Okubonabona Kuri Haihi Kuhwaho!

Teekateeka aha kutuura omu nsi etarimu kubonabona, okuhenda biragiro, entaro, okurwara, n’ebihikiirizi. Nari orikwimuka buri kasheeshe otarikwerarikirira aha by’entaasya, okushoroorwa, nari obutari buringaaniza. Mbwenu shi ebi byona noobireeba nk’ebitarikubaasa kubaho? Buzima, tihariho muntu nari ekibiina ky’abantu abarikubaasa kureetaho embeera nk’ezo omu nsi. Kwonka Ruhanga naaraganisa kuhezaho byona ebirikureetaho okubonabona, otwariiremu n’ebyagambwaho omu kicweka ekirikubanza. Yetegyereze ebiraganiso ebi ebiri omu Kigambo kya Ruhanga, Baibuli:

OBUTEGYEKI BURUNGI

“Ruhanga w’omu iguru aryataho obundi bugabe, obutaricwekyerezibwa ebiro byona, kandi obutegyeki bwabwo tiburihungurwa rindi ihanga; kureka buryayatagura obwo bugabe bwona, bubumareho kandi bwo buryagumaho.”—Danieli 2:44.

Obukama bwa Ruhanga n’obutegyeki bw’omu iguru. Omutegyeki waabwo Yesu Kristo niwe araategyekye omu mwanya gw’obutegyeki bwona obw’abantu kandi naija kuhamya ngu ebi Ruhanga akunda byakorwa omu nsi nk’oku birikukorwa omu iguru. (Matayo 6:9, 10) Obutegyeki obu tiburihungurwa obutegyeki bwona obw’abantu ahabw’okuba ‘n’obukama obutahwaho obwa Mukama waitu kandi Omujuni waitu Yesu Kristo.’ Nihaija kubaho obusingye ebiro byona.—2 Petero 1:11.

TIHARIBAHO MADIINI G’EBISHUBA

“Sitaane ayehindura nka maraika w’omushana. N’ahabw’ekyo ti ky’okutangaaza abaheereza be kwehindura nk’abaheereza b’okuhikiirira; emperu yaabo eryashemerera ebi baakozire.”—2 Abakorinso 11:14, 15.

Emirimo y’Omuregi omu madiini g’ebishuba neija kusheeshuurwa, kandi nigaija kucwekyererezibwa kimwe. Okushoroora omu bantu n’okusheesha eshagama okuri omu madiini, nibiija kuhwaho. Eki nikiija kubaasisa boona abarikukunda “Ruhanga ogwo ohuriire, ow’amazima” kumuramya omu ‘kwikiriza kumwe’ n’omu “mwoyo n’omu mazima.” Eki nikiija kurugamu obusingye n’obumwe.—1 Abatesalonika 1:9; Abaefeso 4:5; Yohaana 4:23.

OBUTAHIKIIRIRA BW’ABANTU NIBWIJA KUHWAHO

“Aryaguma nabo, ari Ruhanga waabo; aryaragaza amarira goona aha maisho gaabo; tiharibaho kufa bundi n’obu kwakuba okucura nari okurira nari obusaasi, ahakuba ebya ira biryaba bihweireho.”—Okushuuruurwa 21:3, 4.

Yehova Ruhanga naabaasisa eki kubaho kurabira omu Mwana we Yesu, owaahaireyo amagara ge ahabw’abantu. (Yohaana 3:16) Ahansi y’obureeberezi bwa Yesu, abantu nibaija kuba abahikiriire. Tiharigaruka kubaho okubonabona ahabw’okuba Ruhanga “aryaguma nabo” kandi “aryaragaza amarira goona aha maisho gaabo.” Obutahikiirira bw’abantu n’okubonabona nibiija kuhwaho ahakuba, “abahikiriire baryahungura ensi, bagituuremu ebiro byona.”—Zaaburi 37:29.

EBIHANGIRWE BY’OMWOYO EBIBI NIBIIJA KUCWEKYEREZIBWA

Yesu “yaakwata ekyo kijoka ekya ira niwe Muregi kandi Sitaane, yaamuboha okumara emyaka rukumi; yaamunaga omu kiina ekitaine bugarukiro, yaakingaho, yaataho akamanyiso ngu arekye kurugamu kubeihabeiha amahanga obundi.”—Okushuuruurwa 20:2, 3.

