiima munonga okurabura okurikutuhwera kwetantara okweyendeza okuri omu nsi egi, okurikubaasa kuturemesa kukunda abataahi?

15. Ekigyendererwa kya Yesu eky’okwija omu nsi kikaba kiri kiiha?

¹⁵ Yesu akaba naafayo aha bantu. Eki akakyoreka arikukiza abarwaire n’obu yaazoora abafu. Kwonka, ekigyendererwa kye eky’okwija omu nsi kikaba kitari ky’okukiza abarwaire. Akahwera munonga abantu arikubabuurira kandi akabeegyesa amazima. Nitumanya ngu abantu abu Yesu yaazoire bwanyima bakakura baafa, kwonka abo abaikiriize obutumwa abu yaabuuriire bakagira amatsiko g’okutunga amagara agatahwaho.​—Yoh. 11:25, 26.

16. Abajurizi ba Yehova obunaku obu niboorobera bata ekiragiro kya Yesu eky’okuhindura abantu abeegi?

¹⁶ Yesu akaragiira abakuratsi be ati: “N’ahabw’ekyo mugyende omu mahanga goona, muhindure abantu abeegi.” (Mat. 28:19) Abakristaayo ab’omu kyasha ky’okubanza bakagumizamu n’omurimo ogu Yesu yaatandikireho, kandi naitwe obunaku obu nitubuurira abantu baingi omu myanya mingi. Abajurizi ba Yehova abarikurenga omu bukaikuru mushanju, nibabuurira aha Bukama bwa Ruhanga omu mahanga agarikurenga 230, kandi nibeegyesa abantu baingi Baibuli buri izooba. Okubuurira oku n’akamanyiso ngu turi omu biro by’emperu.

YESIGYE YEHOVA OBUNAKU OBU

17. Ni buhabuzi ki obu Paulo na Petero baahaire?

¹⁷ Obuhabuzi bukahwera Abakristaayo omu kyasha ky’okubanza kuhamya okwikiriza kwabo. Nk’eky’okureeberaho, obu Paulo yaabaire ari omu kihome omuri Rooma akagira Timoseo ati: “Eky’okureeberaho ky’ebigambo by’amazima ebi waahuriire ningamba, okikuratire.” (2 Tim. 1:13) Bwanyima y’okuhiga ab’eishe-emwe bagyenzi be kugira emitwarize nk’okugumisiriza, okukunda, n’okwerinda, entumwa Petero akagira ati: “Nikyo nyendera kubaijutsya obutoosha ebigambo ebyo n’obu muraabe nimubimanya, kandi muhamiire omu mazima.”​—2 Pet. 1:5-8, 12.

18. Abakristaayo omu kyasha ky’okubanza bakaba nibatwara bata obuhabuzi?

¹⁸ Ebaruha ezi Paulo na Petero baahandiikire zirimu “ebigambo ebyagambirwe ira baanabi abarikwera.” (2 Pet. 3:2) Mbwenu shi ab’eishe-emwe omu kyasha ky’okubanza bakaguubwa kubi ahabw’okutunga obuhabuzi obwo? Ngaaha, ekyo kikaba nikyoreka rukundo ya Ruhanga, kandi kikabahwera kukurira “omu mbabazi za Mukama waitu kandi Omujuni Yesu Kristo.”​—2 Pet. 3:18.

19, 20. Ahabw’enki twine kwesiga ebi Yehova arikutwijutsya, kandi nitugasirwa tuta?

¹⁹ Obunaku obu, twine enshonga nyingi ezirikutureetera kworobera ebi Yehova arikutwijutsya, ebiri omu kigambo kye Baibuli. (Shoma Yoshua 23:14.) Omu Baibuli harimu eby’okureeberaho ebirikworeka oku Ruhanga yaabaire naakoragana n’abantu abatahikiriire kumara emyaka mingi. Ebi byona bikahandiikwa kutugasira. (Rom. 15:4; 1 Kor. 10:11) Nitureeba obunabi bwa Baibuli burikuhikiirira. Nk’eky’okureeberaho’ abantu baingi baizire omu kuramya okw’amazima nk’oku kyarangirwe ngu kikaba kiine kubaho “omu biro bya bwanyima.” (Isa. 2:2, 3) Embeera mbi eziriyo nizibaho omu nsi nizihikiiriza obunabi bwa Baibuli. Kandi nk’oku kyaba kyagambirweho, okubuurira okuriyo nikugyenda omu maisho omu nsi yoona nikuhikiiriza ebigambo bya Yesu.​—Mat. 24:14.

²⁰ Omuhangi waitu ataireho obuhabuzi obu turikubaasa kwesiga. Nitugasirwa omu buhabuzi obwo? Twine kwesiga ebi Yehova arikutwijutsya. Ekyo nikyo Rosellen yaakozire. Naagira ati: “Ku naatandikire kwesiga Yehova, nkareeba oku omukono gwe gwa rukundo gurikumpwera kandi gukandeeberera.” Naitwe nitubaasa kugasirwa twakuratira ebi Yehova arikutwijutsya.