Emisiri Eyezire Ehikire Kushaaruurwa
1. Ni murimo ki omukuru oguriyo nigukorwa?
1 Yesu ku yaaherize kubuurira omukazi Omusamaria, akagambira abeegi be ati: “Munagye amaisho, mureebe emisiri ku eyezire, ku ehikire kugyeshwa.” (Yoh. 4:35, 36) Omurimo gw’ishaaruura ry’eby’omwoyo gukaba nigugyenda omu maisho, kandi Yesu akaba naareeba ngu hakaba hariho omurimo muhango ogwabaire nigwija kukorwa omu nsi yoona. Ari omu mwanya gwe omu iguru, Yesu na hati nakyejumba omu murimo ogwo. (Mat. 28:19, 20) Ni bumanyiso ki oburikworeka ngu omurimo ogwo nk’oku guri haihi kuhendera nigweyongyera kukorwa munonga?
2. Niki ebibaireho ebirikworeka ngu omurimo gw’okushaaruura omu nsi yoona nigweyongyera kukorwa munonga?
2 Omurimo gw’Okushaaruura ogw’Omu Nsi Yoona: Omu mwaka gw’obuheereza 2009, omubaro gw’ababuurizi omu nsi yoona gukeeyongyeraho ebicweka 3.2 ahari igana. Omu mahanga ahu ababuurizi batarikwikirizibwa kubuurira omubaro gw’ababuurizi gukeeyongyeraho ebicweka 14 ahari igana. Abantu abaabaire nibeegyesibwa Baibuli buri kwezi bakaba nibarenga 7,619,000—omubaro ogurikukirira kimwe ogw’ababuurizi boona omu nsi yoona kandi bakaba nibakira aha beegi ab’omwaka 2008 nk’emitwaro makumi ataano. Nk’oku omurimo gurikweyongyera kuba muhango omu bicweka bingi, nikwo n’abo abatendekirwe nk’abamiisani barikweyongyera kwetengwa. Omu mahanga maingi abarikwega amazima ni baingi. Nikireebwa butunu ngu Yehova ariyo naarahutsya omurimo ogu omu bwire obu obw’okuhendera okushaaruura. (Isa. 60:22) Oine emiteekateekyere mirungi aha kicweka eki murikubuuriramu?
3. Abamwe nibabaasa kugamba ki aha bikwatiraine n’ekicweka eki barikubuuriramu?
3 Omurimo gw’Okushaaruura omu Kicweka Kyaitu: Abamwe nibabaasa kugira ngu “ekicweka kyaitu tikirikweza munonga.” N’eky’amazima ngu ebicweka ebimwe nibireebeka nk’ebitarikweza nk’ebindi nari nk’ebitakyeza nk’oku byabaire biri omu bwire bw’enyima. N’ahabw’ekyo ababuurizi abamwe nibabaasa kugira ngu abo abarikwenda kwega amazima ni bakye munonga omu bicweka byabo kandi ngu batsigaize omurimo mukye. Kwonka shi ekyo kihikire?
4. Ni miteekateekyere ki mirungi ei tushemereire kugira aha kubuurira, kandi n’ahabw’enki?
4 Kuruga aha kutandika kuhika aha kuhendera, okushaaruura n’obwire bw’okukora n’obweziriki. Yetegyereze obukuru bw’ebigambo bya Yesu ebi: “Eby’okugyesha ni bingi munonga, kwonka abagyesi ni bakye; n’ahabw’ekyo mushabe Mukama w’eigyesha ayohereze abagyesi omu by’okugyesha bye.” (Mat. 9:37, 38) Yehova Mukama w’ishaaruura, niwe arikumanya ahu abarikwenda kwega amazima bari n’obu barageegye. (Yoh. 6:44; 1 Kor. 3:6-8) Itwe twine bujunaanizibwa ki? Baibuli neegarukamu eti: “Omu kasheeshe ogume obibe embibo, kandi n’omu mwabazyo orekye kugwisa omukono.” (Mub. 11:4-6) Buzima, obu okushaaruura kuri haihi kuhendera obu tibwo bwire bw’okugwisa omukono gwaitu.