Ebikorwa bya Sitaane byona nibiija kuhwaho, ku araabohwe na baadaimoni bakanagwa omu “kiina ekitaine bugarukiro,” ekirikumanyisa okutagaruka kugira eki baakora. Obwo tibarigaruka kubonabonesa abantu. Ka nihaija kubaho oburuhuuko kutuura omu nsi etarimu Sitaane na baadaimoni!

‘EBIRO BY’EMPERU’ NIBIIJA KUHENDERA

‘Ebiro by’emperu’ nibiija kuhendera n’eki Yesu yaayetsire “okubonabona kwingi.” Akagira ati: “Omu biro ebyo haryabaho okubonabona kwingi okutakabahoga okwiha aha kuhangwa kw’ensi okuhitsya hati, kandi tikuribaho.”—Matayo 24:21.

Okubonabona nikwija kuba kwingi ahabw’okugira ngu nihaija kubaho oburemeezi obutakabahoga. Okubonabona oku nikwija kuhendera aha kutandika kw’orugamba “orw’ekiro kikuru kya Ruhanga ow’obushoboorozi bwona,” orurikwetwa “Haramagedoni.”—Okushuuruurwa 16:14, 16.

Abantu abarikukunda ebihikire, baine ekihika ky’okureeba ensi ya Sitaane neecwekyerezibwa. Yetegyereze emwe aha migisha ei baraatungye ahansi y’Obukama bwa Ruhanga.

RUHANGA NAIJA KUKORA N’EBIRIKUKIRAHO!

“Omutwe muhango gw’abantu” nibaija kuhonokaho batuure omu nsi ensya: Ekigambo kya Ruhanga nikigira ngu “omutwe muhango gw’abantu” nibaija kuruga “omu kubonabona kwingi” bataahe omu nsi ensya ehikiriire. (Okushuuruurwa 7:9, 10, 14; 2 Petero 3:13) Nibaija kumanya ngu Yesu Kristo “Omwana gw’entaama wa Ruhanga, orikwihaho ekibi ky’ensi,” niwe abahwereire kucungurwa.—Yohaana 1:29.

Obwegyese kuruga ahari Ruhanga nibwija kubaasisa abantu kutunga emigisha mingi: Omu nsi ensya, “okumanya MUKAMA kuryabuga ensi yoona.” (Isaaya 11:9) Okwegyesibwa okwo nikwija kutwariramu obuhabuzi aha ku abantu barikubaasa kutuurana omu busingye n’ebyahangirwe ebindi. Ruhanga naaraganisa ati: “Niinye MUKAMA Ruhanga waawe orikukwegyesa eby’okukugasira, nkakwebembera omu muhanda ogu oshemereire kutoora.”—Isaaya 48:17.

Abafu nibaija kuzoorwa kuruga omu bituuro: Obu yaabaire ari omu nsi, Yesu akazoora munywani we Laazaaro kuruga omu kituuro. (Yohaana 11:1, 5, 38-44) Omu kukora ekyo, akooreka oku araije kuzoora abantu omu nsi yoona ahansi y’Obukama bwa Ruhanga.—Yohaana 5:28, 29.

Obusingye n’okuhikiirira nibiija kugumaho ebiro byona: Ahansi y’obutegyeki bwa Kristo, okuhenda ebiragiro nikwija kuhwaho. Ekyo nitukimanya tuta? Ahabw’okugira ngu Yesu naabaasa kucaaka emitima, naija kubaasa kumanya abahikiriire n’ababi. Ababi abarikwanga kuhindura emitwarize yaabo, tibarikwija kwikirizibwa kutuura omu nsi ensya.—Zaaburi 37:9, 10; Isaaya 11:3, 4; 65:20; Matayo 9:4.

Ebi twareeba ni bimwe aha bunabi bwingi oburi omu Baibuli oburikworeka ebintu birungi ebiri haihi kubaho. Obukama bwa Ruhanga ku buraatandike kutegyeka omu nsi, nihaija kubamu “obusingye bwingi” ebiro byona. (Zaaburi 37:11, 29) Byona ebirikureetera abantu kubonabona, nibiija kuhwaho. Twine obuhame ahabw’ekiragaaniso kya Ruhanga eki: “Reeba nimpindura byona bisya . . . ebigambo ebi n’eby’okwesigwa kandi eby’amazima.”—Okushuuruurwa 21:5.

[Obukomooko bw’ekishushani ekiri aha rupapura 5]