Ekiijutsyo Nikiija Kuba Obujurizi bw’Amaani
1. Oyihireho orubazo, niki ekindi ekirikubaasa kushemeza abarikwija aha Kiijutsyo? Shoboorora.
1 N’obweziriki twetsire abantu kwija kuba naitwe aha Kiijutsyo. Ebi abagyenyi abarikwija aha Kiijutsyo barikuhurira tibyo byonka ebirikubaasa kubashemeza. Bwanyima y’okuba aha Kiijutsyo, omukazi omwe akagamba aha bi yaareebire—okutwarizana gye, ekyombeko kirungi ekyayombekirwe ab’eishe-emwe, eki barikuboneza kandi bakarinda gye. N’ahabw’ekyo, twena atari mugambi wenka, nitukwatanisa kuhwera abarikwija aha mukoro mukuru ogu omu mwaka.—Efe. 4:16.
2. Buri omwe ahariitwe naabaasa kuhwera ata abagyenyi abaraije aha Kiijutsyo?
2 Ramutsya Abagyenyi na Rukundo: Twayakiira abagyenyi na rukundo kandi tukabaramutsya, nikiija kuba obujurizi aharibo. (Yoh. 13:35) N’obu oraabe otarikubaasa kugamba na buri omwe, noobaasa kuramutsya abari haihi naiwe kandi obeyanjurire. (Heb. 13:1, 2) Teeraho kuhika ahari abo abaraareebekye nk’abataine ou barikumanya. Nibabaasa kuba baatungire akapapura k’okweta abantu aha Kiijutsyo, omuri kampeyini. Noobaasa kubabuuza oti: “Ogu nigwo murundi gwanyu gw’okubanza kwija aha?” Bashabe kushutama naiwe kandi kyaba nikibaasika obagarukyemu n’ebibuuzo ebi baakuba baine. Ku mwakuba mwine kuruga omu Kyombeko ky’Obukama juba kugira ngu abandi babaase kukikoresa, noobaasa kubabuuza oti: “Omukoro mwagureeba muta? Nimubaasa kumpa endagiriro zaanyu?”
3. Nitubaasa kwakiira tuta abo abamazire obwire buraingwa batarikubuurira?
3 Yakiira Ababuurizi Abamazire Obwire Buraingwa Batarikubuurira: Hatariho kubangaanisa, ababuurizi nk’abo nibaija kuba bariho, otwariiremu n’abo abarikwija aha Kiijutsyo kyonka. Baakiire, kandi oboorekye ngu waashemererwa kubareeba. (Rom. 15:7) Abareeberezi nibabaasa kubataayaayira bwanyima y’Ekiijutsyo kubahiga kugumizamu nibaija omu nteerane. Twine amatsiko ngu baingi aha baraije nibaija kuhigwa kuhimbisa Ruhanga ahabw’ebi baraahurire ‘n’ebirungi ebi baraareebe turikukora.’—1 Pet. 2:12.