5. Ahabw’enki tushemereire kugumizamu nitubuurira n’obweziriki omu kicweka ekirikureebeka nk’ekitarimu abarikwenda kuhurikiza?
5 Tugumizemu Nitushaaruura: Nangwa n’obu ekicweka twakuba tukibuuriiremu munonga kandi kirikureebeka nk’ekitakirimu abarikwenda kuhurikiza, hariho enshonga nungi eshemereire kutureetera kuguma nitwijuka obukuru bw’obwire obu turimu n’okubuurira twine obweziriki. (2 Tim. 4:2) Oburemeezi bw’amaani oburikubaho omu nsi nibureetera abantu kuhindura aha miteekateekyere yaabo kandi bakateekateeka munonga aha biro by’omumaisho. Eminyeeto ku barikukura, nibabaasa kuhurira baine ekyetengo ky’okutunga oburinzi n’obusingye omu mutima. Kandi okugumisiriza kwaitu omu kubuurira nikubaasa kureetera abandi kwenda kwega amazima. Abo abaayangire kuhurikiza omu bwire bw’enyima nibabaasa kuhurikiza omu biro by’omumaisho. Nangwa n’abo abarikwanga kuhurikiza amakuru gaitu bakigyendereire baine kuraburwa.—Ezk. 2:4, 5; 3:19.
6. Ekicweka kyaitu kyaba kigumire kubuuriramu, niki ekirikwija kutuhwera kuguma nitubuurira n’obweziriki?
6 Ekicweka kyaitu kyaba kigumire kubuuriramu, niki ekirikwija kutuhwera kuguma nitubuurira n’obweziriki? Omu mwanya gw’okubuurira enju aha nju kwonka, nitubaasa kukoresa n’emiringo y’okubuurira endiijo nk’okubuurira omu myanya erikukorerwamu eby’obushuubuzi nari okukoresa esimu. Nari nitubaasa kuhindahindura omu nyanjura zaitu. Nitubaasa kuhindahindura omu ntebeekanisa zaitu tubuurire omu mwabazyo nari omu bwire obundi obu abantu barikubaasa kushangwa omuka. Obundi nitubaasa kucwamu kwega orurimi orundi kugira ngu tubaase kuhika aha bantu baingi n’amakuru marungi. Nitubaasa kwongyera aha buheereza bwaitu turikuheereza nka baapayoniya ab’obutwire. Nari nitubaasa kuza kubuurira omu kicweka ekirimu ababuurizi bakye. Twaba twine emiteekateekyere mirungi aha murimo gw’okushaaruura, nitwija kuteeraho kwejumbira kimwe omu murimo ogu omukuru nk’oku kirikubaasika.
7. Omurimo gw’okushaaruura twine kugukora kuhitsya ryari?
7 Abahingi baaba baine obwire bukye bw’okushaaruura ebihingwa byabo, tibarikuhumura nari kukoresa obugara okuhitsya baahendera omurimo ogwo. Omurimo gw’okushaaruura okw’eby’omwoyo nagwo gushemereire kukorwa gutyo. Omurimo ogwo twine kugukora kuhitsya ryari? Nigwija kugumizamu omu ‘kuhendera kw’entebeekanisa y’obusingye obu’ n’okuhitsya aha ‘mperu.’ (Mat. 24:14; 28:20, NW) Nk’Omuheereza wa Yehova omukuru, nitwenda kuheza omurimo ogutuhairwe. (Yoh. 4:34; 17:4) N’ahabw’ekyo ka tugumizemu kwejumba omu kubuurira twine obweziriki, okushemererwa n’emiteekateekyere mirungi okuhitsya aha mperu. (Mat. 24:13) Buzima okushaaruura tikukahwaire!
[Ebigambo ebitoorainwe aha rupapura 2]
Kuruga aha kutandika kuhika aha kuhendera, okushaaruura n’obwire bw’okukora n’obweziriki